IBRANI 5 - WUKE SUSI WATTI'U AL᷊AL᷊USASSA

¹ Suapan imam bahewa nipile wuassu wallatu taumata, wuṛṛu nitenega iapa'imbe Ruata maola'a mangangapiddu tingikki mangitou. Manarane eteudde mangngapiddu manga aonggola su Ruata wuṛṛu sasamba ipangampunga rosa.

² Imam Bahewa udde sassane lome su al᷊awo'u inolaanna wuṛṛu ana waugu udde i tou wotongnge mattingkaola'a masaṛṛionto'a su saruannu taumata apan waggan apa-apa wuṛṛu apan niumal᷊iwun dal᷊anne.

³ Wuṛṛu ana waugu i tou sassane lome, ne i tou ṛinone mangonggolu sasamba, wal᷊ine tumba'u ana waugu rosan taumata, arawe ana waugu rosane lai sassane.

⁴ Tawe saran sangkatou apan mapaatenegu watanganne sassane maola'a imam bahewa. Taumata maola'a imam bahewa, amungkangu Ruata mamago si tou su manara udde – naal᷊ihida ere Harun.

⁵ Aroddi lai Kristus. I Tou tawe napaatenegu watanganne sassane maola'a Imam Bahewa. Ruata nabbisara si Tou, “Ete I'o Ana-U; su allo indi Ya'u maola'a Mawu Iamang-Ngu.”

⁶ Su wageangnge waine Ruata nabbisara lai, “I'o uddewe Imam sara mal᷊annu-l᷊annu, naal᷊ihida Imam Melkisedek.”

⁷ Su tempo Mawu Yesus mabbiakka su runia indi, i Tou u'al᷊iomanna wuṛṛu sussal᷊ande ringannu u'ui wuṛṛu lulluai su Ruata, apan botongnge manal᷊amatta si Tou wuassu papate. Wuṛṛu ana waugu i Tou matuṛṛuta Ruata ringannu napeneng addatta, ne i Tou niraringiṛṛana.

⁸ Mawu Yesus uddewe Ana'u Ruata, arawe salaiwe aroddi, Tou mattingkaola'a matuṛṛuta sulal᷊ummu asasusa-Ne.

⁹ Ne napawe i Tou niola'a mananal᷊amatta apan nasuungnga, i Tou naola'a punnu asasal᷊amatta saran mal᷊annu-l᷊annu hunane su anambon taumata apan matuṛṛuta si Tou,

¹⁰ wuṛṛu Ruata lai napaal᷊iatta'i Tou naola'a sangkatou Imam Bahewa, ere Imam Melkisedek!

Iapaanaungnga

¹¹ Su ola'u a'iannu Mawu Yesus ere sangkatou Imam Bahewa, manambo apan iapaasingkati yami si yamiu, arawe masahadda manal᷊a'an udde, ana waugu i yamiu mal᷊iwue atonna massunna.

¹² Su ṛinone nia'omante tempone si yamiu maola'a huru, arawe wutte'e yamiu ta'e wotonge pangurumma lai su taumata waine su ola'u al᷊aṛṛa'a paarorone wuassu al᷊aṛṛa'u Ruata. I yamiu taambe maasengkamma anna apan maattika; i yamiu tumba'u wotongnge ma'inumma susu.

¹³ Taumata apan ta'e ma'inumma susu, atappasanne i tou ta'e ana'a wakku niasungkanga; i tou taambe asingkatta su ola'u apa apan naṛṛino wuṛṛu apa apan nassal᷊a.

¹⁴ Anna apan maattika udde wuattu taumata timmade ana waugu asingkane, wotongngete maṛṛingidda suapa mapia wuṛṛu suapa apan lal᷊eo.