EZRA 3 - WUKE SUSI WATTI'U AL᷊AL᷊USASSA

Patataṛṛamawu nitattakka apia

¹ Su wul᷊anna appitune, manga taumatan Israel namanuate su soane sambau-sambau. Su allo paarorone wul᷊anna udde i mangitou nammulla su Yerusalem,

² ana see Yesua ana'i Yozadak see ringanne manga imam wuṛṛu Zerubabel ana'i Sealtiel see manga tuṛṛangnge, na'ola'a apia mezbah Duatan Israel. Ringannu aroddi i mangitou wotongnge manambbunnu amania isudde, uasul᷊ungngu manga tatantiro apan uawoṛṛetta sulal᷊ummu buke Titan Musa allangngu Ruata.

³ Salaiwe i mangitou matta'uttu tumana'u wanua udde, arwe i mangitou na'ola'a lai mezbah udde su tampane paarorone. Ana i mangitou mannattakke nangonggollu sasamba itattambunna apia, sutempo rua allo wuṛṛu wawallo.

⁴ I mangitou lai nallagu Allo Wahewallu Rasannu Rongnga, uasul᷊ungngu atoranna; wuṛṛu miallo-miallo mangngonggollu sasamba apan buatte nitantunna su allo udde.

⁵ Wal᷊ine wua'udde lai i mangitou ringannu uaatokka mangonggollu sasamba itattambunna see sasamba su Allo Wahewan Bul᷊anna Wakku, wuṛṛu su anambon allo wahewalla waine apan niola'a ipassubba Mawu. I mangitou lai mangngonggollu sasamba walate apulun naungnga su Mawu.

⁶ Salaiwe Wal᷊en Mawu taambe nitattakka olaanna apia, arawe su allo paarorone wul᷊anna appitune tumanangnge mannattakke mannambunnu sasamba hunan Mawu.

Paaola'a Wal᷊en Mawu nitattakka

⁷ Tumanangnge nangonggollu roitta ipanewa basen meselle wuṛṛu basen alu. I mangitou lai nangirimmu anna see lanan zaitun watukku manga soa Tirus wuṛṛu Sidon ipanal᷊iu alu cemaran Libanon wuassu manga soa udde. Alu udde niapidda watukku Yafo nilumewessa tahal᷊oangnga. Sarangkanambone udde nimanaran tumanangnge ringannu darolokki Kores, ratun Persia.

⁸ Ne su wul᷊anna aruane, sulal᷊ummu tonna aruane napawe taumatan Israel nabbelengke watukku Yerusalem, i mangitou mannattakke ma'ola'a apia Wal᷊en Mawu. Zerubabel, Yesua wuṛṛu manga hawen mangitou sambalahanna, manga imam, taumatan Lewi, aunne, anambon taumata wua niwuangnga, mammanara abbi. Manga taumatan Lewi apan uukke 20 su tonnane ire'e nita'e iapariagga manara paaola'a Wal᷊en Mawu udde.

⁹ Ne Yesua, taumatan Lewi udde, ringannu manga anangnge wuṛṛu tuṛṛa-tuṛṛangnge wuṛṛu lai Kadmiel ringannu manga anangnge (wawosoanni Hodawya) suaddio'a mandiagga manara paaola'a Wal᷊en Mawu udde. I mangitou nilal᷊imannu taumatan Lewi wuassu wawosoanni Henadad.

¹⁰ Sutempo manga mamanaran bangunna mannattakke mangaddon rapappakku Wal᷊en Mawu, manga imam ualuṛṛen juba wuṛṛu ringannu uaagassa trompetta dirumarisikka su tampane sangkatou-sangkatou. Manga taumatan Lewi wuassu wawosoanni Asaf dirumarisikka lai isudde ringannu uaagassa manga manaunganna maraddio'a. I mangitou mangke maddalo Mawu uasulungngu atoranna apan buatte nitantunna ro'en tempo i Ratu Daud.

¹¹ Tumanangnge mangngantari aantari daralo su Mawu, lapiddu masokka isul᷊e wageangnge papanginsueanne, arendi tingikke, “Mawu udde mapia; wuṛṛu darangngu-Ne su Israel mangke maṛṛawa mappulunna.” Anambon tumanangnge huggio suaddio'a wuṛṛu maddalo Mawu, ana waugu rapappakku Wal᷊en Mawu buatte niaddo.

¹² Manambo suwallattu manga imam, manga taumatan Lewi wuṛṛu manga tembonannu wawosoanna apan timmaddete buatte naasilo Wal᷊en Mawu apan dorone. Sutempo i mangitou na'ellega pangangaddo rappakku Wal᷊en Mawu indi, i mangitou mangke nilumuai ma'ikka-ikkatta. Arawe manga taumata waine apan iaudde lai mangke huggion al᷊al᷊uassa,

¹³ na'oman sara masahadda paṛṛangngoannu hion al᷊al᷊uassa wuṛṛu lal᷊uai. Tingikke aroddi atelengnge, na'oman sara aaringiṛṛanna sara marau.