HOSEA 9 - WUKE SUSI WATTI'U AL᷊AL᷊USASSA

Ṛuumanna su Israel nial᷊iata

¹ Ei walahannu Israel, ariete mallaghu apia mangan rameanu ere manga walahanna waine. I yamiu buatte nanantangngu Ruatanu wuṛṛu tawe satia si Tou. Suapan paṛṛindanna gandumma, i yamiu mabbalu'u watangannu maola'a sumasandaga su Mongannu Baal, wuṛṛu mal᷊uassa manengkamma gandumma apan sassunnanni mangitou lal᷊antakke apan nionggollu monganna udde si yamiu!

² Arawe tate mal᷊annu lai i yamiu sarun atalannu gandumma see lanan zaitun, wuṛṛu anggore lai sarun masue.

³ I yamiu, ei walahannu Israel, tawe sidutu uatana'a su leta'a apan niongonggollu Mawu si yamiu. I yamiu ṛinone mabbelengnga su Mesir, wuṛṛu ṛinone umanna anna ipapapalli su Asyur.

⁴ Su manga wanua udde i yamiu tawe mapangonggollu sasamba anggore ara'e winatangnga ipalluassa naungngu Mawu. Pabbawiakku sarun maaola'a suapan taumata apan umanna mabbal᷊i marosa, ere anna apan aannananna su lal᷊aghun pallal᷊abbingnga. Anna udde tumba'u pia gunane ipallaidda tiannu; saran addio'a tawe iapidda su Wal᷊en Mawu maola'a sasamba poiaroddi.

⁵ Su manga allo wahewallu agama ipangaddatta Mawu, i yamiu sarun tawe ma'ola'a apa-apa ipallaghun allo udde.

⁶ Amungkangngu asasilaka na'omate, wuṛṛu i yamiu niapidda su wanua waine, ne apan matantangnga suwallatti yamiu sarun iammullu manga taumatan Mesir tadea'u pateanna wuṛṛu ilabbingnga su Memfis! Nannal᷊o wuṛṛu rongnga sarun tumuwo manaappa manga tampa lanna'u wal᷊enu wuṛṛu manga saranapanu wuassu sal᷊a'a apan maarega.

⁷ Nia'omante pallaṛṛuumanna, tempo ipanengkamma wawal᷊issa wuassu al᷊awo'u inolaanna. Israel sarun mamendamma udde! I yamiu mabbisara, “Nabi apan tataṛṛinoannu ghaṛṛaho indi longonna! Nabbewate ito!” I yamiu mabbisara aroddi ana waugu i yamiu mabbinsi atonna si ya'u wuṛṛu rosanu tumaniten wahewalla.

⁸ Ruata nandolo'u maola'a nabi tadea'u mapaanaungnga si yamiu uman-Ne, arawe watukku apa i ya'u inai, i yamiu maddea'a manongnga si ya'u ere manu'u winalanganna. Su wanua pussa'an Duata sassane, i yamiu manga nabi ipasseettu tumanangnge.

⁹ Tumaniten dal᷊eo inolaannu ere buatte niola'u tamata su Gibea Ruata sarun mannaungnga pasasal᷊anu, wuṛṛu makkuumanni yamiu ana waugu rosanu.

Rosan Israel wuṛṛu pangillul᷊eanne

¹⁰ Mawu mabbisara, “Sutempo i Ya'u paarorone naasangkalla Israel, i Ya'u lalluassa ere taumata naasangkalla wuan anggore su wadda'a mamara. Sutempo i Ya'u paarorone naasilo al᷊amonanu, i Ya'u lulluassa naal᷊ihidda taumata naalio hessi wuan ara paarororne. Arawe, napawe i mangitou inaite watukku Wowon Peor, i mangitou mannattakke massubba si Baal, na'oman sara i mangitou nabbal᷊i nal᷊al᷊eo ere monganna apan raddangnguanni mangitou udde.

¹¹ Awawantugu Israel sarun tumalla'a mawuli ere manu'u winalanganna; tatedau lai apan sarun pia illoṛṛo, wuṛṛu taweddu manga ana'a apan iasungkangnga.

¹² Arawe salaiwe pia al᷊aṛṛana'a apan niasungkangnga wuṛṛu niwuwunna, i mangitou sarun Ta'u al᷊apanna, tawe saran sangkatou apan Ta'u iwala wiakka. Nasilakate i yamiu, ei walahannu Israel, napawe i Ya'u manantangken kamiu!”

¹³ Mawu, i ya'u naasilo al᷊aṛṛana'i mangitou a'enggenanna wuṛṛu nipate.

¹⁴ Apate apan ṛinone ta'u doronganna Si'o hunan manga taumata udde? Ola'ewe manga wawinen mangitou tinna! Ola'e tadea'u i mangitou tawe mappasusun ana'a maraddio'a!

Mawu nakkuumannu Israel

¹⁵ Mawu nabbisara, “Anambon al᷊al᷊eon mangitou nanattakka su Gilgal. Ete isudde i Ya'u nanattakke maddantinni mangitou. Ana waugu inolaanni mangitou apan dal᷊eo, i Ya'u sarun mallimbuakka si mangitou wuassu wanua-U indi. I Ya'u tate umakkanni mangitou apia, anambon piaṛṛa'i mangitou buatte nilumawangnga si Ya'u.

¹⁶ Taumatan Israel sarun Ta'u iṛṛuummanna. I mangitou sarun mabbal᷊i ere sasuanna apan tawe mabbua, wuṛṛu manga ṛamunne naṛṛangute. I mangitou sarun tawe maasomba ana'a; arawe salaiwe i mangitou uatahuanna ana'a, sarun Ta'u pateanna al᷊aṛṛana'a apan arangnguanni mangitou udde.”

Nabi nabbisara su ola'u Israel

¹⁷ Ruata apan ta'u a'imbeanna udde sarun manol᷊a'u uman-Ne, ana waugu i mangitou maddiri maddaringikka si Tou. I mangitou sarun lumallele suwallattu manga walahanna.