IMAMATTA 1 - WUKE SUSI WATTI'U AL᷊AL᷊USASSA

Sasamba itattambunna

¹ Wuassu Rasan-Ne, Mawu namaggo si Musa wuṛṛu nangonggolu manga atoranna si tou

² apan ṛinone iappaamattu taumatan Israel. Amungkangngu pia sangkatou mangonggolu winatangnga maola'a sasamba itattambunna su Mawu, i tou wotongnge mangonggolu sapi, domba ara'e ambingnge.

³ Amungkangngu nionggola udde sambau sapi, winatangnga udde ṛinone esakka wuṛṛu tawe sangkulle. Sapi udde ṛinone iapiddi tou watukku ngaran Dasannu Mawu, tadea'u Mawu mal᷊uassa su taumata udde.

⁴ Ana see i tou ṛinone mangaddon limane su puan binatangnga udde, ne sasambane sarun sengkamannu Mawu ipangampungnga rosane.

⁵ Wua'udde sapi udde ṛinone ṛatanna su saruannu ngaran Dasanna. Daṛṛane ṛinone ionggolu manga imam papapulunni Harun su Mawu, ana see iwokka su mezbah sandiṛṛanne appata wuṛṛu su saruannu ngaran Dasanna.

⁶ Wua'udde taumata udde ṛinone malluussa wuṛṛu manattadda winatangnga udde.

⁷ Manga imam ṛinone makkunuttu putungnga su wowon mezbah ana see mangatokku alu su wowone.

⁸ Manga sasamba apan nitattada udde, nasutta puane wuṛṛu tawane, ṛinone itambunni mangitou su putungnga.

⁹ Ana see taumata udde ṛinone mangukkasa tinaine see palangngu sapi udde, wuṛṛu imam apan uamanara ṛinone manambunnu sarangkanambone. Hal᷊urun sasamba itattambunna udde ma'al᷊uassa naungngu Mawu.

¹⁰ Amungkangngu niola'a sasamba udde sambau domba ara'e ambinga, winatangnga udde ṛinone esakka wuṛṛu tawe sangkulle.

¹¹ Taumata udde ṛinone maṛṛata winatangnga udde su samba'an sawannaku mezbah, ana see manga imam ṛinone mamokkan daṛṛane su sandiṛṛanne appata.

¹² Napawe winatangnga udde buatte nitattada, sarangkanambone, nasutta pua wuṛṛu tawane, ṛinone itambunnu manga imam su mezbah.

¹³ Ana see taumata udde ṛinone mangukkassa tinaine wuṛṛu palangngu winatangnga udde. Wua'udde manga imam ṛinone mangonggolu sarangkanambone su Mawu, wuṛṛu manambunna su wowon mezbah. Hal᷊urun sasamba itattambunna udde ma'al᷊uassa naungngu Mawu.

¹⁴ Amungkangngu niola'a sasamba udde sambau manu'u winalanganna, ṛinone manu'a bakiangnga ara'e merpati wakku.

¹⁵ Imam ṛinone mangapiddu manu'u winalanganna udde watukku mezbah, ana see mallatto'a ullekane wuṛṛu manambunnu puane su wowon mezbah. Daṛṛan manu'a udde ṛinone ipakka su sandiṛṛannu mezbah.

¹⁶ Arangane ringannu lal᷊oṛṛone ṛinone iapasabbangnga, ana see iramme su samba'an da'in mezbah su tampan awu.

¹⁷ Wua'udde manu'u winalanganna udde ṛinone latto'anna su punnu papaidde, arawe papaidde tawe wotongnge mabassutta. Ana see manu'a udde ṛinone itambunna su wowon mezbah. Hal᷊urun sasamba itattambunna udde ma'al᷊uassa naungngu Mawu.