IMAMATTA 2 - WUKE SUSI WATTI'U AL᷊AL᷊USASSA

Sasamba ia'imbe

¹ Amungkangngu pia sangkatou mangonggolu sasamba ia'imbe su Mawu, sasamba udde ṛinone taponna apan apianne apan nilal᷊inannu lanan zaitun wuṛṛu niandangannu amania su wowone.

² I tou ṛinone mangapidda su manga imam papapulunni Harun. Imam apan mammanara ṛinone manganu sangkangkumma taponna udde ringannu lanan zaitun wuṛṛu anambon amaniane, ana see itambunna su wowon mezbah maola'a tatiala manungku sarangkanambone buatte nionggola su Mawu. Hal᷊uṛṛun sasamba anna udde ma'al᷊uassa naungngu Mawu.

³ Anna ia imbe lambene ionggola su manga imam. Sasamba udde tumaniten susi ana waugu buatte nianu wuassu anna apan buatte nionggola su Mawu.

⁴ Amungkangngu apan nionggola udde roti apan nilol᷊o su tampa pallol᷊oanna, roti udde ṛinone olaanna tawe ragine. Roti udde tawe wotongnge maappala, olaanna wuassu taponna al᷊ussa ringannu lanan zaitun, wotongnge lai kukisse apan tumba'u wuṛṛannu lanan zaitun.

⁵ Amungkangngu apan nionggola udde roti apan nilol᷊o su pallol᷊oanna, roti udde ṛinone olaanna wuassu taponna al᷊ussa ringannu lanan zaitun, arawe tawe mappaattu ragi.

⁶ Roti apan nionggola udde rinone pesanganna, ana see lal᷊inannu lanan zaitun.

⁷ Amungkangngu apan nionggola udde roti apan nilaha su urinna, roti udde ṛinone olaanna wuassu taponna al᷊ussa wuṛṛu lanan zaitun.

⁸ Roti apan nola'a ringannu olangnge aroddi ṛinone ionggola su Mawu wuṛṛu itantilla su imam apan mangapidda watukku mezbah.

⁹ Imam manganu sambageanganna wuassu roti ana see itambunni tou su wowon mezbah maola'a tatiala manungku sarangkanambone buatte nionggola su Mawu. Hal᷊urune ma'al᷊uassa naungngu Mawu.

¹⁰ Lambene udde wuattu manga imam. Roti udde lembon susi ana waugu nianu wuassu anna apan buatte nionggola su Mawu.

¹¹ Sasamba ia'imbe su Mawu tawe wotongnge lo'annu pul᷊a ara'e ragi, ana waugu pul᷊a wuṛṛu ragi tawe wotongnge itambunna olaanna sasamba su Mawu.

¹² Wuassu hessin leta'a paarorone suapan tonna, sambageanganna ṛinone ionggola su Mawu, arawe tawe wotongnge tutunganna su wowon mezbah.

¹³ Suapan sasamba ia'imbe ṛinone haramanna, ana waugu haramma maola'a tatialan Pa'airen Duata ringanni yamiu. Nariaddi anambon sasamba ṛinone haramanna.

¹⁴ Amungkangngu i yamiu mangonggola su Mawu gandumma paarorone niitingngi yamiu, apira'e gandumma wakku apan buatte niwalu al᷊ussa ara'e nitapa.

¹⁵ Gandumma udde ṛinone lal᷊inannu lanan zaitun wuṛṛu andangannu amania rosone.

¹⁶ Imam ṛinone manambunnu sambageanganna wuassu gandumma wuṛṛu lana udde see lai anambon amania, maola'a tatiala manungku sarangkanambone buatte nionggola su Mawu.