FILIPI 4 - WUKE SUSI WATTI'U AL᷊AL᷊USASSA

Manga tatantiro

¹ Ana waugu udde, manga tuṛṛangku apan arangnguanna, aroddite ṛinone i yamiu mabbiakka ringannu atonna-tonna mangngimanna Mawu. Naungku maapulu maisasomban kamiu! Ete i yamiu ipaapulu'u apan maal᷊uassa naungku.

² Tuṛṛangku wawine Euodia wuṛṛu tuṛṛangku Sintike! I ya'u maddorongnga suapan wotongnge iradua naungnge sambau ere manga taumata apan pangangimanne lai sambau.

³ Su hawe'u apan matuṛṛuta, i ya'u madorongnga lai tadea'u tuṛṛanga massumbala wawine darua udde. I mangitou suete nammanara maṛṛimadda ringangku mabatti'u Watti'u Al᷊al᷊uassa wuassu Ruata; ere lai Klemen wuṛṛu anambon taumata waine apan mammanara suadio'a ringangku. Manga aranni mangitou uawoṛṛetta sulal᷊ummu Wuken Taumata Wiakka.

⁴ Antimanna i yamiu sidutu lulluassa ana waugu i yamiu suete nabbiakka su sambau ringannu Mawu. Paassa lai ya'u mabbisara: lalluasse!

⁵ Ṛinone anambon taumata wotongnge maasilo pallal᷊agu naungngu apan mapia. Ana waugu tate mal᷊annu lai Mawu sarun dumanta.

⁶ Arie paasinggawanga su ola'u manga apa. Sulal᷊ummu al᷊awo'u inolaanna, aal᷊iomante wuṛṛu paddorongke su Ruata. Apa apan ipaapulun kamiu, wal᷊oa'e udde sidutu su Ruata ringannu wisara aadiangkamanna.

⁷ Ne paddarame wuassu Ruata apan tawe asunnannu taumata, sarun mallu'adda naungngu wuṛṛu ṛingiṛṛannu apan suete naaukka ringanni Kristus Yesus.

⁸ Panginsueanne, manga tuṛṛangnga, loṛṛoite ṛingiṛṛannu ringannu inolaanna apan mapia, apan wotongnge raloanna, eteudde inolaanna apan naṛṛino, maaddata, apan matul᷊ida, waresi, masaṛṛionto'a, wuṛṛu mapia.

⁹ Ola'e apa apan a'urumanna wuṛṛu asengkamani yamiu wuassi ya'u: mawae wuassu manga wisara ara'e lai wuassu manga inolaangku. Ruata punnu paddarame, sarun mangal᷊amatta si yamiu.

Wisara aadiangkamanna

¹⁰ Sulal᷊ummu wia'u apan uaaukka ringannu Mawu, i ya'u naapendamma lal᷊umanna'a wahewa, ana waugu aroddite al᷊annune, orassa indi yamiu pia tempone lai maṛṛingiddu wadangku. Pandumangku wal᷊inewe manungku i yamiu naabul᷊i'ute; atonna i yamiu uanaungnga si ya'u, arawe i yamiu tawe maasomba tempone mapaal᷊iatta'u aakkanne.

¹¹ I ya'u namasingkatu indi wal᷊inewe ana waugu i ya'u awussa, ana waugu i ya'u suete nangurumma al᷊aṛṛa'a mammendamma nasuungnga ringannu apa apan piate.

¹² I ya'u suete namendamma mabbiakka asiangnga, wuṛṛu mabbiakka su asasuungnga. I ya'u naaillal᷊ate addapingnge, ereapa sumaruana olange apan aroddi aral᷊eone; mawae su tempo mal᷊uassa ara'e lai su tempo susa, mawae su tempo ala ara'e lai su tempo asiangnga.

¹³ Ringannu taṛṛino apan nionggoli Kristus si ya'u, i ya'u pia atatohassa sumaruanna al᷊awo'u asasusa sarangkanambone.

¹⁴ Arawe i yamiu suete nantul᷊ungku sulal᷊ummu asasusa'u; wuṛṛu apa apan niola'i yamiu udde atonna wuṛṛu mapia.

¹⁵ Manga tuṛṛangnga taumatan Filipi! I yamiu sassane masingkata atonna manungku su tempo i ya'u nanantangngu Makedonia rorone, su tempo Watti'u Al᷊al᷊uassa udde niapasingkata paarorone, ete i yamiu sambau jamaatta apan nallal᷊ima si ya'u; i yamiu apan namendamma auntunganna wuṛṛu araruggi su sambau ringangku.

¹⁶ Su tempo i ya'u su Tesalonika wuṛṛu mappandumma sasumbala, nilumebete wuassu paassa i yamiu nandohon sasumbala si ya'u.

¹⁷ Udde wal᷊ine i ya'u tumba'u maapulu manengkamma aonggola. Apa apan ipaapulu'u eteudde, tadea'u i ya'u wotongnge maasilo manga pabbawuan manaranu apan maatamba auntungannu.

¹⁸ I ya'u suete nanengkamma sarangkanambone – ewe'e nilumebete lai! Anambon aonggolla apan nirohon kamiu si ya'u, suete nitarimmata wuassi Epafroditus. Orassa indi ya'u uatahuanna anambon apa apan pappandumangku. Manga aonggola wuassi yamiu eteudde maola'a sambau sasamba hal᷊urune mawangngi apan nionggole su Ruata wuṛṛu nisengkammu Ruata ringannu naungnga mal᷊uassa.

¹⁹ Ruata apan sassubbangku, apan napenen paa'ala sulal᷊ummi Kristus Yesus, sarun manuungngu hausannu.

²⁰ Dalo su Ruata Iamangngi ite saran mal᷊annu-l᷊annu! Amin.

Tabea panginsueanne

²¹ Wal᷊oa'a tabea'u su anambon al᷊aṛṛana'u Ruata apan ua'aukka ringanni Kristus Yesus. Wuṛṛu sengkamma lai tabea wuassu manga tuṛṛanga apan suaddio'a ringangku isindi.

²² Anambon walahannu Ruata su soa indi, nengilembote i mangitou apan wuassu wal᷊en araratuanni Kaisar, nandohon tabea si yamiu.

²³ Doronganna Mawu Yesus Kristus mangal᷊amatta tuṛṛanga sarangkanambone. Tabea wuassi yami, Paulus wuṛṛu Timotius