IBRANI 8 - WUKE SUSI WATTI'U AL᷊AL᷊USASSA

Mawu Yesus Imam Wahewang kite

¹ Punnu anambon hatto indi eteudde: I ite uatahuanna Imam Wahewa apan ereudde, apan ua'ianna mammarenta su sambau ringannu Ruata Lembon Ahebal᷊anne su surga.

² I Tou manarane naola'a sangkatou Imam Bahewa su Wabbo'a Lembon Susi, eteudde sulal᷊ummu rasannu Mawu apan tutune, apan niapararisikku Mawu, wal᷊ine niapararisikku taumata.

³ Al᷊awo'u imam bahewa nitenega iapa'onggolu sasamba ara'e aonggola su Ruata. Aroddi lai Imam Bahewang kite; i Tou ṛinone pia dorotongnga olaanna sasamba.

⁴ Unnu wisara i Tou uatana'a su runia indi, i Tou tawe maola'a imam, ana waugu piate imam apan mangapiddu sasamba radoronganna sulal᷊ummu titan agama Yahudi.

⁵ Manara apan a'olaanni mangitou ere sangkatou imam udde, tumba'u sambau hambaranna ara'e lintau wuassu apa apan su surga. Udde suete niapaasingkatu Ruata si Musa rorone, su tempo i Musa ma'apulu mapararisikku Rasannu Mawu. Ruata nabbisara arendi si Musa, “Naunge! Sarangkanambone udde ṛinone olaannu tumuṛṛuttu tul᷊adane apan niapaasilo si'o raso su wowone.”

⁶ Arawe orassa indi Mawu Yesus naasomba manaran imam apan lembon awantuhanne wuassu apan nimmanara manga imam udde. Ana waugu paaire apan niola'a su wallatu Ruata wuṛṛu taumata, eteudde pa'aire apan lembon apianne ana waugu pinangianannu paaire hunane su manga inolaanna apan lembon apianne.

⁷ Unnu wisara tawe auranganne pa'aire apan paarorone, ne salaiwe lasa'e ma'ola'a paaire aruane.

⁸ Arawe Ruata suete naasomba pasasal᷊a su pabbawalage, na'oman sara Ruata nabbisara, “Naunge, sarun dumanta tempone, I Ya'u sarun makkiinnu paaire apan wakku su walahannu Israel, wuṛṛu su walahannu Yehuda.

⁹ Wal᷊ine ere pa'aire apan niola'u Ruata su iupungngu al᷊amona mangitou su tempo i Ya'u mangngehetta si mangitou sumabangnga wuassu leta'u Mesir. I mangitou mal᷊awangnga su pa'aire apan suete Ta'u niola'a ringanni mangitou; ana waugu udde i Ya'u tate mappanduma si mangitou.

¹⁰ Arawe orassa indi, ete indi paaire apan sarun olaangku su walahannu Israel su miallo-miallo apan sarun dumanta unnu Mawu: I Ya'u sarun mantaṛṛon tita-U sulal᷊ummu ṛingiṛṛanni mangitou wuṛṛu iwoṛṛeta su naungngi mangitou. I Ya'u sarun maola'a Ruata mangitou, wuṛṛu i mangitou sarun maola'a pabbawala-U.

¹¹ I mangitou salaiwe lasa'e mangaṛṛa'a hawene lal᷊oṛṛon soa, ara'e mamasingkata tuṛṛangnge, ‘Illal᷊aite Mawu,’ Ana waugu i mangitou sarangkanambone, timmade, dario'a, sarun maa'illal᷊lal᷊a si Ya'u.

¹² I Ya'u sarun mangampunga manga pasasal᷊a mangitou, wuṛṛu tate lai mannaungnga manga rosa mangitou.”

¹³ Ringannu napaasingkattu sambau pa'aire wakku, Ruata na'ola'a pa'aire apan paarorone udde natabbete wuṛṛu nal᷊al᷊eote, wuṛṛu apa apan tabbete sarun mal᷊ihakke mawul᷊i.