DARALO 75 - WUKE SUSI WATTI'U AL᷊AL᷊USASSA

Ruata, mallaṛṛuunga apan atanggaṛṛane

¹ Su piaṛṛa'u mangangantari. Tumuṛṛuttu antari: Imbaṛṛangnga mamate. Daralon Asaf. Aantari.

² I yami massubba Si'o, oh Ruata, i yami maadiangkamanna Si'o wuṛṛu mamasingkattu manara-Nu apan maatiangnga.

³ Ruata nabbisara, “Sutempo apan Ta'u nitantunna, i Ya'u sarun makkungnga ringannu atatul᷊idda.

⁴ Amungkangu runia umio'a ringannu anambon tumanangnge ete i Ya'u apan manohassa manga diṛṛine.”

⁵ Su taumata apan apulune mammahia, i Ya'u mabbisara tadea'u tate lai mamahia.

⁶ Wuṛṛu su taumata lal᷊eo, tadea'u ariete mamunga. Arie mananggakku watangannu ara'e mabbisara ringannu mawunga.

⁷ Ana pallaṛṛuungnga tawe rumanta wuassu samba'a ra'i ara'e waṛṛata tawe lai wuassu samba'a sawannakka ara'e timukka.

⁸ Arawe ete Ruata sassane apan makkuungnga, i Tou mapawawon sangkatou wuṛṛu mapatanggaku waine.

⁹ Asasa'un Mawu naal᷊ihidda cawanna su lima-Ne, cawanna udde lal᷊oṛṛoannu anggore maattikka. Ruata nallal᷊innu lal᷊oṛṛone, anambon taumata lal᷊eo su runia ṛinone ma'inumma sara masue.

¹⁰ Arawe i ya'u sidutu mabbatti'u Ruatan Yakub, mangngantarin daralo si Tou.

¹¹ I Tou sarun mamaddi atatohassu taumata lal᷊eo, ewe'e taumata mapia aatambanna matohassa.