IBRANI 4 - WUKE SUSI WATTI'U AL᷊AL᷊USASSA

¹ Aroddi pa'aire Mawu ta'e ipappa'atta, wuṛṛu i ite sarun iapaillol᷊o ere suete nipa'ire-Ne. Nariaddi, ṛinone i ite mandiaga tadea'u arie piaddu sangkatou wuassu wallatti yamiu apan tawe maatemma allom pangillol᷊oanna apan suete nipai're udde.

² Ana waugu Watti'u Al᷊al᷊uassa udde suete niapaasingkata si ite ere lai si mangitou. Arawe si mangitou watti'a udde tawe gunane. Ana waugu su tempo i mangitou naaringikka, i mangitou tawe mangngimanna.

³ Arawe i ite apan mangngimanna manengkamma pangangillol᷊o apan suete nipa'iren Ruata udde. Udde uasul᷊unga ringannu apa apan suete niwal᷊on Ruata, arendi, “I Ya'u nasa'u wuṛṛu nassalu, ‘I mangitou sarun tawe maasutta wuṛṛu maasomba pangillol᷊oanna su sambau ringang-Ku.’ ” Ruata nabbisara aroddi salaiwe manara-Ne nasuete ro'en i Tou nandiadi runia indi.

⁴ Ana waugu su ola'u allo appitune, pia uawoṛṛetta sulal᷊ummu Wuke Susi arendi, “Su allo appitune Ruata nangillol᷊o wuassu anambon manara-Ne.”

⁵ Su olangnge udde lai niwoṛṛeta arendi, “I mangitou sarun tawe maasutta su wanua udde see maasomba pangillol᷊oanna su sambau ringang-Ku.”

⁶ Nariaddi i mangitou apan paarorone atonna naaringikka watti'a su ola'u Watti'u Al᷊al᷊uassa udde, tawe maasengkamma pangangillol᷊o udde ana waugu i mangitou tawe mangngimanna. Amungkangu aroddi natualage manungku pia manga taumata waine apan botonge maasengkamma pangangillol᷊o udde.

⁷ Ana waugu Ruata suete nanantunu sambau allo apan baine lai, apan isassago “Allo Indi”. Manga pira tonna wua'udde Ruata nabbisara su olangnge udde sulal᷊ummi Daud, su addoanne apan ere niwoṛṛetta tanginna, “Amungkangu su allo indi yamiu maaringikka tingikku Ruata, imbaṛṛanga i yamiu tawe maddaringikka.”

⁸ Amungkangu unnu wisara Yosua suete nangonggola su manga taumata udde pangangillol᷊o apan pina'iren Ruata, ne Ruata tate mabbisara apia su ola'u allo waine.

⁹ Nariaddi, su walahannu Ruata ta'e pia pa'aire pangangillol᷊o ere lai Ruata nangillol᷊o su allo appitune udde.

¹⁰ Ana waugu taumata apan nanengkamma pangangillol᷊o apan nipa'iren Ruata si tou udde, sarun mangillol᷊o lai wuassu anambon manarane, ere lai Ruata.

¹¹ Ana waugu udde, wette i ite maddea'a ringannu atonna-tonna ana see maasengkamma allom pangangillol᷊oanna apan suete nipa'iren Ruata udde. Arie pia sangkatou wuassi ite tawe maasomba ere i mangitou rorone, ana waugu tawe mangngimanna Ruata.

¹² Wisaran Ruata eteudde wisara apan biakka wuṛṛu matohassa; maṛṛoroanna wuassu hal᷊el᷊e rorone ruam ba'a. Wisara udde uusippa ma'oman sara su wallatu niawa wuṛṛu ghaṛṛaho; ma'oman sara su wallattu manga passi'uanna wuṛṛu duṛṛin liudda, na'oman sara maasingkata al᷊al᷊ummu ṛingiranna wuṛṛu apulu naungngu taumata.

¹³ Taweddu sambau riadianna apan uawuni su aellegu Ruata. Al᷊awo'u sarannapa uatantol᷊e wuṛṛu wawu'anna su saruan-Ne. Wuṛṛu i ite sarun mangonggolu sasimbakka si Tou.

Mawu Yesus Imam Bahewa lembon mawantuga

¹⁴ Ana waugu udde i ite ṛinone uaaggasa matohassa su panga'uannu pangangimanni ite. Ana waugu i ite uatahuanna Imam Bahewa lembon mawantuga, apan suete sinumutta na'oma su saruannu Ruata – eteudde Yesus Kristus Ana'u Ruata.

¹⁵ Imam Bahewalli ite udde wal᷊inewe imam apan tawe maapendama manga al᷊allomeng kite. Arawe i Tou suete niwono'anna sulal᷊ummu al᷊awo'u inolaanna, ere i ite lai sassane; tumba'u i Tou tawe na'ola'a rosa!

¹⁶ Ana waugu udde, wette i ite ringannu awawaṛṛani sumaruanna Ruata apan mammarenta ringannu naungnge mapia. Ruata sarun umakkana wuṛṛu mangal᷊amatta si ite tadea'u i ite maasomba tul᷊unganna maṛṛino su tempone.