ESTER 7 - WUKE SUSI WATTI'U AL᷊AL᷊USASSA

¹ Su aruane ratu wuṛṛu Haman niumanna ma'inumma suaddio'a ringanni Ester.

² Lapiddu ma'inumma anggore, ratu naiwal᷊o apia si Ester, “Ne, Awingku, apa apan ipaapulunu? Wal᷊oa'e! I ya'u sarun mangonggolla salaiwe i'o maddorongnga sambageanganna wuassu araratuangku.”

³ Sasimbakki Wo'i Ester, “Amungkangngu Tuangnga mal᷊uassa, allangnga sumal᷊ande tadea'u allangnga wuṛṛu walahanna allangnga wotongnge mabbiakka.

⁴ Ana waugu allangnga wuṛṛu walahannu allangnga buatte niwal᷊u'a tadea'u pateanna. Unnuwisara i yami tumba'u niwal᷊u'a olaanna allangnga, allangngu sidutu mal᷊annabba wuṛṛu tawe manal᷊asa'i Tuangnga. Arawe orassa indi i yami pateanna wuṛṛu ṛadaanna!”

⁵ Ana see Ratu Ahasyweros naiwal᷊ote si Wo'i Ester, “Isai apan waṛṛani ma'ol'a aroddi? Suapa taumatane?”

⁶ Ester sinumimbakka, “Haman apan lal᷊eo indi seetta wuṛṛu mandal᷊al᷊eo si yami!” Ringannu tumaniten matta'utta Haman na'ellega ratu wuṛṛu wo'i.

⁷ Ratu nasa'u atonna, ana see dirumarisikka nanantangngu medda wuṛṛu lapiddu sinumabbangnga watukku liudde, su wawail᷊annu wal᷊en araratuanna. Haman masingkatta manungku ratu buatte nanganu inaappuanne tadea'u makkuumanne, ana waugu udde i tou tawe manantangngi Wo'i Ester tadea'u sumal᷊ande i tou iapasal᷊amatta.

⁸ Ringannu massusa Haman nangema'u watanganne su rosobbi Ester maddorongnga ampungnga, arawe su orassa udde lai ratu nabbelengnga wuassu wawail᷊annu wal᷊en araratuanna. Naasilo si Haman aroddi, ratu nangintul᷊i, “Apa? I'o lai ta'e waṛṛanni mandal᷊eo awingku?” Tawe nal᷊annu napawe manga wisara udde buatte niwisaran datu, manga tembonanne nirumanta wuṛṛu nami'unna puan Haman.

⁹ Ana see unni Harbona, sangkatou wuassu manga tembonanne udde, “Tuangnga, maranin wal᷊en Haman pia diṛṛi panggahantonganna atanggakke daruan pul᷊o dua su meterene. Haman buatte namasi'u diṛṛi udde panggantonganni Mordekhai, taumata apan buatte nanal᷊amatta niawan Tuangnga.” Ana see ratu namarenta, “Hantonga'e Haman su diṛṛi udde!”

¹⁰ Etearoddi Haman nihantongnga su diṛṛi apan buatte niolangnge panggantonganni Mordekhai. Wua'udde nompo'e asasa'un datu.