DARALO 73 - WUKE SUSI WATTI'U AL᷊AL᷊USASSA

WUKE ATALLUNE DARALO 73–89 Atatul᷊iddu Mawu

¹ Daralon Asaf. Mapiawe atonna Ruata su al᷊aṛṛanang-Nge, su taumata apan naungnge waresi.

² Arawe i ya'u nabbingote, pangangimangku maraniten mawul᷊i,

³ ana waugu naungku lal᷊eo su taumata mawunga, sutempo i ya'u naasilo aauntungannu taumata lal᷊eo.

⁴ Ana waugu i mangitou tawe namendamma radda'a, awa'i mangitou matohassa wuṛṛu tawe maradda'a.

⁵ I mangitou tawe maapendama susa, tawe aṛiaannu asasilaka ere taumata waine.

⁶ Ana waugu udde i mangitou mawunga, wuṛṛu sidutu maṛagissa.

⁷ Wuassu naungngi mangitou sinumabbanga al᷊al᷊eo; i mangitou tawe illol᷊one ringannu hol᷊aga lal᷊eo.

⁸ I mangitou mangngeetta wuṛṛu mangngarasa, wuṛṛu ringannu mawunga mammansaga sarun mangallanga.

⁹ I mangitou mallobbosa Ruata su surga, wuṛṛu mammahia taumata su runia,

¹⁰ na'oman sara al᷊aṛṛana'u Ruata nabbal᷊i'a ringanni mangitou, wuṛṛu mangngimante hatton mangitou.

¹¹ Unni mangitou, “Ruata wagga, Apan Atanggaṛṛane tawe maasunna.”

¹² Etearoddi ola'u taumata lal᷊eo; mabbiakka matammudda, darotongnge sidutu aatambanna.

¹³ Tawe gunane i ya'u mallu'adda naungku waresi; tawe gunane i ya'u mangindau wuassu rosa.

¹⁴ Ana waugu su al᷊o'engngu allo i ya'u naṛiaannu asasusa; suapan marua allo i ya'u sassansaranna.

¹⁵ Unnuwisara i ya'u nabbisara aroddi, i ya'u nandal᷊eo papapulungku.

¹⁶ Arawe sutempo i ya'u maddea'a maasunna, olangnge udde tumaniten masahadda si ya'u.

¹⁷ Panginsueanne i ya'u sinumutta su Wal᷊en Mawu, ana see naasunnate panguddusannu taumata lal᷊eo.

¹⁸ Niaddo-Nu i mangitou su lal᷊anna mal᷊ewakka, wuṛṛu niwala-Nu i mangitou manawo nate.

¹⁹ Tumba'u sulal᷊ummu sangkaṛondappa i mangitou nate, panginsuenni mangitou tumaniten maata'utta.

²⁰ Naal᷊ihidda wal᷊iawa apan nawul᷊i sutempo marua allo; sutempo I'o dirumarisikka oh Mawu, i mangitou lai nawul᷊i.

²¹ Sutempo i ya'u naapendamma sasassila wuṛṛu naungku naal᷊ihidda niusu'a,

²² i ya'u longonna tawe maasunna, i ya'u naal᷊ihidda winatangnga su saruan-Nu.

²³ Arawe i ya'u sidutu su saruan-Nu, I'o uaagassa lima'u aikkatanna.

²⁴ I'o nangehetta si ya'u ringannu tatantiro, wuṛṛu I'o nanengkamma si ya'u ringannu addata.

²⁵ Isai apan tatahuanangku su surga tumba'u I'o? Wal᷊ine wuassu Mawu taweddu ta'u ipaapulu su runia.

²⁶ Salaiwe niawa'u wadangku mabbal᷊i lome, ete I'o atatoha'u, oh Ruata; Ete I'o wuassu sarangkanambone apan tatahuanangku saran mal᷊annu-l᷊annu.

²⁷ Taumata apan manantang-Ngu sarun masilaka, I'o namate taumata apan mal᷊awangnga Si'o.

²⁸ Arawe si ya'u tumaniten mapia maranin Duata, Mawu Ruata ta'u niola'a tampa pattillummangku, tadea'u i ya'u wotongnge mamasingkattu al᷊awo'u inolaan-Ne.