IBRANI 1 - WUKE SUSI WATTI'U AL᷊AL᷊USASSA

Ruata nabbisara sulal᷊ummu Anang-Nge

¹ Su tempo rorone Ruata masokka uahahatton iupungngi ite sulal᷊ummu manga nabine ringannu mappaattu anambon dal᷊anna.

² Arawe su tempo panginsueanne indi Tou uahahattong kite sulal᷊ummu Anang-Nge. Sulal᷊ummu Anang-Nge indi Ruata nandiaddi ul᷊ilim pati'uppa. Wuṛṛu Ruata suete nanantuna lai manungku ete Anang-Nge indi apan manahuanna al᷊awo'u sarangkanambone.

³ Ete i Tou apan napaatualagu awawantugu Ruata apan lullendapa; ete i Tou hambarana apan masemakka wuassu wadangu Ruata sassane. Ete i Tou lai apan mammadul᷊i pa'a'aukku ul᷊ilim pati'uppa indi ringannu ṛengetan-Ne apan lembon mataṛṛino. Napawe i Tou suete namalan taumata nipallosa wuassu manga rosa mangitou, i Tou inuma'ianna su adderan araratuanna su surga su sambau ringannu Ruata, tembonanne apan atanggaṛṛanne.

Awawantugu Ana'u Ruata

⁴ Ana'a udde naasombate aianan-Ne apan lembon atanggaṛṛanne wuassu mala'ekatta, wuṛṛu aranna apan nionggolu Ruata si Tou lai lembon awantuhanne wuassu aranna apan nionggolla su mala'ekatta.

⁵ Taambe saran paassa Ruata nabbisara arendi su sangkatou mala'ekatta, “Ete I'o Ana'u; su allo indi Ya'u maola'a Iamangngu.” Taambe saran paassa lai Ruata nabbisara arendi su ola'u manga mala'ekatta, su al᷊awo'u tampa, “I Ya'u sarun maola'a Iamangnge, wuṛṛu i tou sarun maola'a Ana-U.”

⁶ Arawe su tempo Ruata nandolokku Anang-Nge pahul᷊u watukku runia indi, Ruata nabbisara arendi, “Anambon mala'ekattu Ruata ṛinone massuba Ana'a udde.”

⁷ Su ola'u manga mala'ekatta udde, Ruata nabbisara arendi, “Ruata nandiaddi manga mala'ekan-Ne nabbal᷊i anginna, wuṛṛu manga allang-Nge nabbal᷊i ṛenggamu putungnga.”

⁸ Arawe su Ana'a udde, Ruata nabbisara, “Adderan araratuannu, oh Mawu, sarun ma'oman sara mal᷊annu-l᷊annu! Araratuannu udde araratuanna apan matul᷊ida.

⁹ I'o ma'apulun atatul᷊idda, wuṛṛu maddantinu awawengkola; ana waugu uddewe Ruata, Ruata-Nu namile Si'o, wuṛṛu nangonggolu awawantuga Si'o apan mandantan al᷊al᷊uassa, nilumambalanna wuassu manga hawe-Nu.”

¹⁰ Ruata lai nabbisara, “I'o, Mawu, apan su al᷊amonane nandiaddi runia, wuṛṛu I'o sassane nandiaddi langitta.

¹¹ Sarangkanambone udde sarun mawul᷊i, wuṛṛu mabbal᷊i tabbe ere laubba; arawe I'o sarun tawe mawal᷊i.

¹² Ul᷊ilim pati'uppa indi sarun lappuan-Nu ere laubba, wuṛṛu sarun hantia-Nu ringannu waine. Arawe I'o saran paassa tawe mawal᷊u, wuṛṛu wiak-Ku tawe pangudusanne.”

¹³ Tawe saran paassa Ruata nabbisara arendi su saran sangkatou mala'ekatta, “Aiana'e su samba'a uanang-Ku, ma'oman sara manga seennu Ta'u iapaasubba Si'o.”

¹⁴ Amungkangu aroddi, manga mala'ekatta udde apa i mangitou? Ete i mangitou udde manga ghaṛṛaho apan mangngimbe Ruata, wuṛṛu apan iradolokku Ruata iapaatul᷊ungngu manga taumata apan sarun manengkamma asasal᷊amatta.