GALATIA 4 - WUKE SUSI WATTI'U AL᷊AL᷊USASSA

^1-2 Arawe ṛinone ta'u ital᷊a'a ringannu masemakka, tantal᷊anna sangkatou mallol᷊ossa pussa'an iamangnge uukke ta'e mamawo, pia taumata apan ual᷊u'adda si tou wuṛṛu mammadul᷊i si tou ma'oman sara iamangnge wotongnge manantilu pussa'a udde si tou. I tou a'olaanna naola'a ere allangnga salaiwe ṛinone i tou uatahuannu anambon darotongnge udde.

³ Aroddi lai i ite: Tantal᷊anna i ite taambe natimmade, i ite mattaṛṛuallangnga manga ghaṛṛaho apan uaparenta runia indi.

⁴ Arawe napawe su temponete, Ruata mandolokku Anang-Nge su Runia. Anang-Nge udde niasungkanga wuassu sangkatou wawine wuṛṛu mabbiakka su al᷊ungngu parentan titan agama.

⁵ Ringannu aroddi i Tou namallosu manga taumata apan mabbiakka su al᷊ungngu parentan titan agama; tadea'u i ite lai wotongnge maola'a al᷊aṛṛana'u Ruata.

⁶ Ana waugu ete i yamiu udde al᷊aṛṛana'u Ruata, Ruata nandolokku Ghaṛṛahon Anang-Nge sinumutta sulal᷊ummu naungngu wuṛṛu naungku, eteudde Ghaṛṛaho apan mabbisara, “Iamangnga, oh Iamangku.”

⁷ Nariaddi, yamiu wal᷊ine lai allangnga, ewe'e ana'a. Wuṛṛu ana waugu i yamiu ana'u Ruata, ne Ruata sarun mangonggola si yamiu al᷊awo'u sarannapa apan buatte nisaddia-Ne su manga al᷊aṛṛanang-Nge.

Asasinggawangngi Paulus su manga taumatan Galatia

⁸ Dorone i yamiu tawe maaillal᷊a Ruata, ana waugu udde i yamiu naola'a allangngu manga taṛṛino apan iraṛṛangngo ere mawu, arawe ṛinone wal᷊ine Ruata.

⁹ Arawe orassa indi yamiu maaillal᷊a Ruata, ara'e mappianne lai isaggo, Ruata maaillal᷊a si yamiu. Ne anio i yamiu maapulu mabelengnga apia su manga ghaṛṛahon dunia indi, apan lome wuṛṛu asiangnga? Anio i yamiu ta'e maapulu mai'allangnga apia su manga ghaṛṛaho udde?

¹⁰ I yamiu mallaghu manga allo, manga wul᷊anna, wuṛṛu manga tonna apan suete nitantunna.

¹¹ I ya'u sussinggawangnga, aṛṛengenne asasaha'u indi si yamiu tawe gunane.

¹² Manga tuṛṛangnga! I ya'u sumal᷊ande si yamiu tadea'u i yamiu maola'a ere i ya'u. Ana waugu i ya'u lai suete naola'a ere i yamiu. I yamiu tawe na'ola'a pasasal᷊a su saruangku.

¹³ Asinungka i yamiu ta'e maanaungnga apa apan naa'ola'a si ya'u paarorone namasingkatu Watti'u Al᷊al᷊uassa udde si yamiu. Panattaṛṛanne ana waugu i ya'u nirumadda'a.

¹⁴ Su tempo udde i yamiu maddintingku, salaiwe wadangku naola'a ere wawono'a apan wahewalla si yamiu. Ewe'e i yamiu mannarimma'u ere lai nanarimmatu mala'ekattu Ruata ara'e ere manarimmatta si Kristus Yesus sassane.

¹⁵ I yamiu lulluassa atonna su tempo udde. Arawe orassa indi, suapate al᷊al᷊uassa udde? I ya'u masingkata manungku su tempo udde i yamiu maapulu mallasso'a matan kamiu sassane wuṛṛu ionggola si ya'u, amungkangngu udde wotongnge olaanna.

¹⁶ Apa i yamiu orassa indi massunna si ya'u ere seetta, ana waugu i ya'u mabatti'u apapia si yamiu?

