ESTER 2 - WUKE SUSI WATTI'U AL᷊AL᷊USASSA

I Ester naola'a wo'i

¹ Manga pira tempo wua'udde, salaiwe ratu tate lai masa'u, i tou ta'e sidutu maṛṛingiddu inolaanni Wo'i Wasti wuṛṛu ruumanna apan buatte nionggolla si tou.

² Ana waugu udde manga mananantiro apan uahahawe marani ringannu ratu nangonggollu ṛingidda ereindi, “Mappianne reaanna manga maṛṛuala apan maṛṛamagga hunan Tuangnga.

³ Ṛinone Tuangnga manenegu manga mamanara su al᷊awo'u propinsin araratuanna indi iapare'a manga maṛṛuala apan maṛṛamagga ana see i mangitou sarangkanambone iapidda inawarendi watukku wal᷊en araratuannu wawine su Susan indi. Hegai, mamanara apianne apan naola'a tembonannu amonannu araratuannu wawine, sarun mallu'adda si mangitou wuṛṛu mangongollu papaddul᷊i tadea'u sidutu maṛṛamagga.

⁴ Wua'udde, ṛinone Tuangnga mamile maṛṛuala apan ipaapulun Tuangnga, wuṛṛu ma'ola'a si tou wo'i ipallol᷊ossa si Wo'i Wasti.” Ratu niumiren tatantiro udde wuṛṛu napaamatte.

⁵ Su soa Susan udde pia sangkatou Yahudi aranne Mordekhai ana'i Yair. I tou papapulunni Kis wuṛṛu Simei wuassu ṛuanganni Benyamin.

⁶ Mordekhai buatte niatawanna sutempo Yerusalem niwaddon Nebukadnezar, ratun Babel. Mordekhai niapidda watukku Babel suaddio'a ringanni Yoyakin, ratun Yehuda, wuṛṛu manambo lai manga tawananna waine.

⁷ I tou pia tuṛṛangnga sidutu, sangkatou maṛṛuala apan hatine maṛṛamagga wuṛṛu awangnge maṛṛansangnga, aranne Ester, ewe'e arannu Ibrani isassaggo Hadasa. Hagurangngi Ester natete wuṛṛu i tou naola'a ana'a ampitti Mordekhai wuṛṛu nibbuwunna ere ana'a suṛṛiwa.

⁸ Napawe parentan datu nial᷊iata, manambo maṛṛuala niammulla su Susan wuṛṛu Ester udde lai suwallatti mangitou. I tou lai niapidda watukku wal᷊en araratuannu ratu wuṛṛu nitantilla si Hegai tembonannu amonannu araratuannu wawine.

⁹ Hegai tinumiangnga si Ester wuṛṛu maapuluten tou. Ringannu mal᷊ihakka maṛṛuala udde nionggol᷊annu al᷊aṛṛansangnga see lai anna apan apianne. Ester niingkatta su tampa apan apianne su wal᷊en araratuannu wawine udde wuṛṛu siri pitu maṛṛuala apan mal᷊inso'a mammanara su wal᷊en araratuanna niapamanara mangngimbe si tou.

¹⁰ Wuassu tatantiron Mordekhai, Ester tawe namasingkatta manungku i tou sangkatou taumatan Yahudi.

¹¹ Miallo-miallo Mordekhai su saruannu rallakku wal᷊en araratuannu wawine udde tadea'u maiwal᷊on ola'i Ester wuṛṛu apa apan sarun mariaddi si tou.

¹² Tumuṛṛuttu atoranna, manga wawine paddul᷊iananna see maṛṛamaga al᷊annune santonna: annummu wul᷊anna ringannu lana lo'annu amania, wuṛṛu annummu wul᷊anna manansunna ringannu lana lo'annu manga lana mawangngi waine. Wua'udde, suapan maṛṛuala maasomba hiliranna sumaruanna si Ratu Ahasyweros.

¹³ Sutempo sangkatou maṛṛuala sumaruanna ratu, i tou wotongnge mappaattu al᷊awo'u apa apan ipaapulune.

¹⁴ I tou niapidda watukku wal᷊en araratuanna sutempo ṛabbi, wuṛṛu tiṛṛabine i tou niapidda watukku wal᷊en araratuanna waine, wuṛṛu papaddul᷊iananni Saasgas, sangkatou mamanaran ratu apan nipile mammaddul᷊i mia'in ratu. Maṛṛuala udde tate sumaruanna ratu apia, tabbene'e ratu mapaaranita wuṛṛu mamaggo si tou ṛingannu managgon aranne.

¹⁵ Ne nia'omante hiliranni Ester inai sumaruanna ratu. – Ester uddewe ana'i Abihail tuṛṛangngi Mordekhai apan buatte nangampitta si tou maola'a anangnge sassane; Ester itattiangnga suapan taumata ma'ellega si tou. Sutempo i tou inaite sumaruanna ratu, Ester nappeddeta tumuṛṛuttu atokka wuṛṛu tatantiron Hegai, tembonannu wal᷊en araratuannu wawine.

¹⁶ Etearoddi, su tonna appitune pamamarentan Ahasyweros su wul᷊anna appul᷊ul᷊one, eteudde wul᷊anna Tebet, Ester niapidda sinumaruanna si Ratu Ahasyweros su wal᷊en aratuannu ratu.

¹⁷ I tou maal᷊uassa wuṛṛu maal᷊ala'a ratu nangillembo wuassu manga maṛṛuala waine. Ana waugu udde i tou lembon arangnguannu ratu. Ne ratu nalluṛṛen mahkotan araratuanna su puan Ester wuṛṛu na'ola'a si tou wo'i pinallol᷊ossa si Wo'i Wasti.

¹⁸ Wua'udde, ratu na'ola'a andeangnga wahewalla ipangaddatta si Ester wuṛṛu namaggo anambon mamanaran araratuanna wuṛṛu tembonane. I tou namasingkattu allo pangillol᷊oanna su ahewallu araratuanna wuṛṛu mangke nattahia aonggolla ringannu manambo-nambo.

I Mordekhai nanal᷊amatta niawan datu

¹⁹ Tantal᷊anna udde Mordekhai buatte nitenegu ratu naola'a mamanaran araratuanna.

²⁰ Ester taambe lai namasingkatta manungku i tou sangkatou taumatan Yahudi, ana waugu Mordekhai manningaddi tou. Ester mararingikka si Mordekhai ere lai sutempo i tou ta'e al᷊aṛṛana'a wuṛṛu nipaddul᷊ianannu tuṛṛangnge tutune udde.

²¹ Su allo sambau, sutempo Mordekhai tantal᷊anna mammanara su wal᷊en araratuanna, ruan katou mamanaran ratu apan apianne, eteudde Bigtan wuṛṛu Teres, nabbaidda mappandumma mamate si Ratu Ahasyweros, ana waugu itarua lembon maddantinni tou.

²² Hol᷊aga udde niasingkatanni Mordekhai wuṛṛu i tou lapiddu namasingkatta si Ester. Ringannu tawe nallannu, Ester nabbatti'a su ratu apa apan niasingkatanni Mordekhai udde.

²³ Hatto udde nisaṛṛasiranna, ne niasingkatanna manungku aalae udde atonna. Taumata darua udde iṛṛuumanna niele. Uasul᷊ungngu parentan datu, arariadianna udde niwoṛṛetta sulal᷊ummu buken watti'u araratuanna.