DARALO 7 - WUKE SUSI WATTI'U AL᷊AL᷊USASSA

Aal᷊iomanna maddoronga atatul᷊idda

¹ Lal᷊uain Daud, apan niantari su Mawu ana waugu i Kus, taumatan Benyamin udde.

² Oh Mawu Ruata'u, i ya'u massirungnga ringan-Nu; sal᷊amatewe wuṛṛu liuaawe i ya'u wuassu anambon taumata apan mangngenggenna si ya'u.

³ Arie pabbala'a i mangitou naal᷊ihidda singa tumambo wuṛṛu mamangkassa si ya'u wuṛṛu taweddu mangontola si ya'u.

^4-5 Oh Mawu Ruata'u, i ya'u na'ola'a pallal᷊inga, na'ola'a al᷊al᷊eo susaruannu sandingananna ara'e namaddon seetta ringannu tawe pinangiananne, unnu wisara i ya'u na'ola'a aroddi,

⁶ wala'ewe i ya'u enggenanna wuṛṛu sametannu seetta, ana see pateanna wuṛṛu itantangnga su leta'a.

⁷ Pabuatte sulal᷊ummu asasa'u-Nu, oh Mawu, ro'apete pangalon manga see'u. Pabuatte tadea'u mantul᷊ungku, ana waugu I'o maddea'a atatul᷊idda.

⁸ Ammul᷊a'e manga walahanna apan marani-Nu, wuṛṛu pamarentate si mangitou wuassu addera-Nu su surga.

⁹ I'o makkungngu umattu taumata; i ya'u onggol᷊eten atatul᷊idda, oh Mawu, ana waugu i ya'u tawe sal᷊ane.

¹⁰ Illol᷊oa'e al᷊al᷊eon taumata mal᷊awanga wuṛṛu tohasse naungngu taumata mapia, ana waugu I'o Ruata apan matul᷊idda, apan masingkattu naunga wuṛṛu ṛingirannu taumata.

¹¹ Pattillumangku eteudde Ruata apan nanal᷊amatta taumata naunge matul᷊idda.

¹² Eteudde Ruata mallaṛṛuunga apan matul᷊idda, apan suapan tempo makkumannu taumata lal᷊eo.

^13-14 Amungkangu pallal᷊aghun mangitou tawe mawal᷊u, I Tou uasaddiate ringannu ahidda apan maapate. I Tou nangagassa hal᷊el᷊e-Ne wuṛṛu nangannata al᷊ati'an-Ne, ana see namiti'u manga anaan-Ne apan pia putungnge.

¹⁵ Pa'ellege, taumata lal᷊eo manggol᷊agu al᷊al᷊eone; i tou makkiinnu al᷊al᷊eo wuṛṛu na'ola'a wawahia.

¹⁶ I tou naal᷊i loṛangnga ipagau taumata waine, arawe i tou sassane nanawo sulal᷊umme.

¹⁷ Nariaddi i tou niṛṛuumannu inolaane sassane, wuṛṛu nisansarannu aatikku naungnge sassane.

¹⁸ I ya'u maadiangkamanna su Mawu ana waugu i Tou matul᷊idda, i ya'u mangngantarin daralo su Mawu, Apan Atanggaṛṛanne.