DARALO 84 - WUKE SUSI WATTI'U AL᷊AL᷊USASSA

Ṛintulu su Wal᷊en Duata

¹ Su piaṛṛa'u mangangantari. Tumuṛṛuttu antari: Gitit. Daralon ṛuanganni Korah.

² Tumaniten maal᷊uassa tampa atatanaan-Nu, oh Ruata Apan Lembontaṛṛino!

³ Naungku tumaniten luṛṛintulun Wal᷊en-Nu, ṛimuuddu waddangku lullala'a su Ruata apan wiakka.

⁴ Ewe'e lai bakiangnga naasomba wal᷊ene wuṛṛu sanggelokka naasomba sal᷊akka, tampa i mangitou mangaddon anangnge maranin mezbah-Nu, oh Mawu Apan Lembontaṛṛino, Ratu'u wuṛṛu Ruata'u.

⁵ Lal᷊umanna'a eteapa su taumata apan uatana'a su Wal᷊en-Nu, wuṛṛu sidutu mangngantarin daralo Si'o.

⁶ Lal᷊umanna'a su taumata apan naasomba atatohassa wuassu Mawu, wuṛṛu pia naungnga inai watukku Wowon Sion.

⁷ Tantal᷊anna i mangitou u'amatta su wawal᷊annu Baka, tampa udde niwal᷊un mangitou nabbal᷊i al᷊imatan kua'e, uranna paarorone nangonggolu al᷊amatta.

⁸ Atatohassi mangitou mangke aatambanna, sutempo niumamatta watukku Sion, watukku tampan Duatan al᷊awo'u monganna naipasilon batanganne.

⁹ Daringeṛṛewe aal᷊iomangku, oh Mawu Ruata Apan Lembontaṛṛino, daringiṛṛewe, oh Ruatan Yakub.

¹⁰ Al᷊amatewe ratun kami, oh Ruata, lu'arewe taumata apan buatte nipile-Nu.

¹¹ Mappianne allo massallo su Wal᷊en-Nu sul᷊ungnge'e saṛṛiwu su tonnane su tampa waine. I ya'u mamile maola'a mandariaga ngara su Wal᷊en Duata'u sul᷊ungnge'e matana'a su wal᷊en taumata lal᷊eo.

¹² Ana waugu Mawu Ruata mallal᷊u'addi ite wuṛṛu ratu apan mawantuga, apan nangonggolla si ite darangngu wuṛṛu aaddatta. I Tou manol᷊a'u sarangkanambone apan mapia su saruannu taumata apan wiakke tawe angngone.

¹³ Oh Mawu Apan Lembontaṛṛino, lal᷊umanna'a su taumata apan mangngimanna Si'o.