HABAKUK 3 - WUKE SUSI WATTI'U AL᷊AL᷊USASSA

Aal᷊iomanni Habakuk

¹ Eteindi aal᷊iomanni Nabi Habakuk:

² I ya'u naaringikka su ola'u inolaan-Nu, ne apendamma mal᷊angnganna namene naungku. Antimanna inolaanna wahewalla udde isule-Nu apia wuṛṛu iapal᷊iattang-Ngu sutempon kami indi. Ṛinone I'o umakkanni yami salaiwe naung-Ngu mal᷊oso.

³ I'o Ruata Apan Lembonsusi nirumanta wuassu Teman, I'o nirumanta wuassu panenteannu Paran. Langitta aoosannu awawantu-Gu; runia napenen daralo Si'o.

⁴ I'o nirumanta ringannu semakka lullansiangnga, wuassu lima-Nu sinumabbangnga semakka lullansiangnga, ete isudde taṛṛino-Nu niwuni-Nu.

⁵ I'o nandolokku radda'a u'amatta su saruan-Nu wuṛṛu papate uatantalongnga su liddu Mawu.

⁶ Napawe I'o mattaalla, runia umio'a; napawe I'o ma'ellega, manga walahanna mangindo. Manga wowone apan mal᷊annute mangke napapesangnga; manga wuidda apan al᷊annuanne lai nattingkawawo, ete su manga wuidda udde I'o u'amatta ro'en tempo dorone.

⁷ I ya'u naasilo tumana'u Kusyan niarṛṛiaannu atata'utta, wuṛṛu taumatan Midian mangngiladda.

⁸ Oh Mawu, ana wauge ete tahal᷊oangnga I'o nasa'u? Ete manga sal᷊ukka apan naaola'a Si'o mandona? I'o sinuma'e winabbawa naola'a awal᷊o wuṛṛu keretan pangalo, sutempo uman-Nu nionggol᷊a-Nu auntunganna.

⁹ Darangean-Nu buatte niriahi-Nu, anaan-Nu nasaddiate ipallossa. Ana see runia niwaa-Nu naola'a manga sal᷊ukka.

¹⁰ Naasilo Si'o, manga wowone niumio'a wuassu langitta sinumossokka uranna ere nilal᷊inna. Ua'e sulal᷊ummu lete'a maddallu'a tingikke, luangnge wahahewalla wuṛṛu mabbasse.

¹¹ Semakku manga anaan-Nu tuttalla'a mal᷊ihakka, sambeang-Ngu lullendappa massawallo, ne matannallo wuṛṛu wul᷊anna nattaalle su tampane.

¹² Ringannu mammasaga I'o mammal᷊intadu runia; manga walahanna ringannu niṛṛinda-Nu ana waugu al᷊al᷊oson naungnga.

¹³ I'o inaite niumamatta tadea'u mamallossu uman-Nu wuṛṛu tadea'u manal᷊amatta ratu apan nipile-Nu. I'o namuulla na'oman sara nanawo piaṛṛa'u taumata lal᷊eo I'o nanginsue anambon mallal᷊aṛṛenggene.

¹⁴ Manga anaan-Nu nallapasa su piaṛṛa'u tantaran seetta sutempo tantarane nirumanta ere atohassu anginna al᷊isusu, tadea'u i yami isal᷊iawukka. I mangitou lullage ringannu lulluassa naal᷊ihidda taumata ringannu mal᷊anna-l᷊annabba mangngallanga taumata apan asiangnga.

¹⁵ Ringannu awal᷊o-Nu I'o maṛṛinda laudda wuṛṛu tahal᷊oangnga apan mawira lullupa.

¹⁶ Naaringikka udde, naungku mangngiladda wuṛṛu wiwi'u mangngindo. I ya'u nabbal᷊i lome tate ikkata, ledda'u mattara, suapa i ya'u umamatta. I ya'u sarun maṛṛaddo ringannu matammudda ṛuumannu Ruata su taumata mammangalo.

¹⁷ Salaiwe alu ara tawe buane, wuṛṛu punnu anggore tawe anggorene, salaiwe pangangitingngu zaitun naasomba angngone wuṛṛu hessin gandumma su wawail᷊anna maadio'a naungnga, salaiwe manga domba nate abbi wuṛṛu tanda'u winatangnga papadul᷊iananna tawe loṛṛone,

¹⁸ i ya'u sidutu lulluassa, ana waugu I'o Mawu Ruata mananal᷊ama'u.

¹⁹ I'o nangonggollu atatohassa si ya'u ere leddan rusa, ledda'u nitohan-Nu. I'o mangngehetta si ya'u tadea'u matammudda sutempo umamatta su panenteanna.