HOSEA 13 - WUKE SUSI WATTI'U AL᷊AL᷊USASSA

Inaappuanna panginsueanne su ola'u ṛuumanna su Israel

¹ Dorone ṛuanganni Efraim aaddatanna na'oman sara napawe pia parenta wuassu ṛuanganna udde, manga ṛuanganna waine su Israel matta'utta. Arawe ṛuanganni Efraim na'ola'a rosa ana waugu massubba si Baal, ana waugu udde i tou sarun namuli.

² Naddatingngu orassa indi manga taumatan Efraim udde ta'e sidutu ma'ola'a rosa; i mangitou mallanginnu manga paal᷊uanna sal᷊a'a tadea'u subbanna – paal᷊uanna apan niṛṛiinnu ṛingirannu taumata wuṛṛu nilanginnu liman taumata. I mangitou nabbisaram, “Pangongollen sasamba su manga paal᷊uanna indi!” Maaherangnga, taumata mangngari'a paal᷊uanna ana'u sapi!

³ Ana waugu udde manga taumata udde sarun mawual᷊i ere ṛawu'a ara'e angngukka su marua allo. I mangitou sarun maola'a ere awu raen amme apan nitiuppu anginna su paṛṛindanna gandumma, wuṛṛu ere timbulla apan sinumabbangnga wuassu sasabbangannu timbulla.

⁴ Mawu nabbisara, “Ete i Ya'u Mawu Ruatanu, apan nagapiddi yamiu sinumabbangnga wuassu Mesir. I yamiu tawe uatahuanna Ruata waine tumba'u i Ya'u. Ete i Ya'u sassane apan nanal᷊amatta si yamiu.

⁵ Su leta'a maṛṛasa su wadda'a mamara, ete i Ya'u apan nallu'adda si yamiu.

⁶ Arawe napawe i yamiu uatane'e su wanua apan mapia, wuṛṛu i yamiu nal᷊aidda see naapendamma mal᷊uassa, i yamiu nabbal᷊i mawunga see naabuli-U.

⁷ Ana waugu udde i Ya'u sarun manametta si yamiu ere singa. Naal᷊ihidda macan tutul i Ya'u sarun mangampangnga si yamiu su lal᷊anna.

⁸ I Ya'u sarun mamangalo si yamiu ere beruang apan niawul᷊iannau manga anangnge. I Ya'u sarun manggaissa si yamiu. Naal᷊ihidda singa i Ya'u sarun tumambo si yamiu su tampanu, wuṛṛu naal᷊ihidda winatangnga malaṛṛaga i Ya'u mangke manggesa'a si yamiu.

⁹ I Ya'u sarun makkimunsa'a si yamiu, ei walahannu Israel! Wuṛṛu isaite apan wotongnge mangontolla si yamiu?

¹⁰ I yamiu maddorongnga ratu wuṛṛu piaṛṛa'a, arawe suapate i mangitou sarangkanambone orassa indi? Wotongngewe i mangitou manal᷊amatta tumanangngu?

¹¹ Ringannu nasa'u i Ya'u nangonggollu ratu si yamiu, wuṛṛu ringannu maṛṛagissa i Ya'u nangul᷊e si mangitou apia.”

¹² Mawu nabbisara, “Rosa wuṛṛu pasasal᷊an Israel buatte niwoṛṛetta wuṛṛu buke wawoṛṛetannu aranne buatte nisahipunna.

¹³ Israel uatahuanna tempo ipabbiakka, arawe i tou aroddi awoddone na'oman sara tawe nappaattu tempone udde. I tou naal᷊ihidda ana'a addio'a apan tate mal᷊annu lai masungkangnga arawe maddiri sumabbangnga wuassu illoṛṛon inangngene.

¹⁴ Walahanna indi sarun tawe Ta'u iapasal᷊amatta wuassu taṛṛinon runian taumata nate. Ei papate, paasabbarea'e raddangngu! Amata'e manaranu apan maaṛṛimunsa'a udde! I Ya'u sarun umakkannu walahanna indi apia.

¹⁵ Salaiwe Israel mabbiakka sulal᷊umanna'a ere nannal᷊o apan masuwukka, arawe i Ya'u sarun mandolokku anginna ra'i apan mal᷊oso wuassu wadda'a mamara. Anginna udde sarun mapamanaran anambon al᷊imatan kua'e wuṛṛu manga paṛṛihi, ma'oman sara mawul᷊ite sarangkanambone apan maarega.