HOSEA 3 - WUKE SUSI WATTI'U AL᷊AL᷊USASSA

I Hosea wuṛṛu awingnge apan mal᷊awangnga

¹ Mawu nabbisara si ya'u, “Roote apia wuṛṛu pandangngute sangkatou wawine apan apulune sussandaga. Pandangngute si tou ere lai i Ya'u mandangngu sangkatou Israel salaiwe i mangitou nanantang-Ku wuṛṛu massubba manga paaluanna waine see lai apulune mangonggollu kukisse kismis su monganna.”

² Ne i Ya'u mamaekka mapul᷊o l᷊ima roitta sal᷊a'a wuṛṛu 150 su kilone gandumma tadea'u maasomba wawine udde.

³ I ya'u nabbisara si tou manungku i tou ṛinone maṛṛaddo si ya'u sutempone apan mal᷊annu. Su al᷊annune udde i tou imbaṛṛangnga i tou sumandaga ara'e ma'ola'a al᷊al᷊eo, wuṛṛu i ya'u lai tawe mangundanin tou.

⁴ Etearoddi olangnge ringannu walahannu Israel; mal᷊annu atonna i mangitou mbbiakka ringannu tawe ratu ara'e piaṛṛa'a, tawe sasamba ara'e manga pale sassubbanna, tawe manga monganna ara'e manga laṛṛopa apan mamasingkattu addapingngu allo addantane.

⁵ Arawe sarun dumanta tempone walahannu Israel mabbelengnga ringannu Mawu Ruatan mangitou, wuṛṛu ringannu ratun mangitou wuassu papapulunni Daud. Ana see i mangitou sarun mata'utta wuṛṛu mangadatta Mawu, see manengkamma manga al᷊aman-Ne.