IMAMATTA 17 - WUKE SUSI WATTI'U AL᷊AL᷊USASSA

Atoranna su ola'u daṛṛa

¹ Mawu nandolokki Musa

² niapaonggolu manga atoranna indi si Harun, manga anangnge wuṛṛu su walahannu Israel sarangkanambone.

^3-4 Amungkangngu sangkatou taumatan Israel mangonggolu sapi, domba ara'e ambinga su Mawu, winatangnga udde ṛinone pototanna su saruannu ngaran Dasanna Mawu. Amungkangngu udde nipototti tou su tampa waine, i tou nilumawangnga tita ana waugu napanawon daṛṛa. I tou tate lai mareengnga al᷊aṛṛana'u Ruata.

⁵ Parenta udde pandumanne tadea'u walahannu Israel mangapidda watukku Rasanna Mawu anambon binatangnga sasamba apan inanaramanne pappototanni mangitou su wailla. I mangitou ṛinone mangapiddu aonggola udde su imam su saruannu ngaran Dasannu Mawu wuṛṛu pototanna isudde maola'a sasamban paddarame.

⁶ Imam ṛinone manebbokku daṛṛan binatangnga udde su manga sandiṛṛannu mezbah su saruannu ngaran Dasannu Mawu ana see manambunnu tawane tadea'u hal᷊urune maal᷊uassa naungngu Mawu.

⁷ Walahannu Israel ṛinone sidutu matuṛṛutta su Mawu wuṛṛu mangke imbaṛṛangnga mamototta winatangnga su manga wailla olaanna sasamba su manga ringnga lal᷊eo. Atoranna udde sidutu tattuṛṛutanna saran mal᷊annu-l᷊annu.

⁸ Amungkangngu sangkatou Israel ara'e sangkatou taumata raho apan uatana'a namanua su wallatu taumatan Israel mangonggolu sasamba itattambunna ara'e sasamba waine

⁹ su Mawu, i tou ṛinone mangonggola su saruannu ngaran Dasanna Mawu. Amungkangngu i tou mangonggolu udde su tampa waine, i tou tate lai mareengnga su al᷊aṛṛana'u Ruata.

¹⁰ Amungkangngu sangkatou taumatan Israel ara'e sangkatou taumata raho apan uatana'a namanua su wallatu taumatan Israel na'inumma daṛṛa, i tou sarun iṛṛuumannu Mawu wuṛṛu tate lai mareengnga ere al᷊aṛṛanang-Nge.

¹¹ Niawan al᷊awo'u riadinanna udde sulal᷊ummu daṛṛane. Ana waugu udde Mawu namarenta tadea'u anambon daṛṛa iwokka su wowon mezbah tadea'u manga rosan ṛuanganna pappasanna. Daṛṛa udde niawa, ma'apappassa rosa.

¹² Ana waugu walahannu Israel ara'e taumata raho apan namanua su wallatti mangitou isassingadda ma'inumma daṛṛa.

¹³ Amungkangngu sangkatou taumatan Israel ara'e taumata raho apan natana'a namanua su wallattu walahannu Israel nanametta manu'u winalanganna ara'e binatangnga waine apan tawe ipappalli, i tou ṛinone mapasabbangngu daṛṛan binatangnga udde wuṛṛu omboannu leta'a.

¹⁴ Niawan suapan riadianna udde sulal᷊ummu daṛṛane, ana waugu udde Mawu naningaddu walahannu Israel ma'inumma daṛṛa. Suapan taumata apan ma'ola'a pallal᷊aghu isassingadda udde tate lai mareengnga al᷊aṛṛana'u Ruata.

¹⁵ Suapan taumatan Israel ara'e taumata raho apan uminassa ṛemessu binatangnga apan nate sassane ara'e nate niaṛṛattu binatangnga mal᷊aṛṛaga, ṛinone mabbansalla laungnge ana see mandeno wuṛṛu mallaṛṛaddo maddatingngu matannallo umattuppa, wakkute udde i tou mabbal᷊i waresi.

¹⁶ Amungkangngu i tou napaamattu udde, i tou ṛinone mamasanna pangillul᷊eanne.