DARALO 81 - WUKE SUSI WATTI'U AL᷊AL᷊USASSA

Aantari sutempon damea

¹ Su piaṛṛa'u mangangantari. Tumuṛṛuttu antarin: Gitit. Wuassi Asaf.

² Pangantariten daralo su Mawu, atatohassi ite, paggiote ringannu lulluassa su Ruatan Yakub.

³ Tengkelle rebana, wuṛṛu pangantarite, tengkelle gambus wuṛṛu kecapi ringannu mapia.

⁴ Paniuppe trompetta su allo wahewan kite, su andeangngu wul᷊anna wakku wuṛṛu wul᷊anna rumaria.

⁵ Ana waugu olangnge udde sambau atoranna su Israel, sambau parenta wuassu Ruatan Yakub.

⁶ I Tou na'ola'a sambau inanaramanna su walahannu Israel, sutempo i Tou inaite mando'appa Mesir. I Ya'u naaringikka sasinaukka apan awaganangku,

⁷ “I Ya'u buatte namasanna winabbawa wuassu wambangngu, wuṛṛu namallossu so'anna wuassu limanu.

⁸ Sulal᷊ummu asasusanu i yamiu sussal᷊ande, ne i Ya'u nanal᷊amatta si yamiu. I Ya'u sinumimbakka si yamiu wuassu rallu'a tampa i Ya'u uaimbuni, i Ya'u nanal᷊u'atta si yamiu su al᷊imatan kua'en Meriba.

⁹ Paddaringikke parenta-U, ei al᷊aṛṛana-U, Israel, unnu wisara i yamiu maddaringikka si Ya'u!

¹⁰ Imbaṛṛangnga suwallati yamiu pia mawu waine, imbaṛṛangnga massubba mawu awagananna.

¹¹ Ete i Ya'u Mawu Ruatanu, apan nangehetta si yamiu sinumabbangnga wuassu Mesir. Sutempo i yamiu mal᷊unussa i yamiu Ta'u nionggol᷊annu anna.

¹² Arawe al᷊aṛṛana-U maddiri maddaringikka si Ya'u, Israel maddiri tumuṛṛutta si Ya'u.

¹³ Ana waugu udde i mangitou niwala'u tawe maddaringikka; wala'e i mangitou mappaamattu apulun naungnge sassane.

¹⁴ Eh, unnuwisara al᷊aṛṛana-U maddaringikka si Ya'u, unnuwisara i mangitou maapulu tumuṛutta si Ya'u,

¹⁵ ne i Ya'u masasaṛṛawutta mapasuṛṛubawan seetti mangitou, wuṛṛu maparugin anambon ro'appi mangitou.

¹⁶ Taumata apan maddantinnu Ruata sarun Ta'u iapasuṛṛubbawa, i mangitou sarun iṛṛuumanna saran mal᷊annu-l᷊annu.

¹⁷ Arawe al᷊aṛṛana-U sarun Ta'u onggol᷊annu anna ganduma nipile, wuṛṛu Ta'u lairanna ringannu pul᷊a ma'itumma.”