FILEMON 1 - WUKE SUSI WATTI'U AL᷊AL᷊USASSA

¹ Tuṛṛanga Filemon, hawe wuṛṛu ringanni yami! I ya'u, Paulus, sangkatou taumatan ṛuumanna ana waugu Kristus Yesus, su sampunna ringannu tuṛṛangi ite Timotius, namoṛṛetu suratta indi si'o,

² wuṛṛu su jamaatta apan uaammulla su wal᷊enu; wuṛṛu su wawinen kite Afia, wuṛṛu hawe sangkamanaranni ite Arkhipus.

³ I yami mangantimma doronganna Ruata Iamangngi ite wuṛṛu Mawu Yesus Kristus mangonggolu al᷊amatta wuṛṛu paddarame si yamiu.

Aakkanna wuṛṛu pangangimanni Filemon

⁴ Suapan i ya'u umal᷊iomanna, i ya'u mannaggon arannu tuṛṛanga wuṛṛu maadiangkamanna su Ruata.

⁵ Ana waugu i ya'u naaringikka manungku tuṛṛangnga atonna-tonna mangngimanna Mawu Yesus wuṛṛu mandangngu anambon al᷊aṛṛana'u Ruata.

⁶ I ya'u u'al᷊iomanna tadea'u pasasangkatuṛṛangi ite ere manga taumata mangngimanna sarun mahessin pasasunna apan lembon wahewalla su al᷊awo'u al᷊amatta apan tatahuananni ite ana waugu uaaukka ringanni Kristus.

⁷ Tuṛṛangnga Filemon, darangngunu su anambon al᷊aṛṛana'u Ruata maal᷊uassa si ya'u wuṛṛu mangonggolu sasasa si ya'u! Anambon al᷊aṛṛana'u Ruata nilumuassa ana waugu i'o.

Sasal᷊ande hunan Onesimus

⁸ Ana waugu udde, ere sangkatou tuṛṛangnga apan su pangangimanna sambau, i ya'u wotongnge mandolokku ma'ola'a apa apan sarun olaannu.

⁹ Arawe ana waugu i ya'u marangngu si'o, i ya'u tumba'u maddorongnga. I ya'u indi sangkatou timmadde wuṛṛu orassa indi ta'e tataṛṛanganna sulal᷊ummu tuttupanna ana waugu Kristus Yesus.

¹⁰ I ya'u Paulus, mangapiddu sambau darorongnga si'o su ola'i Onesimus, ana'u sulal᷊ummi Kristus. Ana waugu sulal᷊ummu tuttupanna indi ya'u naola'e iamangngu pangangimanne.

¹¹ Dorone i tou tawe gunane si'o, arawe orassa indi i tou piate gunane, wal᷊ine tumba'u si'o sassane, arawe si ya'u lai.

¹² Orassa indi taumata arangnguangku udde nirolokke apia ringannu.

¹³ Ṛinone i ya'u pia apulu manaṛṛanga si tou ringangku maola'a hahantinu, tadea'u i tou wotongnge massumbala si ya'u, su al᷊annune i ya'u tataṛṛanganna sulal᷊ummu tuttupanna indi ana waugu mammasingkatu Watti'u Al᷊al᷊uassa wuassu Ruata.

¹⁴ Arawe i ya'u maddiri ma'ola'a apa-apa amungkangu taambe naasomba paaire wuassi'o. I ya'u lembon maapulu amungkangu i'o mammanara ringannu apulun naungngu sassane; i ya'u maddiri mamatangngu.

¹⁵ Asinungka Onesimus naṛṛaenu tal᷊an kadio'a tadea'u i'o wotongnge maasomba si tou apia sarangkal᷊o'engnge.

¹⁶ Orassa indi i tou wal᷊ine tumba'u sangkatou allangngu, i tou nangillembo wua isudde. I tou uddewe nassul᷊ungngu taumatan Saṛṛani apan arangnguanna. I tou lembon mahuna si'u, lembonete lai si'o! I tou lembon mahuna lai mawae ere sangkatou allangnga aroddi lai ere sangkatou tuṛṛangnga sulal᷊ummu Mawu!

¹⁷ Ana waugu udde, i'o ma'ellega si ya'u ere sangkatou hawe sulal᷊ummu paa'aukku taumatan Saṛṛani, tarimmata'e apia Onesimus ere lai i'o nanarimmatti ya'u.

¹⁸ Amungkangu i tou nassal᷊a ara'e pia apa niwallasanna si'o, ia'ute mamaekka sarangkanambone udde.

¹⁹ Ne, mappianne i ya'u mamoṛṛeta sassane isindi: I ya'u Paulus, sarun mamaekka sarangkanambone. (Salaiwe tate ta'u iapaanaungnga manungku i'o sassane lai nabbalassa si'u, eteudde wiakku apan wakku ere sangkatou taumatan Saṛṛani.)

²⁰ Ana waugu udde, ringannu arannu Mawu, annama'a tul᷊unga'a i ya'u, paal᷊uasa'a naungku nassul᷊ungngu ere sangkatou tuṛṛanga sulal᷊ummi Kristus.

²¹ I ya'u namoṛṛetu suratta indi ringannu mangngimanna manungku i'o sarun tumuṛṛutta darorongku. Ewe'e i ya'u lai masingkatta i'o sarun ma'ola'a nangillembo wua isudde.

²² Tantal᷊anna udde tul᷊unga'a i ya'u saddiai wabbo'a su wal᷊enu, ana waugu i ya'u mangngantimma Ruata sarun maddaringikka aal᷊iomannu manga tuṛṛangnga sarangkanambone wuṛṛu mangapi'u apia ringanni yamiu.

Tabea panginsueanne

²³ Epafras, apan suaddio'a ringangku sulal᷊ummu tuttupanna ana waugu Kristus Yesus, nandohon tabeane si'o.

²⁴ Sengkamma lai tabea manga hawe'u: Markus, Aristarkhus, Demas wuṛṛu Lukas.

²⁵ Doronganna Mawu Yesus Kristus mangal᷊amatta si yamiu. Tabea wuassi yami, Paulus