DARALO 89 - WUKE SUSI WATTI'U AL᷊AL᷊USASSA

Aantari sutempo niaṛṛiaannu asasilaka

¹ Aantari tatatinron Etan, taumatan Ezrahi.

Apapian Mawu Apan Lembontaṛṛino

² Darangngu-Nu, Mawu, ta'ute iantari su al᷊o'engngu allo, apapia-Nu sarun ta'u iwatti'a sara maṛṛawa mappulunna.

³ Ana waugu i ya'u masingkatta darangngu-Nu tawe panginsueanne, apapia-Nu matohassa ere langitta.

⁴ I'o nabbisara, “I Ya'u buatte na'ola'a paaire ringannu taumata apan nipile-U; i Ya'u buatte nassalu si Daud, allang-Ku;

⁵ ‘Araratuannu sarun Ta'u itenega saran mal᷊annu-l᷊annu, ana'a pulunnu sarun mamanua isudde.’ ”

⁶ Ammul᷊annu surga maddalo manga inolaan-Nu apan maatiangnga, wuṛṛu mangngantarin apapia-Nu, Mawu.

⁷ Su langitta tawe sul᷊ungnge ere I'o, oh Mawu, tawe riaddiannu surga apan uasul᷊ung-Ngu.

⁸ I'o aaddatanna su ammul᷊annu taumata susi, iaata'utta wuassu anambon sarangkamabone apan marani-Nu.

⁹ Mawu, Ruata Apan Lembontaṛṛino, isai pia atohassa ere I'o? I'o mapia sulal᷊ummu al᷊awo'a oh Mawu.

¹⁰ I'o uataṛṛino tahal᷊oangnga apan mattandi'a, wuṛṛu napal᷊enakku luangnge apan wahewalla.

¹¹ Rahab, atoannu tahal᷊oangnga, niṛṛimunsang-Ngu wuṛṛu nipate-Nu, ringannu ta'iakka matohassa I'o namaddon manga seen-Nu.

¹² Langitta wuṛṛu runia uddewe pussa'a-Nu, runia ringannu al᷊awo'u lal᷊oṛṛone niolang-Ngu.

¹³ Ete I'o apan na'ola'a sawannakka wuṛṛu timukka, Wowon Tabor wuṛṛu Hermon lullala'a maddalo Si'o.

¹⁴ Aroddi ahewalle taṛṛino-Nu, wuṛṛu aroddi ahewalle atatohan-Nu!

¹⁵ Atatul᷊idda wuṛṛu tita uddewe sasariannu araratuan-Nu, darangngu wuṛṛu apapia nilumiatta'a sulal᷊ummu al᷊awo'u manara-Nu.

¹⁶ Lal᷊umanna'a su taumata apan mattaṛṛamawu ringannu lal᷊uassa, apan mabbiakka sulal᷊ummu semakku daranta-Nu, Mawu.

¹⁷ Su al᷊o'engngu allo i mangitou lullala'a wuṛṛu sidutu matohassa, ana waugu apapia-Nu.

¹⁸ I'o nangonggolla si yami auntunganna apan wahewalla, ana waugu ete apapia-Nu i yami naauntungnga.

¹⁹ Ana waugu mallal᷊u'adda si yami uddewe taumata Nipile-Nu, oh Mawu; ratun kami uddewe pussa'an Duatan Israel apan Susi.

Paairen Duata si Daud

²⁰ Sutempo dorone sulal᷊ummu sambau sondappa, I'o nabbisara su manga allang-Ngu apan matuṛṛutta, “I Ya'u buatte nantul᷊ungngu sangkatou atumannaṛṛane, sangkatou apan Ta'u nipile wuassu tumana'u soa apan Ta'u nitanggakka.

²¹ I Ya'u naasangkalle si Daud, allang-Ku, wuṛṛu Ta'u nitenega i tou ringannu lanan lal᷊aghu.

²² Atatoha-U sidutu ual᷊u'adda si tou, taṛṛino-U mannohassa si tou.

²³ I Tou tawe iawaddon seetta, wuṛṛu tawe allangannu taumata lal᷊eo.

²⁴ Anambon seenne sarun Ta'u pateanna, Ta'u pateanna isai-sai apan maddantinni tou.

²⁵ I Ya'u sidutu mandangngu si tou wuṛṛu mapia si tou, wuṛṛu ma'ola'a si tou lembon uataṛṛino.

