ESTER 1 - WUKE SUSI WATTI'U AL᷊AL᷊USASSA

I Ratu Wasti nilumawangnga parentan i Ratu Ahasyweros

^1-2 Su Susan, inangngu soan Persia, Ahasyweros namarenta naola'a ratu. Araratuanne eteudde wuassu 127 propinsi, nanattakka wuassu India naddatingngu Sudan.

³ Su tonna atallune pamamarentane, Ratu Ahasyweros na'ola'a andeangnga wahewalla hunan anambon tenbonanne wuṛṛu mamanaran araratuanne. Manga tembonannu tantaran Persia wuṛṛu Media nirumanta lai su andeangnga udde, aroddi lai manga gubernure wuṛṛu manga piaṛṛa'u propinsi apan atanggaṛṛanne.

⁴ Annummu wul᷊anna al᷊annune ratu mammunga paa'alan wal᷊en araratuanne wuṛṛu al᷊aṛṛansangnga see awawantugu araratuanne.

⁵ Wua'udde ratu na'ola'e andeangnga apia hunan anambon tumana'a su Susan, mawae ala aroddi lai asiangnga. Andeangnga udde al᷊annune sangkamisa tuudda wuṛṛu niola'a su rallakku wal᷊en araratuanna ratu.

⁶ Rallakku wal᷊en araratuanna nilogaṛṛannu gorden wuassu mal᷊aṛṛenessa linen ma'elomma wuṛṛu mawira, niwa'issu tali linen al᷊ussa wuṛṛu ni'aitta su manga hal᷊asangnga sal᷊a'a apan ua'ele su manga diṛṛi pualan. Su al᷊ungnge niaddo manga rosobba wul᷊awanna wuṛṛu sal᷊a'a su wowon apampakku wal᷊en apan nilogaṛṛannu pualam mawira, hablur maṛṛammu, lammannu mutiara apan sussal᷊ol᷊otta wuṛṛu watu pirus ma'elomma.

⁷ Ratu nanaddia anggore manambo-nambo apan nitaṛṛo sulal᷊ummu manga piala wul᷊awanna apan manambo lihidde.

⁸ Mangaraho tawe nitumba'a anggorene ara'e niwata'a ma'inumma. Ratu buatte nangonggollu parenta su mangangimben wal᷊en araratuanna, tadea'u suapan raho imbeanna tumuṛṛuttu apulun sangkatou-sangkatou.

⁹ Tantal᷊anna udde Wasti, awingngu ratu, na'ola'a andeangnga lai hunan manga wawine sulal᷊ummu wal᷊en araratuanna.

¹⁰ Su allo appitune, ratu tantal᷊anna ma'inumma na'oman sara naapendamma tumaniten lulluassa. Ana waugu udde i tou namaggo siri pitu tembonanne apan niṛṛae maola'a mangngangimbene sassane; i mangitou eteudde Mehuman, Bizta, Harbona, Bigta, Abagta, Zetar wuṛṛu Karkas.

¹¹ I tou nandolokki mangitou mangapidda su saruanne Wo'i Wasti ringannu mahkota araratuanna su puane. Wo'i tumaniten maṛṛamagga, wuṛṛu ratu sarun mamasilon araṛṛamagge su manga tembonanne wuṛṛu anambon rahone.

¹² Arawe sutempo manga mangangimbe udde namasingkattu parentan datu si Wo'i Wasti, wo'i maddiri rumanta, na'oman sara ratu tumaniten nasa'u.

¹³ Ratu pia inanaramanna maddorongnga addapatta wuassu manga mapapande su ola'u tita wuṛṛu adatta. Ana waugu udde i tou namaggo manga mananantirone apan masingkatta apa apan ṛinone olaanna su ola'u hatto udde.

¹⁴ Manga mananantiro apan masokka waggoannu ṛatu eteudde: Karsena, Setar, Admata, Tarsis, Meres, Marsena wuṛṛu Memukan. I mangitou uddewe manga tembonannu Persia wuṛṛu Media apan pia aiananne matanggakka su araratuanna.

¹⁵ Unnu ratu su siri pitu taumata udde, “I ya'u buatte nandolokku manga mangangimbe'u inai ringanni Wo'i Wasti wuṛṛu mandoloki tou iaparanta ringangku. Arawe i tou maddiri. Tumuṛṛuttu tita, ṛuumanna apa apan ṛinone ionggolli ite si tou?”

¹⁶ Ne unni Memukan su ratu wuṛṛu manga tembonanne, “Ringannu inolaanna udde, wal᷊ine tumba'u Tuangnga apan buatte nilobbosanni Wo'i Wasti, ewe'e anambon mamanaran Tuangnga, ewe'e lai suapan taumata esakka su araratuanna indi!

¹⁷ Ana waugu inolaannu wo'i udde sarun asingkatannu anambon wawine, wuṛṛu i mangitou mangngaddio'e awingnge sambau-sambau. I mangitou sarun mabbisara manungku Tuangnga buatte namarenta si Wo'i Wasti tadea'u sumaruanna, arawe wo'i maddiri rumanta.

¹⁸ Nariaddi, amungkangngu manga awingngu tembonanne su Persia wuṛṛu Media naaringikka olangnge udde, i mangitou sarun masasaṛṛawutta mamasingkatta su awingngi mangitou sambau-sambau. Pangillul᷊eanne eteudde, wawine sarun lumawangnga parentan awingnge wuṛṛu awingnge sarun mandona wawine udde.

¹⁹ Ana waugu udde, i yami sumal᷊ande tadea'u Tuangnga manganu inappuanne manungku Wo'i Wasti tate wotongnge lai sumaruanna si Tuangnga. Inaappuanna udde ṛinone olaanna atoranna su Persia wuṛṛu Media, wuṛṛu tate wotongnge sawutanna apia. Wua'udde, aiannani Wo'i Wasti onggol᷊a'e su wawine waine apan mappianne wuassi tou.

²⁰ Napawe inaappuanni Tuangnga udde nassal᷊iawukke su ahewallu araratuanna apan wahewalla indi, suapan wawine sarun mangaddatta awingnge, mawae ala aroddi lai asiangnga.”

²¹ Darorongngi Memukan udde nitarimmattu ratu wuṛṛu manga tembonanne, ne ratu lapiddu napaamattu atoranna udde.

²² I tou nangirimmu suratta su anambon propinsin araratuanna, sulal᷊ummu sasinaukka wuṛṛu woṛṛettu propinsi udde sambau-sambau. Parenta udde tingikke manungku sulal᷊ummu suapan amonanna, ete esakka apan ṛinone maola'a tembonanne, wuṛṛu sarun wotongnge manganu al᷊awo'u iaappuanne.