DARALO 88 - WUKE SUSI WATTI'U AL᷊AL᷊USASSA

Aal᷊iomanna madorongnga aontolla

¹ Aantari. Daralon ṛuanganni Korah. Su piaṛṛa'u mangangantari. Tumuṛṛuttu aantari: Mahalat Leanot. Aantari tatantiron Heman taumatan Ezrahi.

² Oh Mawu, Ruata apan nanal᷊amatta si ya'u, sutempo allo i ya'u sussal᷊ande Si'o, sutempo ṛabbi ya'u sussaruanna Si'o.

³ Antimanna aal᷊iomangku maddatingnga ringan-Nu, daringiṛṛewe sasal᷊ande'u.

⁴ I ya'u niaṛṛiaannu manambo asasusa; papate uddete marani.

⁵ I ya'u naal᷊ihidda taumata apan sumossokke su loṛṛangngu labbinga, taumata apan niasueannu ikkatta.

⁶ I ya'u tinantangnga suwallatu taumata nate, naal᷊ihidda taumata niapate, ual᷊allowanga sulal᷊ummu labbinga, naal᷊ihidda taumata apan nitimbul᷊ianan-Nu, taumata apan tawe niontol᷊an-Nu apia.

⁷ I'o nanuntungku watukku loṛṛangnga apan malal᷊umma, watukku loṛṛangngu labbinga apan malal᷊umma wuṛṛu marandumma.

⁸ Asasa'u-Nu uaumpisanna si ya'u ringannu mawakkata, i ya'u naṛṛimunsa'a niaumpisanannu asasa'u-Nu.

⁹ Niaparau-Nu manga hawe'u wuassia'u, wuṛṛu i Ya'u niolang-Ngu maddantinni mangitou. I ya'u nataṛṛote wuṛṛu tate maasabbangnga,

¹⁰ mata'u nabbal᷊i mal᷊abbukka ana waugu asasansara, Miallo-miallo i ya'u sussal᷊ande Si'o, Mawu, wuṛṛu u'al᷊iomanna ringannu lima uawilatta.

¹¹ Apa I'o na'ola'a al᷊aṛṛindu'a su taumata nate? Apa i mangitou nabbiakka wuṛṛu naddalo Si'o?

¹² Apa darangngu-Nu niapasingkatta sulal᷊ummu labbinga, wuṛṛu apapia-Nu sutampan papate?

¹³ Apa piaddu maasingkatta al᷊aṛṛindu'u Mawu sulal᷊ammu ararandumma, ara'e apapia-Nu su wanuan taumata apan tinimbul᷊iananna?

¹⁴ Arawe i ya'u sumal᷊ande tatul᷊ung-Ngu, oh Mawu, suapan marua allo i ya'u u'al᷊iomanna Si'o.

¹⁵ Oh Mawu, anio I'o nanol᷊a'u? Anio I'o namiṛṛun hati-Nu wuassia'u?

¹⁶ Ro'en ta'e dario'a i ya'u su asasusa wuṛṛu lal᷊ingeannu papate, i ya'u uasal᷊arenga uapasanna ṛuuman-Nu.

¹⁷ Asasa'u-Nu apan wahewalla nakkimunsa'a si ya'u; pangalo-Nu apan wahewalla naapate si ya'u.

¹⁸ Su al᷊o'engngu allo asasa'u-Nu naal᷊ihidda manawangnga uapal᷊iwutta si ya'u, ual᷊iwunna si ya'u wuassu al᷊awo'u tampa.

¹⁹ Manga hawe'u ate iaparau-Nu wuassi ya'u, tumba'u ararandumma uaringanna si ya'u.