ESTER 3 - WUKE SUSI WATTI'U AL᷊AL᷊USASSA

I Haman nakkiinnu hol᷊aga lal᷊eo ipamate taumatan Yahudi

¹ Manga pira tempo wua'udde Ratu Ahasyweros nananegu sangkatou aranne Haman maola'a perdana menteri. Haman uddewe ana'i Hamedata wuassu papapulunni Agag.

² Ratu namarenta su anambon mamanarane tadea'u mangaddatta si Haman ringannu umal᷊intudda su saruanne. Sarangkanambone naddaringikka parenta udde, tabbene'e Mordekhai.

³ Manga mamanara waine su wal᷊en araratuanna naiwal᷊o si tou anio i tou lullawangnga parentan datu,

⁴ wuṛṛu miallo-miallo i mangitou mammata'i tou tadea'u sidutu tuttuṛṛutta, arawe i tou maddiri maddaringikka. Wisarane, “I ya'u taumatan Yahudi; i ya'u tawe wotongnge umal᷊intudda su saruannu taumata.” Ana see i mangitou nangalaen hatto udde si Haman ana waugu i mangitou mappulu maasingkatta ṛuumanna apan sarun ionggolla si Mordekhai.

⁵ Haman mangke nasa'u atonna napawe naasingkatta manungku Mordekhai maddiri umal᷊intudda su saruanni tou.

⁶ Wuṛṛu napawe i tou naasingkatta manungku Mordekhai sangkatou taumatan Yahudi, i tou nakkawessa makkuumanni Mordekhai wuṛṛu wal᷊ine tumba'u i tou, ewe'e sarun pateanna lai anambon walahannu Yahudi su araratuannu Persia.

⁷ Su tonna mapul᷊o dua pamamarentan Ratu Ahasyweros, su wul᷊anna paarorone, eteudde wul᷊anna Nisan, Haman nandolokka nandammen undi apan isassaggo, “purim” tadea'u maasingkatta allo wuṛṛu wal᷊ine tumba'u i tou, ewe'e sarun pateanna lai anambon walahannu Yahudi su araratuannu Persia.

⁸ Ana see Haman nabbisara ratu, “Tuangnga, pia sambau walahanna maatiangnga apan uasal᷊iawukka su al᷊awo'u propinsin araratuanna indi. Adattu inanaramanne uapapaṛṛala atonna ringannu manga walahanna waine. Tuangnga imbaṛṛangnga mamalan mangitou ma'ola'a walate apulun naungnge.

⁹ Amungkangngu Tuangnga tawe singkal᷊one, ṛinone iapasabbangnga surattu parenta ipamate si mangitou. Wuṛṛu amungkangngu Tuangnga mappulu maddaringikka darorongngu allangnga, allangnga sarun wotongnge mapaasutta wuassu 340.000 su kilone sal᷊a'a su kasen roitti Tuangnga.”

¹⁰ Naaringikka udde, ratu nanawutta wuassu tal᷊imaddone sinsingnga apan ual᷊uṛṛe si tou ipacappa manga papasingkattu araratuanna, ana see nionggolla si Haman, seettu taumatan Yahudi apan wahewalla.

¹¹ Unnu ratu si tou, “Walahanna udde wuṛṛu lai roinne ta'u itantilla si'o. Pa'ola'e apa apan ellehannu mapia su saruanni mangitou.”

^12-13 Ne su allo appul᷊one tallu wul᷊anna paarorone, Haman namaggo manga mamamoṛṛettu ratu. I mangitou nirolokki tou niapawoṛṛettu suratta uasul᷊ungngu al᷊awo'u apa apan niparentane, ana see suratta udde nitappassa sulal᷊ummu anambon sasinaukka wuṛṛu nisal᷊inna su anambon woṛṛetta apan ipappaatta su araratuanna udde. Suratta udde niwoṛṛetta ringannu aranni Ratu Ahasyweros wuṛṛu nicappannu sinsingnge, ana see niiringnga ringannu mal᷊ihakka su manga tembonanne, gubernure wuṛṛu ahewal᷊anne su anambon propinsi. Lal᷊oṛṛone eteudde, gubernure wuṛṛu ahewal᷊anne su anambon propinsi. Lal᷊oṛṛone eteudde parenta manungku su allo appul᷊one tallu wul᷊anna Adar, anambon walahannu Yahudi, mawae timmadde aroddi lai dario'a, mawae wawine ara'e lai al᷊aṛṛana'a, ṛinane pateanna tawe ampungnge, wuṛṛu darotongngi mangitou aṛṛoanna.

¹⁴ Parenta udde ṛinone ial᷊iata su anambon propinsi tadea'u anambon taumata nasaddiate su allo apan buatte nitantunna udde.

¹⁵ Manga daroloṛṛanna nasasaṛṛawutta nanguntuddu manga suratta udde su anambon propinsin araratuanna. Wuassu darolokku ratu, parenta udde nial᷊iata lai su Susan, inangngu soan Persia. Wua'udde ratu wuṛṛu Haman ua'iante lapiddu ma'inumma anggore, arawe soa Susan niṛṛumindu'a ana waugu watti'a udde.