¹⁷ Manga taumata waine udde ringannu maṛṛimada maddea'a si yamiu, arawe manga pandumanni mangitou lal᷊eo. I mangitou tumba'u maapulu mapatal᷊eing kamiu wua dingani yami, tadea'u i yamiu tumantalongnga si mangitou ringannu maṛṛimada.

¹⁸ Atonna mapia amungkangngu maṛṛimada su anambon inolaanna apan mapia, sambal᷊iate sidutu aroddi wuṛṛu arie tumba'u amungkangngu i ya'u su sambau ringanni yamiu.

¹⁹ Manga al᷊aṛṛana'u arangnguanna! I ya'u orassa indi uatataṛṛanga lai ana waugu i yamiu. I ya'u uatataṛṛanga ere sangkatou inangnga apan uatataṛṛanga su tempo mangunsiwe. I ya'u sidutu sarun matataṛṛanga, amungkangu pallal᷊agun Kristus taambe nusippa su wadangu!

²⁰ I ya'u mal᷊utu atonna matana'a su sambau su wallatti yamiu orassa indi, tadea'u i ya'u wotongnge maggahatto ringanni yamiu ringannu tingikka apan paṛṛalane, ana waugu i ya'u wagga sarun ma'ola'a apa lai ringanni yamiu!

Hagar wuṛṛu Sara maola'a tul᷊ada

²¹ Manga tuṛṛangnga apan maapulu mabbiakka su al᷊ungngu parenta manga titan agama, paddaringikka si ya'u! I ya'u sarun mamasingkata si yamiu apa apan su ṛinone uawoṛṛetta sulal᷊ummu Wuke Titan Musa.

²² Isudde uawoṛṛetta manungku Abraham pia duan katou ana'a: Inangngu ana'a sangkatou udde sangkatou allangnga, wuṛṛu inangngu ana'a waine udde sangkatou wal᷊ine allangnga.

²³ Ana'a wuassu wawine apan naola'a allangnga, niasungkanga ere inanaramanne ana waugu i tou wuassu apalun taumata. Arawe wuassu wawine wal᷊ine allangnga, niasungkanga ana waugu pina'iren Duata.

²⁴ Indi wotongnge ipaatta maola'a sambau sasumandinga. Ruan katou wawine udde, paṛṛimaunnapa darua paaire: sambau wuassu Wowon Sinai – eteudde Hagar; al᷊aṛṛanangnge niasungkanga maola'a allangnga.

²⁵ Nariaddi, eteudde Hagar Wowon Sinai, su leta'u Arab. I tou pinanumandingannu Soa Yerusalem wuṛṛu anambon tumanangnge apan orassa indi ta'e naola'a allangnga.

²⁶ Arawe Yerusalem apan su surga eteudde Yerusalem wal᷊ine allangnga, wuṛṛu eteudde inangngi ite.

²⁷ Ana waugu sulal᷊ummu Wuke Susi uawoṛṛetta, “Paal᷊al᷊uasse i'o wawine tinna, apan tawe saran paassa nangunsiwe! Lallala'e wuṛṛu paggiote i'o apan saran paassa tawe namendama taddu'a mangngunsiwe! Ana waugu wawine apan tinantangu awingnge sarun maasomba ana'a lembon anamboanne wuassu wawine apan mabbiakka ringannu awingnge.”

²⁸ Manga tuṛṛangnga! Eteudde i yamiu sassane al᷊aṛṛana'u Ruata apan niasungkanga ana waugu paairen Duata; i yamiu udde uasul᷊ungngi Ishak.

²⁹ Su tempo udde ana'a apan niasungkanga tumuṛṛuttu apulun taumata, mammate ana'a apan niasungkanga ana waugu apulun Ghaṛṛahon Duata. Aroddi lai orassa indi.

³⁰ Arawe apa apan uawoṛṛetta sulal᷊ummu Wuke Susi? Isudde uawoṛṛetta arendi: “Limbuaṛṛete allangnga wawine udde su sambau ringannu anangnge, ana waugu ana'a wuassu allangnga wawine udde tawe uatahuanna su sambau ringannu ana'a wuassu wal᷊ine allangnga udde.”

³¹ Nariaddi, manga tuṛṛangnga, i ite indi wal᷊inewe al᷊aṛṛana'a wuassu sangkatou allangnga wawine; eteudde i ite manga ana'a wuassu wawine apan wal᷊ine allangnga.