IBRANI 9 - WUKE SUSI WATTI'U AL᷊AL᷊USASSA

Ola'u pasasubba su runia wuṛṛu ola'u pasasubba su surga

¹ Pa'aire apan paarorone pia manga atorannu patataṛṛamawu, wuṛṛu pia lai tampa patataṛṛamawuanna niola'u taumata.

² Sambau rasanna niapararisikka, apan wageangnge su saruanne nisaggo Wabbo'a Susi. Isudde pia aianannu sol᷊o, wuṛṛu pia lai medda ringannu roti apan ipasubba Ruata.

³ Su wageangu lal᷊umme, eteudde su liuddu pampele aruane, pia wabbo'a apan isassago Wabbo'a Lembon Susi.

⁴ Sulal᷊ummu wabbo'a udde pia medda pangangadoannu sasamba apan niola'a wuassu wul᷊awanna panutunganna dupa, wuṛṛu pia lai Wantalu Pa'aire apan sarangkahewalle papi'unannu wul᷊awanna. sulal᷊ummu wantala udde pia urinna wul᷊awanna lal᷊oṛṛoannu manna, ta'inni Harun apan nassollate, wuṛṛu ruang kul᷊appa watu pamamoṛṛetanna apan su wowone wawoṛṛetannu mapul᷊o titan Ruata.

⁵ Su wowom wantala udde pia darua mala'ekatta, eteudde riadianna pia papaidde apan mammasingkata manungku Ruata uatana'a isudde lai. Papaiddu mala'ekatta darua udde uasiappakka su wowon lal᷊uubu Wantala, eteudde tampam pangangampunganna rosa. Arawe sarangkanambone udde tawe iatal᷊a'a orassa indi sambau-sambau.

⁶ Aroddite sarangkanambone niatokka. Miallo-miallo manga imam sussutta sulal᷊ummu wageangngu saruannu rasanna udde mappaamattu manara mangitou.

⁷ Apan sussutta su wageangnge lal᷊umme su rasanna udde tumba'u imam wahewa. I tou mammanara udde tumbau santonna paassa. Udde mammanaranne ringannu mangngapiddu ṛaṛṛa ipassubba Ruata ana waugu watanganne sassane wuṛṛu ana waugu manga rosa apan niola'u pabbawalage su liuddu ṛingiranne.

⁸ Ringannu atoranna udde, Ghaṛṛahon Ruata napaal᷊iatta'a ringanu masemakka, manungku tantal᷊anna rasanna su saruanne udde ta'e uarisikka, lal᷊anna suttanna watukku Wabbo'a Lembon Susi udde taambe mawu'a.

⁹ Indi maola'a hambarannu orassa indi: atappasanne manungku manga sasamba wuṛṛu manga aonggola winatangnga apan nionggolla su Ruata, tawe maasuungngu lal᷊ummu naungngu taumata apan mangngapiddu aonggola udde.

¹⁰ Ana waugu manga lal᷊aghu udde tumba'u matataṛṛino su anna, inumanna, wuṛṛu al᷊awo'u lal᷊aghum pamamaresi. Sarangkanambone udde tumba'u atorannu wadanga apan tumba'u ma'oman sara tempone Ruata mallimbakku.

¹¹ Arawe i Kristus suete nirumanta ere sangkatou Imam Wahewa wuassu inolaanna apan mapia wuṛṛu piate. Su Rasannu Mawu suapa i Tou mappaamattu manarane ere sangkatou Imam Wahewa eteudde rasanna apan lembon mawantuga wuṛṛu lembon nasuungnga. Udde tawe niola'u taumata; atappasanne wal᷊ine niarantanne wuassu runia apan niriaddi indi.

¹² Mawu Yesus sinumutta su Wabbo'a Lembon Susi sulal᷊ummu rasanna udde tumba'u paassa ma'oman sara mal᷊annu-l᷊annu. Su tempo udde i Tou tawe nangapiddu ṛaṛṛang kambinga esakka ara'e ṛaṛṛan ana'u sapi olaanna sassamba; i Tou nangapiddu ṛaṛṛan Tou sassane, wuṛṛu ringannu udde i Tou nanubusa rosang kite saran mal᷊annu-l᷊annu.

