EZRA 4 - WUKE SUSI WATTI'U AL᷊AL᷊USASSA

Paaola'a Wal᷊en Mawu pia sal᷊awangnge

¹ Watti'a manungku manga taumata wua niwuangnga udde tantal᷊anna ma'ola'a Wal᷊en Mawu, Ruatan Israel, niaringiṛṛannu seettu taumatan Yerusalem wuṛṛu Benyamin.

² Ana waugu udde i mangitou niasasomban Zerubabel wuṛṛu manga tembonannu wawosoanna, ana see nangusulle, “Walaaewe i yami suadio'a ma'ola'a Wal᷊en Mawu udde, ana waugu i yami lai mattaṛṛamawu su Ruatan manga tuṛṛangnga, ere lai manga tuṛṛangnga sarangkanambone. I yami sidutu mangngonggollu sasamba si Tou ro'en tempon Esar-Hadon, ratun Asyur nangapiddi yami inawarendi.”

³ Arawe Zerubabel, Yesua wuṛṛu manga tembonannu wawosoanna sinumimbakka, “I yami tawe mappandumma sasumbala wuassi yamiu ipandarisikku Wal᷊en Mawu Ruatan kami. I yamite mapararisikka sassane ere su parentan Kores, ratun Persia, si yami.”

⁴ Wua'udde tumanangnge apan mal᷊annute uatana'a su wanua udde mannattakke mangngaddio'a ikkattu taumatan Yahudi see mammata'utta si mangitou tadea'u manara udde iillolo.

⁵ I mangitou nanorokka manga tembonannu pamarentan Persia tadea'u manal᷊are hol᷊agu taumatan Yahudi udde. Olangnge udde sidutu iapaamatta ro'en i Ratu Kores uaparenta naddatingngu pamamarentan Ratu Darius.

Paaola'a soa Yerusalem niilloll᷊o

⁶ Su panattaṛṛannu pamamarentan Ratu Ahasyweros, manga seettu tumana'a Yerusalem wuṛṛu Yehuda namoṛṛettu suratta aalae.

⁷ See lai sutempon pamamarentan Artahsasta, kaisar Persia, arariaddianna udde nasul᷊e apia: Bislam, Mitredat, Tabeel wuṛṛu manga hawen mangitou namoṛṛettu suratta su ratu. Suratta udde niwoṛṛetta sulal᷊ummu sasinaukku Aram, wuṛṛu ṛinone itappassa sutempo iwasa.

^8-9 Artahsasta lai nanarimmattu suratta su ola'u Yerusalem. Suratta udde niiringngu Gubernure Rehum wuṛṛu Simsai mamamoṛṛettu propinsi wuṛṛu nilal᷊imannu manga hawen mangitou, eteudde manga mallaṛṛuungngu wuṛṛu anambon tembonannu Persia waine apan darantane wuassu Erekh, Babel, wuṛṛu Susan su wanua Elam,

¹⁰ wuṛṛu lai manga walahanna waine apan buatte niṛṛootti Asnapar Apan Mawantuga wuṛṛu nirolokka niapawanua su soa Samaria wuṛṛu su manga soa waine sulal᷊ummu propinsi Efrat Waṛṛatta.

¹¹ Arendi tingikku suratta udde, “Su saruannu Ratu Artahsasta, wuṛṛu manga allangngi Tuangnga apan uatana'a su Efrat Waṛṛatta. Tabbea.

¹² Antimanna Tuangnga masingkatta, manungku taumatan Yahudi apan buatte nanantangngu manga wageangngu leta'a waine sulal᷊ummu araratuanni Tuangnga, orassa indi namanuate su Yerusalem wuṛṛu tantal᷊anna ma'ola'a apia soa apan dal᷊eo wuṛṛu apulune lullawangnga udde. I mangitou mannattakke mappararisikku apiamanga darandungnge wuṛṛu tate mal᷊annu lai manginsue manara udde.

¹³ Amungkangngu soa udde naola'a apia wuṛṛu manga darandungnge nasuete niapararisikka, tumanangnge maddarite lai mamaekka wose, ana see addapattu araratuanna sarun mahaingnga.

¹⁴ I yami pia utangngu si Tuangnga wuṛṛu maddiri ma'ellega i Tuangnga ruggianna. Ana waugu udde i yami maddorongnga,

¹⁵ tadea'u Tuangnga mandolokka manaṛṛassidda arannu manga al᷊amonan Tuangnga. Wuassu loṛṛone i Tuangnga sarun maasingkattu manungku so Yerusalem apulune lullawangnga wuṛṛu ro'en darone sidutu mandugi manga ratu wuṛṛu tembonannu propinsi. Tumanangnge sidutu masahadda ipiaṛṛa'a. Ana waugu udde soa udde buatte niṛṛimunsa'a.

¹⁶ Nariaddi, i yami mangimanna, manungku napawe soa udde naola'a apia wuṛṛu manga darandungnge niapararisikka, i Tuangnga tate lai maparenta propinsi Efrat Waṛṛatta indi.”

¹⁷ Ratu nangirimmu sasimbakke indi, “Iwuna'a si Gubernure Rehum wuṛṛu Simsai mamamoṛṛettu propinsi, see manga hawen mangitou apan uatana'a Samaria wuṛṛu su manga soa waine su propinsi Efrat Waṛṛatta. Tabbea.

¹⁸ Suratta apan buatte niiringngu manga tuṛṛangnga buatte nitappassa wuṛṛu niwasa si ya'u.

¹⁹ Ana see wuassu parenta'u buatte niola'a pananaṛṛassidda, wuṛṛu atonna niasingkatanna manungku ro'en al᷊amonane Yerusalem sidutu lullawangnga parentan manga ratu wuṛṛu manambo suwallattu tumanangnge udde mal᷊awangnga wuṛṛu maaola'a al᷊iba'ukka.

²⁰ Su paassa buatte manga ratu apan matohassa namarenta poiaroddi wuṛṛu uataṛṛino ahewallu propinsi Efrat Waṛṛatta see napaamattu wose wuṛṛu aonggolla.

²¹ Ana waugu udde, sabbangke parenta tadea'u mapaadale manaran manga taumata udde, tadea'u soa udde imbaṛṛangnga olaanna apia ma'oman sara i ya'u mangonggollu parenta waine.

²² Amata'e parenta'u udde ringannu mal᷊ihakka tadea'u arie atambanna lembon wahewalla lai arugiangku!”

²³ Tawe nal᷊annu napawe suratti Artahsasta udde niwasa si Rehum, Simsai wuṛṛu manga hawene, i mangitou inaite watukku Yerusalem wuṛṛu namata'a taumatan Yahudi mapaaddo manara paaola'a apia soa udde.

Paaola'a Wal᷊en Mawu nitattakka apia

²⁴ Manara su Wal᷊en Mawu buatte niillol᷊o wuṛṛu tate nisassu na'oman sara tonna aruane pamamarentan Darius, ratun Persia.