HOSEA 11 - WUKE SUSI WATTI'U AL᷊AL᷊USASSA

Mawu niumakkannu uman-Ne apan dal᷊eo

¹ Mawu nabbisara, “I Ya'u u'akkannu Israel ro'en i tou ta'e addio'a, Ta'u niwaggoanna ana-U udde sinumabbangnga wuassu Mesir.

² Arawe lembon Ta'u wabbagoang ana-Ku udde i tou lembon mangnginda-U lai. I tou nangapiddu sasamba wuṛṛu mannambunnu amania hunan Baal wuṛṛu manga mongana waine.

³ Sumbal᷊i ete i Ya'u apan nangaṛṛa'a Israel niumamatta, wuṛṛu apan nangooppa ringannu napenen darangngu. Ete i Ya'u apan namaddul᷊i si tou arawe i tou maddiri manga'u udde.

⁴ Ringannu al᷊awo'u darangngu-U, i Tou Ta'u niundani ringang-Ku. Al᷊awo'u asasusane Ta'u niapaṛṛanna, wuṛṛu ringannu awawawon naungngi tou Ta'u nionggol᷊annu anna.

⁵ Manga taumatan Israel udde maddiri mabbelengnga apia ringang-Ku, ana waugu ude i mangitou ṛonone mabbelenga watukku Mesir, wuṛṛu walahannu Asyur sarun mamarenta si mangitou.

⁶ Pangalo sarun maddisikka maddatingngu sara lal᷊ummu manga soan mangitou, manga ngara mal᷊oangnga sarun ihohakka, wuṛṛu uma-U pateanna. Udde nariaddi ana waugu i mangitou tuttuṛṛuta apulune sassane,

⁷ wuṛṛu mangke mappulu manantang-Ku. Ne i mangitou sarun allanganna, arawe taweddu mamallossi manitou salaiwe i mangitou mangngintul᷊i ma'iontolla.”

⁸ Mawu nabbisara, “Ei Israel, tawe mariaddi i'o Ta'u iwala ara'e Ta'u itantangnga. Wotongngewe i'o Ta'u ṛimunsaanna ere Adma? Ara'e Ta'u olaanna ere Zeboim? Tawe maola'a naung-Ku mapaammattu olangnge udde, ana waugu darangngu-U tumaniten bahewalla si yamiu!

⁹ I'o sarun tawe Ta'u iṛṛuumanna sulal᷊ummu asasa-U; i'o tate Ta'u ṛimunsaanna apia. Ana waugu ete i Ya'u Ruata, wal᷊ine taumata. I Ya'u, Apan Susi, uarundinganna si'o, wuṛṛu maddirite lai masa'u si'o.”

¹⁰ Mawu nabbisara, “Uma-U sarun tumantalongnga si Ya'u napawe i Ya'u mamiṛṛinganna ere singa wuṛṛu mammata'utta seetti mangitou. Uma-U sarun masasaṛṛawutta rumanta wuassu samba'a waṛṛatta tadea'u massubba si Ya'u.

¹¹ Wuassu Mesir i mangitou sarun dumanta ere al᷊ihakku manu'u winalanganna, wuṛṛu wuassu Asyur Tau iapidda mabbelengnga watukku wal᷊en mangitou. I Ya'u, Mawu, apan nabbisara.”