DARALO 9 - WUKE SUSI WATTI'U AL᷊AL᷊USASSA

Aal᷊iomanna adiangkamanna ana waugu atatul᷊iddu Mawu

¹ Su piaṛṛa'u mangangantari. Tumuṛuttu aantarin Mut-Laben. Daralon Daud.

² Ringannu ahewallu naunga i ya'u maadiangkamanna Si'o, Mawu, wuṛṛu mamasingkattu manara-Nu apan maatiangnga.

³ I ya'u maapulu lumuassa wuṛṛu lumala'a ana waugu I'o wuṛṛu maddalo aran-Nu, Mawu Apan Atanggaṛṛanne.

⁴ Su saruan-Nu seetta nabelengnga wuṛṛu tinumal᷊angnga; i mangitou nanawo natara wuṛṛu nate.

⁵ Ana waugu I'o mammarenta naola'a mallaṛṛuungnga apan matul᷊idda; I'o buatte nanahekku hatto'u.

⁶ I'o buatte nakkuumannu manga walahanna wuṛṛu namate manga taumata lal᷊eo; i mangitou timbul᷊iananna saran mal᷊annu-l᷊annu.

⁷ Seetti yami nasute niṛṛadda'a, manga soan mangitou pinakkimunsang-Ngu; tateddu mannaungnga lai.

⁸ Mawu mamarenta saran mal᷊annu-l᷊annu; I Tou napararisikku araratuan-Ne ipakkuungu runia.

⁹ I Tou uaparenta al᷊awo'u walahanna ringannu atatul᷊idda wuṛṛu makkuungngi mangitou ringannu ṛinone.

¹⁰ Mawu udde tampa pattillummannu taumata apan aumpisananna, tampa passirunganna sutempon asasusa.

¹¹ Taumata apan maailal᷊a Si'o uaantimma Si'o, oh Mawu, taumata apan massubba Si'o sarun tawe itantang-Ngu.

¹² Paddalote Mawu apan uaparenta su Sion! Wattia'e inolaan-Ne su manga walahanna!

¹³ Ana waugu i Tou uanaungnga taumata apan uatatarangnga wuṛṛu tawe maabul᷊in sasal᷊iomanni mangitou; taumata apan lullawangnga sarun iṛṛuuman-Ne.

¹⁴ Pa'ellege, seetta mannansara si ya'u; akkanaawe i ya'u, oh Mawu, liuaawe i ya'u wuassu papate,

¹⁵ tadea'u i ya'u maddalo Si'o su saruannu tumana'u Yerusalem. I ya'u sarun lumala'a lulluassa ana waugu I'o nanal᷊amatta si ya'u.

¹⁶ Manga walahanna apan tawe maaillal᷊a Si'o manawo sulal᷊ummu loṛangnga apan nial᷊in mangitou sassane; i mangitou nul᷊ussa sulal᷊ummu seddan mangitou sassane.

¹⁷ Mawu buatte napal᷊iatta'u watangan-Ne ana waugu raṛṛawen-Ne apan matul᷊idda. Taumata lal᷊eo nawontolla sulal᷊ummu inolaanne sassane.

¹⁸ Papate eteudde panginsueannu manga taumata lal᷊eo, manga walahanna apan tawe maddaringikka Ruata.

¹⁹ Tawe sarangkal᷊oengnge taumata asiangnga timbul᷊iananna; tawe sarangkal᷊o'engnge taumata su asasusa tawe antimma.

²⁰ Darisikke, Mawu, paṛṛuungken manga walahanna, arie pabbala'a taumata mammungan batanganne.

²¹ Wala'e i mangitou mabbal᷊i matta'utta, oh Mawu wuṛṛu maatutukka manungku i mangitou tumba'u taumata.