EFESUS 2 - WUKE SUSI WATTI'U AL᷊AL᷊USASSA

Wuassu papate mattudan awawiakka

¹ Dorone i yamiu natete sulal᷊ummu pangangimanna ana waugu i yamiu marosa wuṛṛu nilumawangnga manga parentan Duata.

² Su tempo udde yamiu tuttuṛṛuta al᷊awo'u apulun dunia indi; eteudde i yamiu matuṛṛutta su tembonannu winalanganna, eteudde ghaṛṛaho apan marosa indi uaintaṛṛo sulal᷊ummu naungngu manga taumata apan maddiri tumuṛṛutta Ruata.

³ Dorone i ite sarangkanambone lai uasul᷊ungngi mangitou; i ite mabbiakka tuttuṛṛuta pallal᷊agun kite taumata wuṛṛu mammanara manara apan maal᷊uassa wadangnga wuṛṛu ṛingiṛṛanni ite. Su tempo udde i ite naola'a manga taumata apan niaṛṛiaannu asasa'un Duata, ere lai manga taumata waine.

⁴ Arawe aroddi ahewalle darangngun Duata! I Tou aroddi marangngu si ite,

⁵ na'oman sara su tempo i ite ta'e nate sulal᷊ummu ghaṛṛaho ana waugu manga lal᷊awangngi ite, i Tou napaawiakki ite apia su sambau ringanni Kristus. Nariaddi tumba'u apapia naungngu Ruata i yamiu naasomba asasal᷊amatta.

⁶ Ana waugu i ite uaaukka ringanni Kristus Yesus, Ruata napaawiakki ite apia su sambau ringanni Tou, tadea'u i ite mamarenta lai suadio'a ringanni Tou sulal᷊ummu surga.

⁷ Ruata na'ola'a udde tadea'u su tempo apan addantane, taumata wotongnge maasilo aroddi ahewalle darangngun Ruata. Darangngu udde niapaasilon Duata sulal᷊ummu apapia naung-Nge si ite sulal᷊ummi Kristus Yesus.

^8-9 Ruata niumakkani yamiu, ana waugu udde i Tou nanal᷊amatta si yamiu, ana waugu i yamiu mangngimanna Mawu Yesus. Asasal᷊amatti yamiu udde wal᷊inewe asombangu asasahaddu sassane. Sarangkanambone udde aonggolu Ruata. Nariaddi, tawe saran sangkatou apan wotongnge mamungan watanganne su olangnge udde.

¹⁰ Ete i ite indi riadiannu Ruata, wuṛṛu wuassi Kristus Yesus, Ruata na'ola'a si ite, tadea'u i ite mammanara manga inolaanna apan mapia apan buatte nissaddian Tou si ite.

Su sambau ana waugu Kristus

¹¹ Manga tuṛṛangnga apan wal᷊ine Yahudi! Paanaunge ririnu su tempo rorone: I yamiu isassaggo “taumata tawe nissunatta” unnu taumatan Yahudi apan mangnga'u ririne suete nissunatta (pandumanne apan buatte naasomba tatiala niola'u taumata su wadangngi mangitou).

¹² Su tempo udde i yamiu tawe uaaukka ringanni Kristus, i yamiu taumata lo'a apan tawe nasutta su walahanna apan nipile Ruata. I yamiu tawe nasutta sulal᷊ummu paaire apan niola'u Ruata ringannu pabbawala-Ge. I yamiu mabbiakka sulal᷊ummu runia indi tawe antimma wuṛṛu tawe Ruata. I yamiu tawe nasutta sulal᷊ummu paaire apan niola'u Ruata ringannu walahanna-Ne. I yamiu mabbiakka sulal᷊ummu runia indi tawe antimma wuṛṛu tawe Ruata.

¹³ Arawe orassa indi, ana waugu i yamiu suete naaukka ringanni Kristus Yesus, i yamiu apan dorone marau, buatte niapaarani ana waugu papaten Kristus.

¹⁴ Ana waugu Kristus sassane mandaramen kite. I Tou napaaukku manga taumatan Yahudi wuṛṛu manga taumata wal᷊ine Yahudi naola'a sambau walahanna. Tanda'a passaranna su wallatti mangitou, eteudde pasaseetta, buatte niṛṛimunsa'i Kristus ringannu nanantillu watangan-Ne sassane.

¹⁵ Titan agama Yahudi ringannu manga parenta wuṛṛu manga atoranne buatte nipappasi Kristus tadea'u walahanna darua udde maola'a sambau walahannu taumata wakku, apan uaaukka ringanni Tou. Ringannu olangnge udde Kristus nangapiddu paddarame.

¹⁶ Wuassu papate-Ne su alu arussa, Kristus napaaukku walahanna darua udde, wuṛṛu nandamen mangitou ringannu Ruata, na'oman sara nawul᷊ite pasaseetta udde.

¹⁷ Ana waugu udde Mawu Yesus nirumanta namasingkattu Watti'u Al᷊al᷊uassa su ola'u paddarame udde si yamiu; mawae si yamiu wal᷊ine taumatan Yahudi apan rorone marau wuassu Ruata, ara'e lai su taumatan Yahudi apan marani Ruata.

¹⁸ Sulal᷊ummi Kristus, i ite sarangkanambone – mawae taumatan Yahudi ara'e taumata wal᷊ine Yahudi – wuassu Ghaṛṛahon Duata man sambau, wotongnge mangundanin Iamangnga.

¹⁹ Ana waugu udde, i yamiu tate lai nasutta taumata lo'a ara'e taumatan liudde. Orassa indi yamiu nareengke walahannu Ruata. I yamiu lai naola'e al᷊aṛṛana'u lal᷊oṛṛon araratuannu Ruata.

²⁰ I yamiu lai suete niapararisikka su rapappakke apan niaddo manga rasul wuṛṛu manga nabi, ringanni Kristus Yesus sambau watu apan apianne.

²¹ Ete i Tou apan nangatokku ahewallu wal᷊e udde naola'a Wal᷊en Duata apan tumba'u hunane su Mawu.

²² Ana waugu mabbiakka uaaukka ringanni Kristus, i yamiu lai tantal᷊anna iapararisikka su sambau ringannu manga taumata waine maola'a sambau Wal᷊en Duata; isudde Ruata uatana'a ringannu Ghaṛṛaho-Ne.