ESTER 8 - WUKE SUSI WATTI'U AL᷊AL᷊USASSA

Walahannu Yahudi niparentanna lumawangnga seenne

¹ Su allo udde Ratu Ahasyweros nangonggolla si Wo'i Ester al᷊awo'u darotongngi Haman, seettu taumatan Yahudi ahewal᷊anne. Ester namasingkatta ratu manungku Mordekhai tuṛṛungnge sidutu, ne nanattakka orassa udde Mordekhai nionggol᷊annu taṛṛino amungkangngu sumaruanna ratu salaiwe tawe waggoanna dorone.

² Ratu nalluatta sinsingnge apan buatte niul᷊eanna apia wuassi Haman wuṛṛu nionggolla si Mordekhai. Wuṛṛu Ester naneneggi Mordekhai naola'a tembonannu darotongngi Haman.

³ Wua'udde Ester sinumaruanna ratu apia. I tou niumal᷊intudda lapiddu nilumuai wuṛṛu sinumal᷊ande tadea'u ratu mangabbutta hol᷊aga lal᷊eo apan niola'i Haman su saruannu taumatan Yahudi.

⁴ Ratu nangul᷊ukku ta'inne wul᷊awanna si Ester, ana see dirumarisikke Ester wuṛṛu nabbisara.

⁵ “Amungkangngu i Tuangnga mal᷊uassa wuṛṛu umakkannu allangnga, ṛinone Tuangnga mapasabbangngu surattu parenta ipanawutta manga suratti Haman apan lal᷊oṛṛone parenta iapapate anambon taumatan Yahudi su araratuanna indi.

⁶ Ereapa wotongnge allangnga ma'ellega walahanna wuṛṛu manga tuṛṛangngu allangnga masue ṛatanna?”

⁷ Ne unni Ratu Ahasyweros si Wo'i Ester wuṛṛu Mordekhai, “Atonna, i ya'u buatte nanggatongngi Haman ana waugu i tou pia pandumma mamate taumatan Yahudi, wuṛṛu darotongnge buatte ta'u nionggolla si Ester.

⁸ Arawe suratta apan buatte niwoṛṛetta ringannu arannu ratu wuṛṛu cappan ratu, tate wotongnge iasawutta apia. Arawe, i yamiu ta'u iwala mamoṛṛettu suratta su ola'u walahannu Yahudi, suapa aellehanni yamiu mapia. Woṛṛetta'e suratta udde ringannu arangku wuṛṛu anggol᷊annu cappan araratuanna.”

⁹ Su allo udde lai, eteudde su allo 23 wul᷊anna atallune, wul᷊anna Siwan, Mordekhai namaggo manga mamamoṛṛettu ratu wuṛṛu namarenta si mangitou mamoṛṛettu suratta su manga gubernure, manga bupati wuṛṛu manga tembonanne watukku 127 propinsi, wuassu India maddatingngu Sudan. Manga suratta udde niwoṛṛetta sulal᷊ummu sasinaukka wuṛṛu woṛṛettu manga propinsi udde sambau-sambau. I tou lai nangirimmu suratta udde su taumatan Yahudi sulal᷊ummu sasinaukka wuṛṛu woṛṛettu Yahudi.

¹⁰ Manga suratta udde nibartandanni Mordekhai ringannu aranni Ratu Ahasyweros wuṛṛu nicappannu cappan araratuanna. Ana see Mordekhai nandolokku manga daroloṛṛanna manguntuddu manga suratta udde watukku manga propinsin araratuanna ringannu uasa'e manga awal᷊o pussa'an datu.

¹¹ Manga suratta udde mammasingkatta manungku ratu namalan taumatan Yahudi su al᷊awo'u soa tadea'u massanggal᷊oma wuṛṛu manahekku watanganne. Napawe i mangitou pangaloannu manga taumata pia lutangnge wuassu al᷊awo'u walahanna wuṛṛu propinsi, i mangitou wotongnge lumawangnga wuṛṛu mamate manga mamangalo udde suaddio'a ringannu awingnge wuṛṛu al᷊aṛṛanangnge; i mangitou wotongnge maṛṛata manga seenne udde ma'oman sara masue see manganu darotongnge.

¹² Parenta udde ṛinone iapamatta su ahewallu araratuannu Persia su allo apan buatte nitantunni Haman ipamate manga taumatan Yahudi, su allo mapul᷊o tallu, wul᷊unna mapul᷊o dua, wul᷊anna Adar.

¹³ Suratta parenta udde ṛinone iapaasabbangnga maola'a sambau atoranna wuṛṛu iapasingkatta su anambon taumata su al᷊awo'u propinsi tadea'u walahannu Yahudi sidutu uatehamma lumawangnga seenne napawe allo udde nia'omanna.

¹⁴ Ne manga daroloṛṛanna udde inaite ringannu uasa'e awal᷊o pussa'an datu. Wuṛṛu lai su Susan inangngusoan araratuanna, parenta udde niwasa.

¹⁵ Wua'udde Mordekhai nanantangngu wal᷊en araratuanna ringannu nalluṛṛen laubbu awawantuga kalurene ma'elomma wuṛṛu mawira, juba ungu wuassu linen al᷊ussa wuṛṛu mahkota wul᷊awanna apan maṛṛansangnga atonna. Soa Susan huggio ana waugu lulluassa.

¹⁶ Taumatan Yahudi naapendamma matamudda wuṛṛu mal᷊uassa, mal᷊angnganna wuṛṛu lullala'a.

¹⁷ Wuṛṛu lai suapan soa see propinsi, su al᷊awo'u tampa suratta parentan datu niwasa, manga taumatan Yahudi lullala'a, mallal᷊umanna'a wuṛṛu naandeangnga. Ewe'e lai manambo wuassu tumana'a apan naola'a walahannu Yahudi, ana waugu i mangitou matta'uttu walahanna udde.