DARALO 91 - WUKE SUSI WATTI'U AL᷊AL᷊USASSA

Sulal᷊ummu lu'addu Ruata

¹ Taumata apan uatillumma su Apan Atanggaṛṛanne, wuṛṛu uatana'a sulal᷊ummu lu'addu Apan Lembontaṛṛino,

² wotongnge mabbisara su Mawu, “Ete I'o mangangambangku wuṛṛu mandariaga'u, Ruata'u, tumba'u Si'o i ya'u mangimanna.”

³ I'o sarun ipallossu Mawu wuassu asasilaka apan awagananna, wuṛṛu wuassu radda'a apan maapate.

⁴ I Tou sarun massirungnga si'o ringannu papaiddu Mawu, na'oman sara i'o mal᷊angnganna su al᷊ung-Nge; apapia-Ne naal᷊ihidda allungnga apan uasirungnga si'o.

⁵ I'o ariete paata'uttu asasilaka sutempo maṛabbi, ara'e pangalo awagananna sutempo allo;

⁶ asasilaka apan sarun rumanta sutempo marandumma, ara'e ahahohakka apan maṛṛia'a sutempo allattune.

⁷ Salaiwe saṛṛiwu su atoune mate su sandiṛṛannu, wuṛṛu mappul᷊o ṛiwu su atoune su aikkatannu, arawe i'o sassane tawe mal᷊essa.

⁸ Napawe i'o ma'ellega uapal᷊iwutta si'o, i'o maasilo taumata lal᷊eo naṛṛinoannu wawal᷊issa.

⁹ Ana waugu i'o na'ola'a Mawu mangangambangu, Apan Atanggaṛṛanne niola'a passirungannu.

¹⁰ Ne i'o tawe aṛṛiaannu asasilaka, wal᷊enu sarun tawe arantannu asasusa.

¹¹ Ruata nandolokku mala'ekan-Ne mallu'adda si'o, niapariaga si'o su al᷊awo'u tampa apan amatannu.

¹² I mangitou sarun manduinnu su pal᷊addu limane, tadea'u leddanu tawe matara su watu.

¹³ I'o sarun lumepangnga atoanna wuṛṛu singa, manaidanna singa anangnge wuṛṛu atoanna mawisa.

¹⁴ Unnu Mawu, “Taumata apan mandangngu si Ya'u sarun Ta'u iapasal᷊amatta, apan nanga'u si Ya'u sarun Ta'u lu'aranna.

¹⁵ Amungkangu i tou sumal᷊ande si Ya'u, i Ya'u sarun sumimbakka si tou. Sutempon asasusa, i Ya'u sarun umontolla si tou; i tou sarun Ta'u iliu wuṛṛu Ta'u onggol᷊anna aaddata.

¹⁶ I Tou sarun Ta'u onggol᷊annu uukka mal᷊o'engnga, wuṛṛu Ta'u iapasal᷊amatta.”