EZRA 1 - WUKE SUSI WATTI'U AL᷊AL᷊USASSA

I Kores namalan taumatan Yahudi napul᷊e watukku wanua mangitou

¹ Su tonna paarorone sutempo i Kores uaparenta, ratun Persia, Mawu napaamattu apa apan buatte niwisara-Ne si Nabi Yeremia. Mawu nangal᷊oren naungngi Kores tadea'u mapasabbangngu sambau parenta apan iwasa su ahewallu araratuanne. Tingikke arendi:

² “Eteindi parentan Kores, ratun Persia. Mawu, Ruata tembonanne su surga buatte na'ola'a si ya'u ratu su ahewallu runia, wuṛṛu nangonggollu manara si ya'u tadea'u mapararisikku Wal᷊en-Ne su Yerusalem su leta'u Yehuda.

³ Antimanna Ruata mallu'adda si yamiu sarangkanambone apan naola'a uman-Ne. I yamiu ṛinone mapul᷊e watukku Yerusalem wuṛṛu mapararisikku apia Wal᷊en Mawu, Ruatan Israel, Ruata apan uatana'a su Yerusalem.

⁴ Amungkangngu pia sangkatou uman-Ne su tampan pamamuanganna indi apan maddorongnga sumbala tadea'u wotongnge mapul᷊e, ne manga al᷊indonganne ṛinone massumbala. I mangitou ṛinone mangonggollu si tou sal᷊a'a wuṛṛu wul᷊awanna. Wal᷊unna su amatanna see manga winatangnga pallurananna, wuṛṛu lai manga sasamba hunan Wal᷊en Mawu su Yerusalem.”

⁵ Wua'udde manga tembonannu bawosoanna wuassu ṛuanganni Yehuda wuṛṛu Benyamin, manga iman wuṛṛu manga taumatan Lewi, wuṛṛu suapan taumata apan naungnge nial᷊oren Duata, nandiahite inai mapul᷊e watukku Yerusalem wuṛṛu mapararisikku apia Wal᷊en Mawu.

⁶ Anambon al᷊indonganni mangitou lai massumbala ringannu nangonggollu al᷊awo'u saranapa, erenai manga perkakassa sal᷊a'a wuṛṛu wul᷊awanna, wal᷊unna su amatanna, winatangnga pallurananna, darotongnga waine wuṛṛu manga sasamba hunan Wal᷊en Mawu.

⁷ Kores napaasabbangngu manga mangko wuṛṛu cawanna apan dorone ipappaatta sulal᷊ummu Wal᷊en Mawu su Yerusalem. Manga saranapa udde buatte niṛṛootti Ratu Nebukadnezar wuṛṛu niaddo sulal᷊ummu kuillu manga monganne sassane.

⁸ Kores nanantillu manara mandiahi saranapa udde si Mitredat, tembonannu uaagassa roittu araratuanna. Wua'udde Mitredat namoṛṛettu manga saranapa udde ionggolla si Sesbazar, gubernuren Yehuda.

^9-10 Eteindi saranapa apan niwoṛṛetta: manga mangko wul᷊awanna su ipallagu sasamba 30 manga mangko sal᷊a'a su ipallagu sasamba 1.000 manga mangko waine 29 manga mangko maraddio'a wuassu wul᷊awanna 30 manga mangko maraddio'a wuassu sal᷊a'a 410 saranapa waine 1.000

¹¹ Sarangkanambone reenganne 5.400 manko wul᷊awanna wuṛṛu sal᷊a'a see manga saranapa waine. Sarangkanambone udde niapiddi Sesbazar sutempo i tou wuṛṛu manga taumata niwuangnga waine nanantangngu Babel mattuddan Yerusalem.