IBRANI 13 - WUKE SUSI WATTI'U AL᷊AL᷊USASSA

Ereapa mapaal᷊uassu naungngu Ruata

¹ Ṛinone i yamiu sidutu mandangngu sangkatou ringannu waine ere sansul᷊ungngu manga taumatan Saṛṛani apan uasasangkatuṛṛanga.

² Arie humago'a mapaatana'a su wal᷊enu manga taumata apan ta'e awagananni yamiu. Ana waugu ringannu ma'ola'a aroddi, piate taumata, ringannu tawe niatutukka suete napaatana'u mala'ekatta su wal᷊ene.

³ Naunge'o manga taumata sulal᷊ummu tuttupanna, paṛṛimau napa i yamiu lai isudde sulal᷊ummu tuttupanna su sambau ringanni mangitou. Wuṛṛu manga taumata apan a'olaanna walate apulu naungnga, ṛinone i yamiu mannaungnga si mangitou paṛṛimau napa i yamiu lai a'olaanna aroddi.

⁴ Anambon taumata ṛinone mamasilon addatta su pa'a'awingnga, ana waugu udde ṛinone sangkawinganna warararingikka sangkatou ringannu waine. Taumata apan lal᷊eo wuṛṛu taumata masandaga sarun parikisannu Ruata.

⁵ Imbaṛṛanga wiakku paparentannu awawal᷊iun roitta, arawe ṛinone i yamiu mal᷊uassa ringannu saranapa apan tatahuananni yamiu. Ana waugu Ruata suete nabbisara, “I Ya'u tawe mapaawalanu ara'e manantangi yamiu.”

⁶ Ana waugu udde i ite waṛṛani mabbisara, “Eteudde Mawu Matatul᷊ungku, i ya'u tawe matta'utta. Apa apan wotongnge olaannu taumata su saruangku?”

⁷ Imbaṛṛanga maabul᷊i manga piaṛṛangu apan namasingkatu tanatan Ruata si yamiu. Paaellehe ereapa i mangitou mabbiakka wuṛṛu ereapa i mangitou mate, wuṛṛu tannoite pangangimanni mangitou.

⁸ Yesus Kristus uasul᷊ungnga, mapia rorone, orassa indi, wuṛṛu saran mal᷊annu-l᷊annu.

⁹ Imbaṛṛanga mapaawalan al᷊awo'u hatin al᷊aṛṛa'a apan ma'aheranga apan mangal᷊iwung kamiu. Naungngi ite ṛinone tohasannu apapia naungngu Ruata, eteudde apan mapia; imbaṛṛanga ringannu manga atoranna su ola'u anna. Manga taumatan tiwatta apan matuṛṛuta su manga atoranna udde tawe naasomba hunane.

¹⁰ I ite uatahuanna sambau tampan sasamba pangonggol᷊annu sasamba su Ruata. Wuṛṛu manga imam apan mangngimbe si Tou sulal᷊ummu Rasannu Mawu, tawe su ṛinone umanna sasamba apan uaraddo su wowon tampan sasamba udde.

¹¹ Ṛaṛṛam binatangnga apan suete nionggolla maola'a sambau sasamba tatubbusa rosa, niapiddu imam bahewa watukku Wabbo'a Lembon Susi, arawe wadangu winatangnga udde sassane tutunganna su liuddu paddasananna.

¹² Ana waugu udde Mawu Yesus nate lai su liuddu ngara pasalangannu Soa tadea'u mamaresi al᷊aṛṛanang-Nge wuassu rosa ringannu daṛṛa-Ne sassane.

¹³ Ana waugu udde, wette i ite inai ringanni Tou su liuddu padasananna wuṛṛu mamendama aal᷊uandaga suadio'a ringanni Tou.

¹⁴ Ana waugu su runia, i ite tawe tampa atatanaanna apan mal᷊annu; i ite maddea'a tampa atatanaanna apan sarun dumanta.

¹⁵ Ana waugu udde, ringannu tatangngannu Mawu Yesus, ṛinone i ite sidutu maddalo Ruata; udde maola'a sambau aonggolu a'adiangkamanni ite si Tou, apan nionggoli ite ringannu wisaram wiwikka ipaddalo aran-Ne.

¹⁶ Arie ma'abul᷊i ma'ola'a apapia wuṛṛu uatatul᷊ungnga, ana waugu eteindi manga sasamba apan ma'al᷊uassa naungngu Ruata.

¹⁷ Paatuṛṛute parenta manga piaṛṛangu, wuṛṛu paasallunga si mangitou. Ana waugu i mangitou sidutu maṛṛingiddu niawanu, wuṛṛu i mangitou ṛinone sumimbakka ola'i yamiu su Ruata. Amungkangu i yamiu matuṛṛuta si mangitou, i mangitou wotongnge mammanara ringannu naungnga mal᷊uassa; amungkangu tawe, ne i mangitou sarun mammanara ringannu naungnga susa, wuṛṛu udde tawe maauntunga si yamiu.

¹⁸ Sidutua'e umal᷊iomanni yami. I yami mangngimanna lal᷊ummu naungngi yami waresi, ana waugu sulal᷊ummu al᷊awo'u manara, i yami sidutu ma'apulu ma'ola'a apa su ṛinone.

¹⁹ Nangilembo i ya'u sumal᷊ande, tadea'u yamiu umal᷊iomangku tadea'u Ruata ringannu mal᷊ihakka mangapi'u mabelengnga ringanni yamiu.

Aal᷊iomanna pangudusanne

²⁰ Ruata suete napaawiakku Mawung kite Yesus Kristus wuassu papate. Ana waugu papate-Ne udde i Tou orassa indi naola'a Mallal᷊u'adda Mawantuga si ite, eteudde manga dombane. Papate-Ne udde lai mannohassa pa'aire apan tawe pangudusanne apan niola'u Ruata ringanni ite.

²¹ Antimanna Ruata punnu paddarame udde manuungngi yamiu ringannu al᷊awo'u apapia apan pappandumanni yamiu ipa'ola'a apulu-Ne. Antimanna ringannu tatangngannu Mawu Yesus i Kristus, Ruata mammanara sulal᷊ummu naungngi ite, apa apan ipaapulu-Ne. Ṛinone Kristus raloanna saran mal᷊annu-l᷊annu! Amin.

Pangudusannu Suratta

²² I ya'u sumal᷊ande tadea'u i yamiu tumuṛṛutta manga tatantiro'u indi ringannu masabare, ana waugu sura'u indi tawe tumaniten mal᷊o'e.

²³ Ṛinone i yamiu masingkata manungku tuṛṛangi ite i Timotius nipallose wuassu tuttupanna. Amungkangu i tou na'omate su tampa'u indi, ya'u sarun mangapiddi tou su tempo i ya'u mattembo si yamiu.

²⁴ Wal᷊oa tabeang kami su anambon piaṛṛangu wuṛṛu su anambon walahannu Ruata. Sengkama lai tabea wuassu manga tuṛṛanga su Italia.

²⁵ Doronganna Ruata mangal᷊amatta manga tuṛṛanga sarangkanambone.