EFESUS 6 - WUKE SUSI WATTI'U AL᷊AL᷊USASSA

Al᷊aṛṛana'a wuṛṛu hagurangnga

¹ Manga al᷊aṛṛana'a! Maola'a mallal᷊aṛṛenggenni Kristus, paatuṛṛuta hagurangngu ana waugu eteudde apan ṛinone olaannu.

² “Pangaddatta si papanu ruam mamanu” eteudde parentan Duata paarorone ringannu paaire,

³ eteudde: “Tadea'u i'o su al᷊al᷊uassa wuṛṛu uukku mal᷊o'engnga su runia indi.”

⁴ Manga tuṛṛangnga apan naola'a iamangnga! Imbaṛṛanga walate apulu ma'inolaanna al᷊aṛṛanangngu, ma'oman sara naungngi mangitou masa'u. Arawe paddul᷊ianete i mangitou ringannu mapia wuṛṛu ringannu al᷊aṛṛa'u Mawu.

Allangnga wuṛṛu mawune

⁵ Manga tuṛṛangnga apan naola'a allangnga! Paatuṛṛuta parenta mawunu su runia indi. Olaawe udde ringannu apendamma maaddata wuṛṛu matuṛṛuta ringannu atonna-tonna naal᷊ihida ere a'olaanni yamiu si Kristus sassane.

⁶ Arie ma'ola'a aroddi tumba'u su tempo i yamiu aellehanna, tumba'u ana see maasomba daralo wuassu taumata. Arawe ṛinone i yamiu ma'ola'a udde ere sangkatou allangngi Kristus apan tantal᷊anna tuttuṛṛuta apulun Duata ringannu ahewallu naungnga.

⁷ Manara apan a'ola'anni yamiu ere sangkatou allangnga udde ṛinone i yamiu mammanara ringannu naungnga mal᷊uassa su Mawu apan a'imbeanni yamiu, wuṛṛu tawe tumba'u su taumata.

⁸ Paanaunge manungku suapan taumata, mawae allangnga ara'e taumata tawe allangnga, sarun manengkamma wawal᷊inne wuassu Mawu su inolaanna mapia apan niola'i tou.

⁹ Manga tuṛṛangnga apan naola'a mawu! Ṛinone pallal᷊agun kamiu aroddi lai su saruannu manga allangngu. Ariete mappaattu wawansaga. Paanaunge manungku i yamiu wuṛṛu manga allangngu udde, uasul᷊ungnga pia sangkatou mawu, eteudde Mawu apan su surga. I Tou tawe mamile hati.

Ahiddu Mawu apan nasuungnga

¹⁰ Pangudusanne, ṛinone i yamiu maola'a matohassa ringannu atatohassa apan niasombanganni yamiu wuassu Mawu, ana waugu i yamiu uaaukka ringanni Tou.

¹¹ Paata'e al᷊awo'u peddetu pangalo apan nionggolu Ruata si'o, tadea'u i yamiu wotongnge mando'appa apapande apan lal᷊eo wuassu Setanna.

¹² Ana waugu i ite mammanara, wal᷊inewe lumawangnga atatohassu manga setanna apan uaparenta su tempo apan lel᷊eo indi. I ite lumawangnga atatohassu manga ghaṛṛaho lal᷊eo apan uaparenta winalanganna.

¹³ Ana waugu udde, orassa indi, luṛṛea'e al᷊awo'u peddetu pangalon Duata, tadea'u su allo apan lal᷊eo udde, i yamiu wotongnge lumawangnga lal᷊aṛṛagu seetta. Wuṛṛu tadea'u napawe i yamiu mammangalo saran pangudusanne, i yamiu ta'e matohassa.

¹⁴ Ṛinone i yamiu mangke uatehamma. Paata'e tatuṛṛuta su Ruata maola'a aiitta lawassa, wuṛṛu atatul᷊idda maola'a laungngu wuassu atta'a.

¹⁵ Ṛinone i yamiu sidutu mabbatti'u Watti'u Al᷊al᷊uassa apan mangngapiddu paddarame maola'a aampakku leddanu.

¹⁶ Suapan tempo paata'e pangangimannu su Mawu maola'a sambau ahidda lal᷊induma; ringannu pangangimanna udde i yamiu wotongnge maapaddumma anambon anaanna pia putungnge wuassu setanna.

¹⁷ Anute asasal᷊amatta udde maola'a sambau araposa waja, wuṛṛu wisara Ruata maola'a sambau hal᷊ele wuassu Ghaṛṛahon Duata.

¹⁸ Ola'e sarangkanambone udde, lapiddu u'al᷊iomanna maddorongnga tul᷊ungannu Duata. Su al᷊o'engngu tempo, aal᷊iomante su ereapa Ghaṛṛahon Duata ua'ehetta si yamiu. Ṛinone i yamiu sidutu uatehamma wuṛṛu arie i yamiu mangillol᷊o. Aal᷊iomante sidutu hunan anambon al᷊aṛṛana'u Ruata.

¹⁹ Wuṛṛu aal᷊iomante lai hunan kamiu, tadea'u su tempo i ya'u mabbisara, Ruata mangonggola si ya'u manga wisara apan naṛṛino. Wuṛṛu tadea'u ya'u ringannu waṛṛani wotongnge mabatti'u addappingu Watti'u Al᷊al᷊uassa udde.

²⁰ Ana waugu ete Watti'u Al᷊al᷊uassa udde, i ya'u naola'a sangkatou daroloṛṛanna, wuṛṛu orassa indi sulal᷊ummu tuttupanna. Aal᷊iomante tadea'u i ya'u waṛṛani mabbisara su ola'u Watti'u Al᷊al᷊uassa udde, su ereapa i ya'u ṛinone mabbisara.

Tabea pangudusanne

²¹ Tikhikus, tuṛṛangi ite wuṛṛu mangangimbe apan matuṛṛutta sulal᷊ummu manara Mawu, sarun mamasingkata si yamiu al᷊awo'u inolaangku, tadea'u i yamiu masingkattu ola'u watangangku wuṛṛu manara'u.

²² Ana waugu udde i ya'u nandolokki tou ringanni yamiu mamasingkatu ola'i ami si yamiu sarangkanambone, tadea'u naungngu mal᷊uassa.

²³ Sal᷊andeanna su Ruata Iamangnga, wuṛṛu Mawu Yesus Kristus mamalan anambon jamaatta uaaukka wuṛṛu uararangngu wuṛṛu sidutu mangngimanna si Kristus.

²⁴ Sal᷊andeanna Ruata sarun mangal᷊amatta si yamiu sarangkanambone apan mandangngu Mawun kite Yesus Kristus ringannu darangngu apan tawe masue. Tabea wuassi yami, Paulus