DARALO 90 - WUKE SUSI WATTI'U AL᷊AL᷊USASSA

WUKE AIAPPANE: DARALO 90–106 Ruata, tampa pattillummannu taumata

¹ Aal᷊iomanni Musa, allangngu Ruata. Oh Mawu, ete I'o tampa pattillumanni yami sara maṛṛawa mappulunna.

² Ro'en manga wowone taambe niola'a, ro'en leta'a wuṛṛu runia taambe niriaddi-Nu, ete I'o Ruata apan sarangkal᷊o'engnge, tawe panattaṛṛanne wuṛṛu tawe pangudusanne.

³ I'o nandolokku taumata niapawelenga su pina'olaanne, nabbal᷊i awu ere paarorone.

⁴ Si'o saṛṛiwu su tonnane naal᷊ihidda allo nassallo, allo naaṛṛabbi nal᷊iute; naal᷊ihidda tatingiddu riaga sutempo ṛabbi.

⁵ I'o napa'elekki yami; i yami naal᷊ihidda su wal᷊iawa, naal᷊ihidda nannal᷊o apan nassolla;

⁶ sutempo marua allo i tou tuttuwo wuṛṛu matti'akka, arawe tumulongnga sutempo mawawallo.

⁷ I yami niṛṛumindu'u asasa'u-Nu, wuṛṛu nasue nate su al᷊al᷊eon naung-Ngu.

⁸ I'o namilattu pasasal᷊an kami su saruan-Nu, rosan kami apan uawuni niasiloan-Nu.

⁹ Wiakki yami maautta ana waugu asasa'u-Nu, manga tonna pabbiaṛṛanni yami nasue ere sasangngo.

¹⁰ Tempo ipabbiakki yami tumba'u pitu pul᷊o su tonnane, amungkangu i yami matohassa, ual᷊u pul᷊o su tonnane. Arawe tumba'u asasusa wuṛṛu uatataṛṛangnga apan niasombanganni yami; napawe buatte nabbiakka maautta, ne i yami lai nawul᷊ite.

¹¹ Isai apan wotongnge maaillal᷊a ahewallu asasa'u-Nu, ara'e naatutukke pangillul᷊eannu asasa'u-Nu?

¹² Patutuṛṛaawe aauttu wiakki yami indi tadea'u maola'a taumata apan mapia.

¹³ Oh Mawu, sara tingngera I'o masa'u? Pabbelengke wuṛṛu akkanaawe manga allang-Ngu.

¹⁴ Onggol᷊aawe darangngu-Nu si yami suapan marua allo, tadea'u i yami sidutu lullala'a wuṛṛu mangngantari su al᷊o'engngu pabbiaṛṛanni yami.

¹⁵ Onggol᷊aawe si yami al᷊al᷊uassa uasul᷊ungngu asasusa apan papasannanni yami sulal᷊ummu manga tempon asasusa.

¹⁶ Pal᷊iatta'e manara-Nu si yami manga allang-Ngu, wuṛṛu taṛṛino-Nu apan maṛṛamaga su papapulunni yami.

¹⁷ Oh Mawu Ruatan kami, al᷊amatewe i yami, tadea'u al᷊awo'u manaran kami pia gessine.