HOSEA 12 - WUKE SUSI WATTI'U AL᷊AL᷊USASSA

Israel wuṛṛu Yehuda niṛṛuumanna

¹ Mawu nabbisara, “Walahannu Israel uapal᷊iwutta si Ya'u ringannu awusu wuṛṛu wawahia; walahannu Yehuda sidutu lullawangnge si Ya'u, Ruata Apan Susi wuṛṛu satia.

² Al᷊awo'u saranapa apan niola'u taumatan Israel wuassu marua allo maddatingngu ṛabbi tawe gunane wuṛṛu olangnge maahohakka ere anginna ra'i. Pallal᷊inga wuṛṛu araṛṛagissa aatambanna suwallatti mangitou. I mangitou ma'ola'a manga paaire ringannu Asyur wuṛṛu nangapiddu lana watukku Mesir maola'a tatialan paggahahawe.”

³ Mawu uatahuanna hatto ringannu walahannu Yehuda; i Tou lai sarun makkuumannu Israel ana waugu pallal᷊aghun mangitou. I Tou sarun mabbal᷊issa inolaanni mangitou.

⁴ Ro'en ta'e sulal᷊ummu illoṛṛo, Yakub al᷊amonan mangitou buatte nallinga si Esau tuṛṛangnge ṛindua; wuṛṛu napawe timmadete, Yakub nallaṛṛawa'u Ruata.

⁵ I tou nallaṛṛawa'u ringannu sangkatou mala'ekatta, wuṛṛu i tou naauntungnga. Wua'udde i tou nilumuai wuṛṛu naddorongnga al᷊amatanna. Wua'udde su Betel, Ruata nirumanta ringanni Yakub al᷊amonan kite udde, wuṛṛu naggahatton tou.

⁶ Ruata udde eteudde Mawu Apan Lembon Taṛṛino. Aran-Ne eteudde Mawu. Ete ringannu aranna udde i Tou mappandumma taumata mattaṛṛamawu si Tou.

⁷ Ana waugu udde, ei i yamiu papapulunni Yakub, pangimante Ruatanu wuṛṛu pabbelengke ringanni Tou. Pabbiakke ringannu napenen darangngu wuṛṛu atatul᷊idda, wuṛṛu paṛṛaddote ringannu sabare ma'oman sara Ruatanu mammanara.

Inaappuanne manansunna su ola'u ṛuumannu Israel

⁸ Mawu nabbisara su walahannu Israel, “I yamiu mallinga ere taumatan Kanaan; manga maddaragangnga apulune mammahia mamamalline ringannu timbanganna apan tawe su ṛinone.

⁹ ‘I ite orassa indi ala,’ unni mangitou. ‘I ite naantungnga! Tawe saran sangkatou apan wotongnge mangansilla manungku i ite naasomba paa'ala udde ringannu olangnge mallinga.’

¹⁰ Arawe i Ya'u, Mawu Ruatanu, apan nangapiddi yamiu sinumabbangnga wuassu Mesir, sarun ma'ola'a si yamiu matana'a apia su manga rasanna ere dorone sutempo i Ya'u nirumanta ringanni yamiu su wadda'a mamara.

¹¹ I Ya'u buatte, nabbisara su manga nabi, wuṛṛu nangongollu manambo sondappa si mangitou. Wuassi mangitou i Ya'u namasingkattu manga ṛiing-Ku hunan kamiu, uma-U,

¹² salaiwe aroddi ta'e piaddu massubba paal᷊uanna su Gilead, wuṛṛu mangongollu sasamba sapi su wowon mezbah su Gilgal. Arawe i mangitou apan massubba paal᷊uanna udde sarun mate, wuṛṛu manga mezbah su Gilgal udde sarun maola'a ombon batu su manga wawail᷊anna.”

¹³ Yakub al᷊amonan kite tinumal᷊angnga watukku Mesopotamia, ana see tadea'u maasomba awingnga, i tou nattaṛṛuallanga su taumata poiaroddi wuṛṛu mallu'adda manga domban taumata udde.

¹⁴ Mawu nandolokku sangkatou nabi iapaapiddu taumatan Israel su mabbangnga wuassu patataṛṛuallanga su Mesir, wuṛṛu tadea'u mallu'adda si mangitou.

¹⁵ Taumatan Israel buatte naaola'a Mawu mangke nasa'u atonna; i mangitou ṛinone iṛṛuummanna ana waugu al᷊al᷊eon mangitou. Mawu sarun makkuumanni mangitou ana waugu i mangitou buatte naaola'a taumata nallobbossa si Tou.