²⁶ Araratuanne sarun Ta'u hewal᷊anna, wuassu Tahal᷊oangngu Tangngane maddatingngu Sal᷊ukku Efrat.

²⁷ I Tou sarun mabbisara si Ya'u, ‘Ete I'o Iamangku, Ruata'u, mallal᷊u'adda wuṛṛu mananal᷊ama'u.’

²⁸ I Ya'u sarun ma'ola'a si tou ana-U esakka pahul᷊une, apan awantuhanne suwallattu anambon ratu.

²⁹ I Tou sarun Ta'u rangnguanna saran mal᷊annu-l᷊annu, paaire-U si tou sidutu matohassa.

³⁰ Araratuanne sarun Ta'u itahekka su al᷊o'engngu langitta ta'e su wowon dunia, maṛawa mappulunna anangnge pulunna sarun mamanua isudde.

³¹ Arawe amungkangu papapulunne lumawanga tita-U, wuṛṛu tawe mabbiakka tumuṛṛuttu parenta-U,

³² amungkangu i mangitou tawe maddaringikka tita-U wuṛṛu maddiriten atorang-Ku,

³³ i mangitou Ta'u iṛṛuumanna ringannu puul᷊anna ana waugu lal᷊awangnge, wuṛṛu Ta'u emaannu asasilaka ana waugu manga rosane.

³⁴ Arawe i Ya'u sidutu marangngu si Daud, wuṛṛu tawe mabbasangkallu apapia-U.

³⁵ Paaire-U si tou tawe Ta'u ul᷊eanna apia, wuṛṛu paaire-Ku tawe saran sambau Ta'u anuanna apia.

³⁶ Paassa saran mal᷊annu-l᷊annu i Ya'u massalu ringannu arang-Ku apan susi; i Ya'u tawe mamahia si Daud.

³⁷ Araratuanne sarun mattaṛṛangnga al᷊annune ta'e pia matannallo, maṛṛawa mappulunna ana'a pulunne sarun mamanua isudde.

³⁸ Araratuanne sidutu tawe mawul᷊i ere wul᷊anna, tatiala mapia su winabbawa.”

Lal᷊uai su ararugin ratu

³⁹ Arawe orassa indi I'o nasa'u ratu, I'o nandamme wuṛṛu nanol᷊a'u taumata apan nipile-Nu.

⁴⁰ Tawe naasassu paaire-Nu su allang-Ngu, araposan araratuanne niramme-Nu sulal᷊ummu labbo.

⁴¹ Niṛṛa'a-Nu manga darandungu soane, manga tanda'a watune niolang-Ngu ete nallambe tuidda.

⁴² Anambon taumata apan sinumabbi nangaṛṛo darotongnge, i tou nabbal᷊i paaeettu al᷊indonganne.

⁴³ I'o nangonggolu auntunganna su manga seenne, wuṛṛu na'ola'a anambon ro'amme lullala'a.

⁴⁴ Ewe'e lai ahidde lutangnga niolang-Ngu tawe niapaatta, I'o tawe nangontolla si tou sulal᷊ummu pangalo.

⁴⁵ I'o nanginsue taṛṛinone apan tinumelengnga, araratuanne niramme-Nu su leta'a.

⁴⁶ I'o nangautta patatingumabasane, wuṛṛu nanaappa si tou ringannu asasili.

Aal᷊iomanna sumal᷊ande apapallossa

⁴⁷ Sara apa tempone I'o ma'imbuni, oh Mawu? Sara tingngera asasa'u-Nu lukkenggamma ere putungnga?

⁴⁸ Naungewe i ya'u aroddi aaunne wia'u indi, I'o nandiadi taumata sangkatou riadianna apan wotongnge mate.

⁴⁹ Isai apan sidutu wotongnge mabbiakka wuṛṛu tawe mate? Isai apan wotongnge mal᷊iu wuassu lal᷊abbinganna?

⁵⁰ Oh Mawu, suapa tatialan darangngu-Nu paarorone, apan nipa'ire-Nu si Daud ana waugu apapia-Nu?

⁵¹ Naungete oh Mawu, ereapa manga allang-Ngu indi aal᷊uandahanna, i ya'u uapasanna lal᷊obbossu manga walahanna.

⁵² Manga seen-Nu mallobbossa ratu nipile-Nu, oh Mawu, mangngal᷊uandaga si tou suapan amatanne.

⁵³ Paddalote Mawu saran mal᷊annu-l᷊annu. Ariaddite aroddi! Amin!