FILIPI 2 - WUKE SUSI WATTI'U AL᷊AL᷊USASSA

Asasaṛṛionto'a wuṛṛu awawantugi Kristus

¹ I yamiu matohassa, ana waugu i yamiu uaaukka ringanni Kristus. Wuṛṛu i yamiu nial᷊iwuṛṛana ana waugu Kristus mandangngu si yamiu! I yamiu aehetannu Ghaṛṛahon Duata, wuṛṛu i yamiu lai uararangngu wuṛṛu uasasumbala sangkatou ringannu waine.

² Ne, annama'a i yamiu atonna-tonna mapaal᷊uassu naungku ringannu manga inolaanna indi: Pabbiakke ringannu naungnga sambau, ringannu darangngu apan uasul᷊ungnga, ringannu ṛingiranna apan uasul᷊ungnga wuṛṛu tudda apan uasul᷊ungnga.

³ Arie ma'ola'a sambau inolaanna hunane su watangannu sassane, ara'e ipamarabunga. Arawe ṛinone i yamiu sangkatou-sangkatou ringannu masaṛṛionto'a ma'ellega taumata waine mappianne wuassu watangannu sassane.

⁴ Paaellehe aurangannu taumata waine; arie tumba'u aurangannu watangannu sassane.

⁵ Ṛinone i yamiu pia apendamma ere Yesus Kristus:

⁶ Su pinangiananne i Tou nassul᷊ungngu Ruata, arawe i Tou tawe mamendamma manungku olang-Nge ere Mawu udde ṛinone matatana'a aroddi si Tou.

⁷ Arawe, i Tou namallosu sarangkanambone see naola'a ere sangkatou allangnga. I Tou naola'a ere taumata, wuṛṛu aasiloanna mabbiakka ere taumata.

⁸ I Tou napaawawon watangan-Ne, wuṛṛu mabbiakka ringannu matuṛṛuta su Ruata na'oman sara nate – eteudde nate niarussa.

⁹ Ana waugu udde Ruata namengketa si Tou, su atanggaṛṛanne see nangonggolu taṛṛino si Tou apan ahewal᷊anne wuassu al᷊awo'u taṛṛino apan waine.

¹⁰ Ne, tadea'u ipangadatta Mawu Yesus, anambon riadianna su surga, wuṛṛu su runia, see lai su al᷊ungngu runia sarun massubba si Tou.

¹¹ I mangitou sarangkanambone sarun manga'u manungku ete Yesus Kristus udde Mawu; ringannu aroddi Ruata Iamangnga wantuhanna.

Lullansiangnga ere semakka apan mannemakka runia

¹² Ana waugu udde, manga tuṛṛangnga apan arangnguanna, su ereapa i yamiu sidutu matuṛṛuta si ya'u su tempo i ya'u uatana'a su pattangnganni yamiu, ne nangillembo orassa indi su tempo i ite mararaute, ṛinone i yamiu sidutu tuttuṛṛuta si ya'u. I yamiu suete nisal᷊amattu Ruata, nariaddi sidutu pammanarate tadea'u paddaramenu maola'a masuungnga. Ola'e udde ringannu addata wuṛṛu tatuṛṛuta su Ruata,

¹³ ana waugu Ruata sassane apan mammanara sulal᷊ummu ririnu ipa'ola'a si yamiu mawala wuṛṛu wotongnge maal᷊uassa naungngu Ruata.

¹⁴ Manarate al᷊awo'u manara ringannu tawe sumungkuta ara'e matatiakka.

