DARALO 68 - WUKE SUSI WATTI'U AL᷊AL᷊USASSA

Antari naauntunga

¹ Su piaṛṛa'u mangangantari. Daralon Daud.

² Ruata nabbuatta nanal᷊iawukku seen-Ne, taumata apan maddantinni Tou tinumal᷊anga wuassu saruan-Ne.

³ Ruata nallimbuakka si mangitou niapa'ingkata, naal᷊ihidda timbulla apan nitiuppu anginna ana see nawul᷊i. Naal᷊ihidda lilinna nonossa sulal᷊ummu putungnga, etearoddi taumata lal᷊eo nawul᷊i wuassu saruannu Ruata.

⁴ Arawe taumata ma'imanna lullala'a wuṛṛu lulluassa, i mangitou mangngintul᷊in al᷊al᷊uassa su saruannu Ruata.

⁵ Pangantarite su Ruata, paddalote aran-Ne, saddiaite lal᷊anna mal᷊alangnga si Tou apan uasa'e winabbawa. Aran-Ne Mawu – lalluasse su saruan-Ne!

⁶ Ruata apan uatana'a su Wal᷊en-Ne apan susi eteudde; iamangngu ana'a asisi wuṛṛu mananahekku wawine wal᷊u.

⁷ Ruata nangonggolu tampa tatanaanna su taumata sassane; i Tou namallosu taumata tataṛanganna na'oman sara i mangitou su lal᷊umanna'a. Arawe manga taumata apan lullawanga Mawu ṛinone matana'a su leta'a maṛṛasa.

⁸ Oh Ruata, sutempo I'o nangehetta al᷊aṛṛanang-Ngu niumamatta su wadda'a apan mamara,

⁹ runia niumio'a, uranna nangansalla su saruan-Nu, ana waugu niarantannu Ruatan Sinai, Ruatan Israel.

¹⁰ Ringannu tinumompe'a I'o nanossokku uranna, wuṛṛu nanuwukka letang-Ngu apan maṛṛasa.

¹¹ Ana see al᷊aṛṛanang-Ngu namanuate poiaroddi; sulal᷊ummu apapia-Nu, oh Ruata, I'o nappadul᷊i taumata asiangnga.

¹² Mawu nangonggolu parenta, ana see manga wawine nangapiddu watti'a:

^13-14 “Manga ratu wuṛṛu tantarane tinumal᷊angke!” I mangitou tinumal᷊angnga naal᷊ihidda merpati tinumalla'a marau. Manga wawine su wal᷊en mattahia, sal᷊a'a wuṛṛu wul᷊awanna apan nitantanga. Salaiwe manambo apan tawe tinumantalonga napapangalo, al᷊aṛṛana'u Ruata naasombate auntunganna.

¹⁵ Sutempo Apan Atanggaṛṛane nanal᷊iawukku manga ratu poiaroddi, nonto'e salju wuassu Wowon Salmon.

¹⁶ Wowon Basan uddewe wowone apan ahewal᷊anne, wowone apan manambo puidde.

¹⁷ Anio wuassu puiddu apan manambo udde i'o ma'ellega ringannu aal᷊uandaga su Wuiddu Sion apan nipilen Duata maola'a tatanaan-Ne? Mawu sarun matana'a poiaroddi saran mal᷊annu-l᷊annu.

¹⁸ Ringannu su mapul᷊o ṛiwune kereta apan matohassa Ruata nirumanta suwallati mangitou sulal᷊ummu awawantu-Ge.

¹⁹ Mawu sinuma'a su tampa atanggaṛṛanne; manambo taumata niatawanna niapiddi Tou. I Tou nanengkamma sasamba wuassu wallatu taumata ewe'e lai wuassu wallatu ammul᷊annu taṛṛa pangalo; tadea'u i mangitou uawanua suadio'a ringannu Mawu Ruata.

²⁰ Paddalote Mawu, ana waugu ete i Tou Ruata apan nanal᷊amatta si ite; wuassu allo maddatingu allo i Tou uapasanna winabbawan kite.

²¹ Ruatan kite uddewe Mawu apan nanal᷊amatta, i Tou namallosi ite wuassu papate.

²² Ruata atonna-tonna sarun makkimunsa'a puan seen-Ne, manga taumata sidutu mabbiakka sulal᷊ummu rosa.

²³ Unnu Mawu, “Ei al᷊aṛana-U, i Ya'u nangapiddu seennu wuassu Basan i Ya'u niapidda i mangitou nabelengnga wuassu wantan tahal᷊oangnga,

²⁴ tadea'u i yamiu mangukkassa leddanu ringannu daṛṛan mangitou, wuṛṛu manga asunu mallewa daṛṛa udde mal᷊ai-l᷊aidda.”

²⁵ Sarangkamabone nabbiala pangangelekku auntungan-Nu, oh Ruata, Ruata'u, Ratu'u, niapidda watukku tampa atatanaan-Ne.

²⁶ Su saruanne u'amatta manga mangangantari, su liudde manga mananalanga kecapi; su pattangnganne manga maṛṛuala mananengkella rebana; ete arendi antarin mangitou;

²⁷ “Paddalote Ruata su pattangngannu ammul᷊annu al᷊aṛṛanang-Nge, paddalote Mawu, ei anambon papapulunni Yakub!”

²⁸ Benyamin, ṛuanganna atul᷊unganne, u'amatta su monane, ana see mangngelekke manga piaṛṛa'u Yehuda su liudda manga piaṛṛa'u Zebulon wuṛṛu Naftali.

²⁹ Ruatanu maddea'a atatohannu; oh Ruata, tohassawe sarangkanambone apan buatte niolang-Ngu si yami.

³⁰ Manga ratu uaapiddu sasamba Si'o su Wal᷊en-Nu su Yerusalem.

³¹ Limbuaṛṛete Mesir, winatangnga mal᷊aṛṛaga udde wuassu pattangngannu tiwo. Tagguete manga walahanna, ammul᷊annu bantenga udde ringannu al᷊aṛṛanangnge, apan ual᷊aṛinda tadea'u maasomba sal᷊a'a. Ruata nanal᷊iawukku manga walahanna apan apulune uapapangalo.

³² Manga ahewal᷊annu Mesir nirumanta uaapiddu witu'a; taumatan Sudan uasasaṛṛawutta uaapiddu aonggola su Ruata.

³³ Pangantarite su Ruata, ei anambon araratuanna, pangantariten daralo su Mawu,

³⁴ si Tou apan mammal᷊intaddu winalangannu al᷊amona. Paddaringikka! Mawu nabbisara, tingik-Ke ruddallu'a ma'ikkata.

³⁵ Panga'ute taṛinon Duata apan uaparenta su Israel, taṛino-Ne naddatingngu langitta.

³⁶ Mangke atonna maatiangnga Ruatan kite sutempo i Tou sinumabbanga wuassu tampa atatanaan-Ne. Ruatan Israel nangonggolu taṛino wuṛṛu atatohassa apan wahewalla su al᷊aṛṛanang-Nge. Dalo su Ruata!