DARALO 95 - WUKE SUSI WATTI'U AL᷊AL᷊USASSA

Antari ipaddalo

¹ Wette i ite mangantari maddalo Mawu, lullala'a su mananal᷊amatti ite!

² Wette i ite sumaruanna si Tou ringannu antari aadiangkamanna, lumala'u Mawu ringannu aantarin daralo.

³ Ana waugu Mawu uddewe Ruata apan mawantuga, Ratu matohassa apan uataṛṛino su al᷊awo'u monganna.

⁴ I Tou uataṛṛino manga wageange alal᷊umanne su runia, manga puiddu wowone lai tatahuanan-Ne.

⁵ I Tou uataṛṛino tahal᷊oangnga; ana waugu i Tou ma'aolangnge, ammaranne lai lanna'u lima-Ne.

⁶ Wette i ite umal᷊intudda massubba si Tou, umal᷊intudda su saruannu Mawu, nandiaddi si ite.

⁷ Ana waugu ete i Tou Ruatan kite, i ite al᷊aṛṛana'a apan papadul᷊ianan-Ne, naal᷊ihidda domba lal᷊u'aran-Ne. Su allo indi paddaringikke ṛenggetan-Ne:

⁸ “Imbaṛṛangnga tawe maddaringikka ere al᷊amonanu su Meriba, ere sutempo i mangitou su Masa, su wadda'a.

⁹ Poiaroddi i mangitou mannal᷊u'atta si Ya'u, salaiwe naasilote inolaang-Ku.

¹⁰ Appatu pul᷊o su tonnane al᷊annune i Ya'u nuallen mangitou; wisara-U: Atonna, walahanna udde mal᷊awangnga! I mangitou tawe maddaringikka manga parenta-U.

¹¹ Ne i Ya'u nassalu sulal᷊ummu asasa'u-U, i mangitou sarun tawe maasutta su wanua udde maddea'a maasomba pangillol᷊oanna suadio'a ringang-U.”