^15-16 Ringannu aroddi yamiu mapaal᷊iatta'a manungku eteudde i yamiu al᷊aṛṛana'u Ruata apan tawe angngone, mabbiakka ringannu matul᷊ida wuṛṛu naṛṛino su pattangnganu taumata lal᷊eo wuṛṛu marosa. Wuṛṛu su tempo i yamiu namasingkata si mangitou watti'a apan mangngonggolu wiakka, ṛinone i yamiu maola'a ere semakka apan lullansiangnga mannemakka runia. Amungkangu i yamiu mabbiakka ereudde, ne i ya'u pia pangiananne maapendamma al᷊al᷊uassa su ola'i yamiu su tempo Mawu Yesus rumanta apia. Udde maola'a tatialane manungku manara'u pia gunane wuṛṛu pia gessine.

¹⁷ Asinungka i ya'u sarun pateanna wuṛṛu ṛaṛṛa'u maola'a ere sambau sasamba manampal᷊iu wuassu sasamban kamiu su Ruata maola'a sambau tatiala manungku i yamiu mangngimanna si Tou. Amungkangu udde atonna ṛinone maola'a aroddi, ya'u maadiangkamanna su olangnge udde wuṛṛu lulluassa suaddio'a ringanni yamiu.

¹⁸ Aroddi lai ṛinone i yamiu mammendama al᷊al᷊uassa wuṛṛu lullala'a suaddio'a ringangku.

Timotius wuṛṛu Epafroditus

¹⁹ I ya'u mangngimanna manungku ringannu tul᷊ungannu Mawu Yesus, i ya'u ringannu mal᷊ihakka nandolokki Timotius ringanni yamiu, tadea'u i ya'u maasomba al᷊al᷊uassu naungku su ola'u watti'i yamiu.

²⁰ Tumba'u Timotius sassane taumata apan ṛingiranne nassul᷊ungku, wuṛṛu atonna-tonna maṛṛingiddu lal᷊umanna'i yamiu.

²¹ Sarangkanambone apan waine tumba'u maṛṛingiddu watanganne sassane, wal᷊ine hunan Yesus Kristus.

²² I yamiu sassane naasilote tialane manungku Timotius pia gunane. I tou suete nammanara maṛṛimadda ringangku mabatti'u Watti'u Al᷊al᷊uassa wuassu Ruata. Iambua naal᷊ihida ana'a wuṛṛu iamangnga.

²³ Ana waugu udde, napawe i ya'u naasingkata manungku su ereapa hatto'u udde nasuete, i ya'u sarun mandolokki tou ringanni yamiu.

²⁴ I ya'u mangngimanna manungku ringannu tul᷊ungannu Mawu, i ya'u sassane lai tawe mal᷊annu sarun mattembo si yamiu.

²⁵ Su ola'u tuṛṛangi ite Epafroditus apan nirolokki yamiu mallal᷊ima si ya'u, i ya'u mammendama mappianne i tou irolokka iapaawelengnga ringanni yamiu apia. I tou suete nallal᷊ima si ya'u sulal᷊ummu manara'u.

²⁶ I tou maapulu atonna maisasomban kamiu sarangkanambone, wuṛṛu i tou u'ambul᷊isadda ana waugu i yamiu suete naaringikka watti'a manungku i tou marada'a.

²⁷ Atonna i tou marada'a na'oman sara maraniten mate. Arawe Ruata niumakkani tou; wuṛṛu wal᷊ine tumba'u si tou sassane, arawe si ya'u lai, tadea'u i ya'u tawe lembon masusa apia.

²⁸ Ana waugu udde maggewal᷊anna apulu'u mandolokki tou mabelengnga apia ringanni yamiu, tadea'u i yamiu lumuassa apia amungkangu massombate apia ringanni tou, wuṛṛu naungku lai mabbal᷊i matammuda.

²⁹ Nariaddi, sal᷊ohoite i tou ringannu ahewallu al᷊al᷊uassu naungnga ere sangkatou tuṛṛanga sulal᷊ummu pangangimanna sambau. Addate anambon taumata ere i tou.

³⁰ Su hunan manaran Kristus, i tou ete addio'a mate; i tou nanantillu niawane ipantul᷊ungku sulal᷊ummu arannu.