¹³ Ṛaṛṛang kambinga wuṛṛu sapi esakka wuṛṛu awun sassamba ana'u sapi, nipaatta ipammokka manga taumata apan lal᷊eo tumuṛṛuttu atorannu agama tadea'u i mangitou mawaresi. Ne, amungkangu ṛaṛṛa wuṛṛu awu udde wotongnge maawaresi al᷊al᷊eo manga taumata udde,

¹⁴ nangilembote lai ṛaṛṛan Kristus! Sulal᷊ummu Ghaṛṛaho awasa, i Kristus nanantillu watangan-Ne sassane su Ruata maola'a sambau sassamba apan nasuungnga. Ṛaṛṛa-Ne mammaresi lal᷊ummu naungngi ite wuassu lal᷊aghun agama apan tawe gunane, tadea'u i ite wotongnge maapangimbe Ruata apan biakka.

¹⁵ Ana waugu udde i Kristus naola'a Pal᷊alawenne su sambau paaire apan wakku, tadea'u taumata apan suete niwagoannu Ruata wotongnge manengkamma manga al᷊amatta awasa apan suete pina'iren Ruata. Sarangkanambone udde wotongnge mariaddi ana waugu piateddu nate, eteudde i Kristus; wuṛṛu papate-Ne udde namallosu manga taumata wuassu manga pasasal᷊a apan niola'i mangitou su tempo pa'aire paarorone ta'e ipappa'atta.

¹⁶ Amungkangu pia suratta pussa'a, ṛinone lai pia tatialane manungku taumata apan na'ola'a suratta udde natete.

¹⁷ Ana waugu suratta pussa'a tawe iapaatta tantal᷊anna taumata apan na'ola'a suratta udde ta'e wiakka. Suratta udde wotongnge ipaatta tumba'u napawe taumata udde natete.

¹⁸ Ana waugu udde paaire paarorone lai ṛinone tohassannu ṛaṛṛa.

¹⁹ Paarorone atonna i Musa namasingkatu anambon titan Ruata su walahannu Israel. Wua'udde i Musa nanganu ṛaṛṛan ana'u sapi wuṛṛu ṛaṛṛang kambinga esakka, see nillo'annu ua'e, wua'udde nialassa su Wuke Manga Titan Ruata wuṛṛu su anambon walahannu Israel ringannu nappaattu nannal᷊o hisop wuṛṛu wambul᷊un domba lihidde ere ate.

²⁰ Lapiddu ma'ola'a udde i Musa nabbisara, “Ete indi ṛaṛṛa apan mannohassa pa'aire wuassu Ruata apan ṛinone tuṛṛutanni yamiu.”

²¹ Wua'udde ringannu inolaanna apan uasul᷊ungnga, i Musa nanebboku ṛaṛṛa udde lai su Rasannu Mawu wuṛṛu su al᷊awo'u sarannapam patataṛṛamawuanna.

²² Atonna tumuṛṛuttu titan agama Yahudi, al᷊awo'u sarannapa a'ukkasannu ṛaṛṛa; wuṛṛu rosa tumba'u wotongnge aampunganna ringannu mapaaturon ṛaṛṛa.

Sasamban Kristus namappasa rosa

²³ Ringannu olangnge ereudde manga sarannapa apan mammasilo manga inolaanna su surga, ṛinone ukkasanna. Arawe su manga inolaanna su surga udde sassane raddeaanna sasamba apan lembon apianne.

²⁴ Ana waugu i Kristus tawe sinumutta su Wabbo'a Susi inolaannu taumata, apan tumba'u hambarannu Wabbo'a Susi apan ṛinone. Mawu Yesus sinumutta sassane su surga; poiaroddi orassa indi i Tou uasaruanna Ruata hunane si ite.

²⁵ Imam wahewan Yahudi suapan tonna sussutta watukku Wabbo'a Lembon Susi sulal᷊ummu Wal᷊e Mawu ringannu uaapiddu ṛaṛṛan sambau winatangnga. Arawe i Kristus tawe sinumutta manantillu watangan-Ne masokka-sokka.

²⁶ Ana waugu amungkangu aroddi, udde atappasanne i Tou masokkate matataṛṛanga ro'en runia indi niriaddi. Arawe wutte'e, orassa indi su tempo apan panginsueanne indi, i Tou nirumanta tumba'u paassa mamappasa rosa ringannu nanantillu wadang-Nge sassane.

²⁷ Ruata suete nanantuna manungku taumata mate tumba'u paassa wuṛṛu wua'udde parikisannu Ruata.

²⁸ Aroddi lai i Kristus tumba'u paassa tinantilla maola'a sasamba ipanubussa rosan anambon taumata. I Tou sarun dumanta apia su aruane, wal᷊ine manginsue hatton paddarosa, arawe manal᷊amatta manga taumata apan uaraṛṛaddo daranta-Ne.