HOSEA 2 - WUKE SUSI WATTI'U AL᷊AL᷊USASSA

¹ Ana waugu udde waggoite sansul᷊ungngu ringannu aranna “Umattu Ruata” wuṛṛu “Niakkannu Mawu.”

Gomer apan tawe satia naola'a lal᷊addin Israel

² Mawu nabbisara, “Ei manga ana-U, inangngu wal᷊ine awing-Ku, wuṛṛu i Ya'u wal᷊ine awingnge. Ana waugu udde, hattoa'e i tou tadea'u i tou tate ma'ionolaanna lal᷊eo wuṛṛu sumandaga apia.

³ Amungkangngu i tou sidutu sussandaga, i Ya'u sarun malluatta laungnge tadea'u i tou matantol᷊e ere lai sutempo i tou siasungkangnga. Sarun Ta'u olaanna i tou ere leta'a mamara wuṛṛu maṛṛasa, ne i tou sarun mate amarouanna.

⁴ I yamiu, al᷊aṛṛanangnge, sarun tawe Ta'u iakkanna, i yamiu niasungkangnga wuassu passasandaga.

⁵ Inangngu sumasandaga apan tawe masili. I tou mabbisara, ‘I Ya'u sarun inai ringannu manga arangnguangku apan mangngonggolla si ya'u anna wuṛṛu ua'e, wol wuṛṛu linen, lanan zaitun wuṛṛu anggore.’

⁶ Ana waugu udde, i Ya'u sarun maṛṛimputta si tou ringannu aputta ṛoaanna, wuṛṛu maṛṛapingnga lal᷊anne ringannu tanda'a meselle.

⁷ I tou sarun mangenggenna arangnguanne, arawe sarun tawe ma'oma ringanni mangitou. I tou sarun maddea'a si mangitou, arawe tawe maasangkalla si mangitou. Wua'udde i tou sarun mabbisara, ‘I ya'u sarun mabbelengnga ringannu awingku paarorone; dorone lal᷊umanna'u mappianne wuassu orassa indi.’

⁸ Inangngu taambe saran paassa manga'u manungku ete i Ya'u apan manggolla si tou gandumma, anggore, lanan zaitun, wuṛṛu al᷊awo'u wul᷊awanna sal᷊a'a apan ipappaanne ipassubba Baal udde.

⁹ Ana waugu udde, sutempon mangitingnga i Ya'u sarun mangul᷊e apia aonggo-U, eteudde gandumma wuṛṛu anggore, see wol wuṛṛu linen apan Ta'u nionggolla si tou maola'a laungnge.

¹⁰ Sarun Ta'u tantol᷊eanna i tou su saruannu anambon apulune. Tawe saran sangkatou wuassi mangitou wotongnge maapallossi tou wuassu taṛṛino-U.

¹¹ Al᷊awo'u andeangnge sarun Ta'u iapaaddo, mawae andeangngu tonna aroddi lai andeangngu wul᷊anna wuṛṛu manga allon Sabat; aune, al᷊awo'u andeangngu pangangagamane.

¹² I Ya'u sarun mapaate manga punnu anggore wuṛṛu manga alu ara apan tumuṛṛutti tou uddewe lal᷊antakku pangangimbene su manga arangnguanne. Sarun Ta'u wal᷊uanna manga waillu anggore wuṛṛu manga waillu ara mabbal᷊i mahurangnge; manga winatangnga mal᷊aṛṛaga sarun manggohakka.

¹³ I Ya'u sarun makkuumanni tou ana waugu manga allo apan nipaanne ipannambunnu amania si Baal, see nandiahi ringannu lal᷊ogakke tadea'u ipangenggenna manga arangnguanne, ana see i Ya'u mangke niabual᷊iananna atonna. I Ya'u, Mawu, buatte nabbisara.”

Mawu niumakkannu uman-Ne

¹⁴ Mawu nabbisara, “Ana waugu udde i Ya'u sarun mangapiddi tou watukku wadda'a; poiaroddi i tou sarun Ta'u isalo'a ringannu manga wisaran paapulu.

¹⁵ Manga waillu anggorene sarun Ta'u iul᷊e apia si tou, wuṛṛu Wawal᷊annu Asasusa sarun Ta'u olaanna ngaran pangangantimma. Poiaroddi i tou sarum manal᷊oho si Ya'u ere sutempo i tou ta'e saṛṛen tumuwo, sutempo i tou wakkute sinumabbangnga wuassu Mesir.

¹⁶ Ana see i tou managgo-U awingnge, wuṛṛu wal᷊ine Baal apan sassubbanni tou.

¹⁷ I Ya'u sarun tate mamalan tou managgon aranni Baal apia, ma'oman sara aranna udde sarun timbul᷊ianannu taumata.

¹⁸ Sutempo udde i Ya'u sarunma'ola'a paaire ringannu al᷊awo'u hatin binatangnga tadea'u i mangitou tate manal᷊asa'u uma-U. I Ya'u sarun mapaaddon al᷊awo'u pangalo wuṛṛu manahangginna manga ahiddu pangalo wuassu wanuan uma-U udde, wuṛṛu ma'ola'a si mangitou mabbiakka ringannu mal᷊angnganna wuṛṛu matammudda.

¹⁹ Israel, i'o sarun Ta'u olaanna awing-Ku, awingnga apan ṛinone saran mal᷊annu-l᷊annu. I'o sarun Ta'u iaakkanna wuṛṛu arangnguanna sidutu; i Ya'u sarun ma'ola'a pallal᷊agu matul᷊idda wuṛṛu satia.

²⁰ Ere buatte pina'ire-U, i'o sarun Ta'u iawingnga. I'o sarun manga'u mangungku i Ya'u maola'a Mawunu sassane.

^21-22 Sutempo udde napawe uma-U Israel umaliomanna, i Ya'u sarun maddaringikka si mangitou. Wuassu langitta i Ya'u sarun mapangansallu uranna ma'oman sara runia mapahessin gandumma, anggore wuṛṛu lanan zaitun. Wuassu laingitta i Ya'u sarun mapaansallu uranna ma'oman sara runia mapaahessin gandumma, anggore wuṛṛu lanan zaitun.

²³ Sarun Ta'u olaanna uma-U mabbiakka su lal᷊umanna'a wuṛṛu mamanua su wanuan mangitou. Si mangitou apan isassago ‘Apan Tawe Niakkanna’ sarun Ta'u iapaal᷊iatta'a manungku i mangitou Ta'u arangnguanna, wuṛṛu si mangitou apan isassago ‘Wal᷊ine Uma-U’ sarun Ta'u iwal᷊o, ‘I yamiu Uma-U’. I mangitou sarun sumimbakka arendi, ‘Ete I'o Ruatan kami.’ ”