EZRA 6 - WUKE SUSI WATTI'U AL᷊AL᷊USASSA

Parentan Kores niasangkal᷊anna sulal᷊ummu buke

¹ Napawe wua'udde wuassu parentan Ratu Darius, niola'a pananaṛṛassidda sulal᷊ummu buken araratuanna apan sasahipunanna su Babel.

² Arawe woṛṛetta su ola'u hatto udde niasangkal᷊anna waline su Babel, ewe'e su soa Ahmeta su wageangngu leta'u Media. Parenta udde niwoṛṛetta su sambau suratta hahulunganna wuṛṛu tingikke arendi,

³ “Su tonna paarorone sutempo i Ratu Kores uaparenta, i tou napaasabbangngu parenta tadea'u Wal᷊en Mawu su Yerusalem olaanna apia maola'a tampan taumata mangngapiddu sassamba wuṛṛu panambunannu sasamba. Atanggakku Wal᷊en udde ṛinone 27 metere wuṛṛu al᷊alakke 27 metere lai.

⁴ Manga darandungnge ṛinone iapararisikka ere manansunna indi: su wowon suapan tatallu lapissa watu ṛinone iaddo sanlapissa alu. Bawaekke sarun waeṛṛannu roittu araratuanna.

⁵ Wuṛṛu lai manga saranapa wul᷊awanna wuṛṛu sal᷊a'a apan ipaatta su Wal᷊en Mawu wuṛṛu buatte nianun Ratu Nebukadnezar wuassu Yerusalem see niapidda watukku Babel, ṛinone isul᷊e apia su tampane paarorone.”

I Darius namarenta tadea'u bangunanna iapasassu

⁶ Wua'udde i Darius nangirimmu sasimbakka ereindi, “Iwuna'a si Tatnai, gubernure propinsi Efrat Waṛṛatta, wuṛṛu Syetar-Boznai, see manga tenbonanne su Efrat Waṛṛatta. Imbaṛṛangnga manal᷊asa'u manga taumatan Yahudi udde,

⁷ wuṛṛu imbaṛṛangnga manal᷊are paaola'a Wal᷊en Patataṛṛamawuanni mangitou mabbangunna apia Wal᷊en udde.

⁸ Suaddio'a ringannu suratta indi i ya'u mamarenta manga tuṛṛangnga tadea'u massumbala si mangitou sulal᷊ummu manara udde ringannu olangnge indi: Anambon bawaekku bangunanna ṛinone anuanna wuassu roittu wosen araratuanna su propinsi Efrat Waṛṛatta wuṛṛu ṛinone iawaekka su manga taumata udde ringannu tawe iasoṛṛotta.

⁹ Wal᷊ine wua'udde al᷊awo'u apa apan pappandumanna tumuṛṛuttu manga imam su Yerusalem, erenai sapi esakka wakku, domba esakka wuṛṛu ana'u domba olaanna sasamba su Ruata uataṛṛino su surga, see lai gandumma, haramma, anggore wuṛṛu lanan zaitun, ṛinone ionggolla si mangitou miallo-miallo ringannu tawe pal᷊akke.

¹⁰ Amata'e sarangkanambone udde tadea'u i mangitou wotongnge mangonggollu sasamba apan maal᷊uassa naungngu Ruata uataṛṛino su surga, wuṛṛu tadea'u i mangitou sumal᷊ande al᷊amatta apan hunane si ya'u wuṛṛu su manga ana'u.

¹¹ I ya'u mamarenta tadea'u taumata apan nilumawangnga parenta indi wuassu wal᷊ene sawutanna sambau diṛṛi, takko'anna pentakke, ana see iusu'a su waddangngu taumata udde sara mallappassa. Wal᷊ene ṛinone ihohakka olaanna tampan sapadda.

¹² Antimanna Ruata apan buatte namile Yerusalem maola'a tampa i Tou sassubbanna, mamate suapan ratu ara'e walahanna apan waṛṛani lumawangnga parenta indi wuṛṛu wuṛṛu mannalu'atta makkimunsa'a Wal᷊en Mawu su Yerusalem udde. I ya'u, Darius, buatte nangonggollu parenta indi. Amata'e parenta udde ringannu mapia.”

Wal᷊en Mawu nitenega

¹³ Parentan Ratu Darius udde niapaamatta ringannu maaddunna ṛattanganni Tatnai, gubernure Efrat Waṛṛatta, wuṛṛu Syetar-Boznai see mangahawen mangitou.

¹⁴ Nisumbalannu manga nabi Hagai wuṛṛu Zakharia, manga piaṛṛa'u Yahudi nanassu bangunannu Wal᷊en Mawu udde. I mangitou mal᷊ihakka nanginsue bangunannu udde uasul᷊ungngu parentan Duatan Israel wuṛṛu parentan Kores, Darius wuṛṛu Artahsasta, manga ratun Persia udde.

¹⁵ Wal᷊en Mawu udde nuddussa su allo atallune wul᷊anna Adar su tonna aiannumme sutempo i Ratu Darius uaparenta.

¹⁶ Wua'udde ringannu lullala'a manga taumatan Israel, manga imam, manga taumatan Lewi wuṛṛu anambon taumata wua niwuangnga nanenegu Wal᷊en Mawu udde.

¹⁷ Su arariaddianna udde i mangitou nangonggolla su Mawu 100 sapi esakka, 200 domba esakka wuṛṛu 400 ana'u domba. Su sasamba ipangampungnga rosa, nionggolla mapul᷊o dua ambinga esakka, sembau suapan ṛuangannu Israel.

¹⁸ Wua'udde su pangangimbe su Wal᷊en Mawu i mangitou nangatokku tahia su manga imam see manga taumatan Lewi tumuṛṛuttu atoranna apan uawoṛṛetta sulal᷊ummu buken Musa.

Ramean Paskah

¹⁹ Su allo mapul᷊o appatta wul᷊anna paarorone tonna manansunna, manga taumata apan napul᷊ete wuassu pamamuanganna, nallagun ramean Paskah.

²⁰ Anambon imam wuṛṛu taumatan Lewi buatte napaamattu lal᷊agu pamamaresi waddangnga na'oman sara nawaresite. Wua'udde manga taumatan Lewi udde naṛṛata manga winatangnga maola'a sasamban Paskah su manga iman, si mangitou sassane, wuṛṛu su anambon taumata apan buatte niwuangnga waine.

²¹ Manga sasamba udde niannu anambon taumatan Israel apan buatte nabbelengnga wuassu pamamuanganna wuṛṛu tumana'u wanua udde apan buatte nanantangngu ola'u pabbiaṛṛanna maarosa wuṛṛu nirumanta mattaṛṛamawu su Mawu, Ruatan Israel.

²² Pitu allo al᷊annune i mangitou ringannu lullala'a mallagu Ramean Roti Tawe Ragine. I mangitou lembon lulluassa ana waugu Mawu buatte na'ola'a ratun Asyur mapia naungnge si mangitou na'oman sara nassumbala si mangitou sulal᷊ummu manara napararisikku apia Wal᷊en Mawu, Ruatan Israel.