IBRANI 2 - WUKE SUSI WATTI'U AL᷊AL᷊USASSA

Asasal᷊amatta apan bahewalla

¹ Ana waugu udde i ite ṛinone lembon mangaggasa atonna-tonna manga al᷊aṛṛa'a apan suete niaringiṛṛani ite, tadea'u i ite tawe manantangngu pangangimanni ite.

² Manga tanata apan niapaasingkatu mala'ekatta su iupungngi ite udde nasemakke atonna, wuṛṛu taumata apan tawe tumuṛṛutta ara'e ma'ola'a, sarun manengkamma ṛuumanna apan uasul᷊ungngu pallal᷊agune.

³ Apa lai ringannu asasal᷊amatta apan maggewal᷊anne wuassu manga tanata udde! Amungkangu i ite tawe mangngimanna su asasal᷊amatta udde, i ite sarun tawe mal᷊iu wuassu ṛuumanna. Ana waugu ete Mawu sassane apan paarorone namasingkattu asasal᷊amatta udde, wuṛṛu manga taumata apan paarorone naaringikka suete napaatualagu atatul᷊iddu watti'a udde si ite.

⁴ Su liuddu udde, Ruata mannohassa tatiala manga taumata udde ringannu na'ola'a al᷊awo'u hatin al᷊aṛṛindu'a wuṛṛu manga inolaanna apan bahewalla see lai nattahia manga aonggolu Ghaṛṛahon Ruata tumuṛṛuttu apulu-Ne sassane.

Wawu'a lal᷊anna su taumata iapaasal᷊amatta

⁵ Manga mala'ekatta tawe naasomba taṛṛino wuassu Ruata ipamarenta runia wakku apan sarun dumanta, eteudde runia apan tantal᷊anna ipagahatong kite indi.

⁶ Arawe su sambau wageangnge sulal᷊ummu Wuke Susi uawoṛṛetta arendi, “Apate taumata udde, o Ruata, na'oman sara I'o sidutu uanaungnga si tou? Taumata tumba'u taumata, arawe I'o sidutu mappadul᷊i si mangitou!

⁷ Su tempo apan mal᷊ihakka I'o mandiaddi si tou mabbawoanna adio'a wuassu mala'ekatta. I'o nangonggolu ai'ananna si tou apan mawantuga wuṛṛu lembon a'addatanna.

⁸ See lai na'ola'a si tou tembonannu sarangkanambone.” Ne, amungkangu iwisara manungku Ruata nandiaddi taumata “tembonannu sarangkanambone”, udde atappasanne manungku tawe saran sambau apan tawe su al᷊ungngu taṛṛinon taumata. Salaiwe aroddi, i ite orassa indi tawe maasilo taumata uataṛṛino sarangkanambone.

⁹ Arawe i ite suete naasilo Mawu Yesus uataṛṛino! I Tou niwawo adio'a wuassu mala'ekatta tumba'u tal᷊ang kadio'a, tadea'u su apapia naungngu Ruata i Tou wotonge mate ana waugu anambon taumata. I ite ma'ellega i Tou orassa indi nionggol᷊annu aiananna apan mawantuga wuṛṛu lembon aaddatanna, ana waugu i Tou suete natataṛṛanga na'oman sara nate.

¹⁰ Atonna su ṛinonete Ruata – apan nandiaddi ul᷊ilimpati'uppa ringannu panduman-Ne sassane – nandiaddi Mawu Yesus mananal᷊amatta apan nasuungnga sulal᷊ummu asasusa. Ringannu aroddi Ruata wotongnge mangahe taumata nambo iapawantuga suadio'a ringannu Mawu Yesus. Ana waugu ete i Tou mamamu'a lal᷊anna si mangitou tadea'u wotongnge iapaasal᷊amatta.

¹¹ Mawu Yesus namaresi taumata wuassu manga rosa mangitou; wuṛṛu i Tou apan namaresi udde; see i mangitou apan niwaresi udde, uatahuanna Mawu Iamangnga sambau. Ana waugu udde Mawu Yesus tawe masili manga'u si mangitou maola'a manga tuṛṛang-Nge.

¹² Mawu Yesus nabbisara su Ruata, “I Ya'u sarun mamasingkata su manga tuṛṛang-Ku su olang-Ngu udde. I Ya'u sarun maddalo Si'o sulal᷊ummu ammul᷊anni mangitou.”

¹³ Mawu Yesus nabbisara lai, “I Ya'u sarun mangantimma Ruata.” Wuṛṛu i Tou nabbisara lai, “Indiwe i Ya'u, su sambau ringannu al᷊aṛṛana'a apan suete nionggolu Ruata si Ya'u.”

¹⁴ Ana waugu manga taumata apan nisaggon i Tou ana'a udde, eteudde sangkatou taumata apan wotonge mate, ne Mawu Yesus sassane naola'a uasul᷊ungngi mangitou wuṛṛu mabbiakka sulal᷊ummu ola'u taumata. I Tou na'ola'a aroddi, tadea'u ringannu papate-Ne i Tou wotongnge maṛṛimunsa'a Setanna apan uataṛṛino papate.

¹⁵ Ringannu olange aroddi i Tou namallosu manga taumata apan su al᷊o'engngu pabbiaṛṛane naola'a allangnga ana waugu matta'uttu papate.

¹⁶ Nilumiatta'e manungku wal᷊ine mala'ekatta apan nitul᷊ungi Tou, ewe'e papapuluni Abraham.

¹⁷ Indi atappasanne manungku i Tou ṛinone maola'a uasul᷊unga ringannu manga tuṛṛa-Nge sulal᷊ummu al᷊awo'a. Wuṛṛu ringannu udde i Tou wotongnge maola'a Imam Wahewa apan matuṛṛuta wuṛṛu marangngu. Ringannu manara-Ne udde rosan taumata wotongnge aampunganna.

¹⁸ Wuṛṛu ana waugu i Tou sassane suete natataṛṛanga wuṛṛu niwono'anna, i Tou naapattul᷊ungu manga taumata apan niaṛṛiaannu wawono'a, ana waugu i Tou sassane suete niwono'anna wuṛṛu natataṛṛanga.