EZRA 9 - WUKE SUSI WATTI'U AL᷊AL᷊USASSA

I Ezra naaringikka aalae su ola'u paa'awingnga lo'a suwallattu taumatan Yahudi wuṛṛu wal᷊ine Yahudi

¹ Napawe sarangkanambone udde buatte niapaamatta, manga pira matatimmaddu walahannu Israel nirumanta ringangku. I mangitou namasingkatta manungku tumana'u Israel, nasutta lai manga imam, wuṛṛu manga taumatan Lewi tawe maṛṛaen batanganne wuassu manga walahanna apan uatana'a maranine isudde, eteudde walahannu Amon, Moab, Mesir, Kanaan, Het, Feris, Yebus, wuṛṛu Amori. Ewe'e lai manga imam wuṛṛu manga taumatan Lewi na'ola'a aroddi. I mangitou sarangkanambone na'ola'a manga pallal᷊agu apan maarantinna apan a'olaannu manga walahanna udde.

² Taumata esakku Yahudi naawingnga ringannu wawine walahanna waine, na'oman sara umatta al᷊aṛṛaene pussa'a Mawu tate tutune lai. Ewe'e lai apan dorone na'ola'a udde manga matatimmadde wuṛṛu tembonannu Israel.

³ Naaringikka olangnge udde, i ya'u nasusa na'oman sara nanggesa'a lau'u wuṛṛu nanawutta uta'a wuṛṛu omengku, ana see niuma'ianna ringannu naungnga napussa-pussa'a.

⁴ I ya'u sidutu ua'ianna aroddi naddatingngu orassu pangangonggollu sasamban bawallo. Wua'udde nirumantate manga taumata uapal᷊iwutta si ya'u. I mangitou matta'utta mannaungnga wawansaggu Ruatan Israel su saruannu rosan manga taumata apan buatte nabbelengnga wuassu pamamuanganna udde.

⁵ Sutempo sasamban bawallo mannattakke ia'onggolla, i ya'u dirumarisikka wuassu tampa i ya'u massusa ringannu lau'u apan nahesa'a, i ya'u niumal᷊intudda wuṛṛu nanoggokku lima'u su Mawu Ruata'u.

⁶ I ya'u nabbisara, “Oh Ruata'u, i ya'u indi massili mamatti'u pua'u su saruan-Nu. Rosan kami mangke ua'ombo su puan kami na'oman sara nangeṛṛetta langitta.

⁷ Ro'en sutempo al᷊amonan kami naddatingngu orassa indi, i yami uman-Nu tumaniten marosa Si'o. Ana waugu udde i yami buatte niawaddon manga ratun banua waine. I yami nipate, nipangaṛṛoanna wuṛṛu niapidda maola'a tawananna. I yami mangke nilobbossa, ere su olangnge allo indi.

⁸ Arawe orassa indi, oh Mawu Ruatan kami, I'o wakkute niumakkanni yami. I'o namallossu manga pira taumata suwallatti yami wuassu patataṛṛuallanga tadea'u mabbiakka ringannu mal᷊angnganna su tampa apan niṛṛae indi. I'o nangonggolla si yami pabbiaṛṛanna wakku.

⁹ Sutempo i yami ta'e su patataṛṛuallanga, I'o tawe nanantangngi yami. I'o na'ola'a si yami raddangnguannu manga ratun Persia wuṛṛu niwala mabbiakka see na'ola'a apia Wal᷊en-Nu apan ete winal᷊alanna udde. I'o nangongonggolla si yami atanaanna isindi, su Yehuda wuṛṛu Yerusalem.

¹⁰ Arawe orassa indi, oh Mawu Ruata, napawe al᷊awo'u arariaddianna udde nal᷊iudde, apa apan wotongnge iwisaran kami? I yami tate maddaringngikka manga parenta-Nu lai,

¹¹ apan nionggolla si yami wuassu manga nabi, manga allang-Ngu. I mangitou namasingkatta si yami manungku leta'a apan sarun atanaanni yami udde tawe waresi ana waugu anambon tumanangnge wuassu pentakke maddatingngu pondolle ma'ola'a al᷊al᷊eo wuṛṛu maarantinna.

¹² Manga nabi udde naningaddi yami maawingngu ringannu manga taumata udde, ara'e massumbala si mangitou mabbal᷊i su lal᷊umanna'a wuṛṛu mal᷊angnganna. Amungkangngu i yami matuṛṛutta, i yami sarun mabbal᷊i matohassa wuṛṛu umanna hessin leta'a udde wuṛṛu manantilla su papapulunni yami saran mal᷊annu-l᷊annu.

¹³ I yami buatte na'ola'a rosa wuṛṛu nilumawangnga tita-Nu, wuṛṛu I'o buatte nakkuumanni yami. Arawe yami masingkatta, oh Ruatan kami, manungku ṛuumanna apan nionggollu Mawu udde tawe tumanin mawakkatta apan ṛinone sengkamanni yami, ewe'e I'o ta'e lai nanalamatta si yami.

¹⁴ Nariaddi, ereapa wotongnge i yami tawe maddaringikka manga parenta-Nu lai wuṛṛu maawingngu ringannu manga taumata apan lal᷊eo udde? Amungkangngu i yami ma'ola'a udde, I'o sarun masa'u na'oman sara makkimunsa'a si yami wuṛṛu tawe mamalan saran sangkatou wiakka.

¹⁵ Mawu, Ruatan Israel! I'o matul᷊idda, salaiwe aroddi I'o namalan kami wiakka. I yami tawe su tampane sumaruanna aṛṛa'uan-Nu.”