HAGAI 1 - WUKE SUSI WATTI'U AL᷊AL᷊USASSA

Parentan Mawu tadea'u mamangunna apia Wal᷊e

¹ Su tonna aruane i Ratu Darius uaparenta su Persia, su allo paarorone wul᷊ana iaannumme, Mawu nabbisara ringannu nappaatti Nabi Hagai. Tanatan Mawu udde iwuna'a si Zerubabel ana'i Sealtiel, gubernuren Yehuda, wuṛṛu su Imam Bahewa Yosua ana'i Yozadak.

² Mawu Apan Lembontaṛṛino nabbisara si Hagai, “Walahanna indi mabbisara manungku taambe tempone ipamangunna apia Wal᷊e-U.”

³ Wua'udde ringannu nappaatti Nabi Hagai, Mawu nabbisara su uman-Ne,

⁴ “Ei uma-Ku, apa temponate i yamiu matana'a sulal᷊ummu wal᷊en apan matohassa wuṛṛu ma'uatta, ewe'e Wal᷊e-U ta'e ere manga tuidda?

⁵ Annama'e, panutukka olangngu!

⁶ I yamiu buatte nangasi'u manambo wualanna, arawe pangitingannu addio'a. I yamiu pia anna, arawe tawe mattiudda ipallaidda tiannu. I yamiu uatahuanna anggore, arawe tawe maawusaingnga naungngu. I yamiu uatahuanna laubba, arawe tawe mapanal᷊ihangnga waddangngu. Wuṛṛu lal᷊antakka apan nitarimmatu manga lal᷊ebbone tawe mattiudda ipanampa'a pabbiaṛṛanni mangitou.

⁷ Taambe maatutukka lai i yamiu, anio olangnge udde mariaddi?

⁸ Orassa indi, saate watukku manga wuidda pangal᷊appa alu, wua'udde ola'e Wal᷊e-U; ne i Ya'u sarun maapendamma al᷊al᷊uassa wuṛṛu i Ya'u sarun subbanna apia ringannu olangnge apan suṛṛinone. Annama'e, panutukka olangngu!

⁹ I yamiu mangngantimma wuan pangitinganna apan nangillembo, wutte'e apan niasombanganni yamiu tumba'u addio'a atonna; i yamiu nangapidda mapul᷊e, arawe wuan pangitingannu udde Ta'u nitiuppa, na'oman sara nasue niapiddu anginna. Anio Ta'u niola'a udde? Sasimbakke eteudde; Ana waugu Wal᷊e-U ta'e ere manga tuidda, arawe i yamiu sarangkanambone maṛṛimadda mabbangunna wal᷊enu sambau-sambau.

¹⁰ Ana waugu udde uranna mangke tawe mangansalla na'oman sara tawe sasuanna apan wotongnge maatuwo.

¹¹ I Ya'u buatte nandantan paddissa su leta'a wuṛṛu manga wuidda, su manga wawail᷊annu gandumma wuṛṛu manga wawail᷊annu anggore see su manga wawail᷊annu zaitun, wuṛṛu su manga sasuanna su leta'a indi, ewe'e lai su taumata wuṛṛu winatangnga see al᷊awo'u pinitanna apan a'olaanni yamiu.”

Umattu Israel tinumuṛṛutta parentan Mawu

¹² Wua'udde Zerubabel wuṛṛu Yosua see anambon umattu Israel buatte nabbelengnga wuassu pamamuanganna su Babel, tinumuṛṛutta manga wisaran Hagai, daroloṛṛannu Mawu udde. I mangitou tinumuṛṛuttaapa apan buatte niparentan Mawu si mangitou, ana waugu matta'uttu Mawu.

¹³ Wua'udde Hagai namasingkatta su tumanangnge tanatan Mawu manungku Mawu buatte naddiandi sarun mallu'adda si mangitou.

¹⁴ Etearoddi Mawu nangal᷊oren naungngu Gubernure Zerubabel, Imam Bahewa Yosua see anambon taumata apan buatte nabbelengnga wuassu pamamuanganna, tadea'u i mangitou sarangkanambone mammanara mabbangunna Wal᷊en Mawu Apan Lembontaṛṛino, Ruatan mangitou.

¹⁵ I mangitou nanattakke mammanara su allo ruan pul᷊o appatta, wul᷊anna aiannumme sulal᷊ummu tonna aruane sutempo i Ratu Darius uaparenta.