DARALO 83 - WUKE SUSI WATTI'U AL᷊AL᷊USASSA

Aal᷊iomanna sumal᷊ande aontolla sumaruanna ro'appa

¹ Daralon Asaf: sambua antari.

² Oh Ruata, arie mal᷊annaba, ariewe mama'ukku lima wuṛṛu mangumbalanna.

³ Pa'ellege seen-Nu mammangalo, manga taumata apan maddantin-Nu lullawangnga.

⁴ I mangitou makkinnu hol᷊aga lal᷊eo ipando'appa al᷊aṛṛanang-Ngu; wuṛṛu nabbaidda lumawangnga manga taumata apan lal᷊u'aran-Nu.

⁵ Unni mangitou, “Wette i ite makkimunsa'a Israel, tadea'u aranni mangitou tate naunganna lai.”

⁶ Manga walahanna buatte naammulla, wuṛṛu nabbaidda lumawangnga Si'o:

⁷ walahannu Edom wuṛṛu Ismael, manga taumatan Moab wuṛṛu Hagar;

⁸ walahannu Gebal, Amon wuṛṛu Amalek, walahannu Filistea see lai tumana'u Tirus.

⁹ Wuṛṛu lai Asyur naammule ringanni mangitou, naola'a daroloṛṛannu papapulunni Lot.

¹⁰ Olaawe i mangitou taumatan Midian, ere i Sisera wuṛṛu Yabin su Sal᷊ukku Kison,

¹¹ apan buatte nipate su Endor, wuṛṛu nabbal᷊ite pansuwukku leta'a.

¹² Olaawe piaṛṛa'i mangitou ere i Oreb wuṛṛu i Zeeb, pasuṛṛubawa'a tembonanni mangitou ere i Zebah wuṛṛu Salmuna,

¹³ ana waugu i mangitou buatte nabbisara, “Wette anuanni ite leta'a tatanaannu Ruata.”

¹⁴ Oh Ruata, sal᷊iawuṛṛa'e i mangitou ere awu, ere laṛṛami apan nitiuppu anginna.

¹⁵ Naal᷊ihidda putungnga apan nanoṛṛobba mahurangnge, ṛenggammu putungnga apan maatutungnga manga wowone.

¹⁶ Enggenete i mangitou ringannu tandi'a wuas-Si'o, paṛṛoroite i mangitou ringannu anginna wahewalla.

¹⁷ Oh Mawu, wala'ewe i mangitou aal᷊uandahanna, tadea'u i mangitou manga'u taṛṛino-Nu.

¹⁸ Wala'ewe i mangitou sarangkal᷊o'engnge pansilianna wuṛṛu matta'utta, wala'ewe i mangitou mate sulal᷊ummu asasili.

¹⁹ Antimanna i mangitou maasingkata tumba'u I'o Apan Atangaṛṛanne, Mawu, apan uataṛṛino ahewallu runia.