DARALO 67 - WUKE SUSI WATTI'U AL᷊AL᷊USASSA

Antari adiangkamanna

¹ Su piaṛṛa'u mangangantari. Ringannu nanalangnge kecapi. Daralo.

² Antimanna Ruata mandangngu wuṛṛu mangal᷊amatta si ite, antimanna i Tou ma'ellega si ite ringannu sasaṛionto'u naungnga.

³ Oh Ruata, antimanna apulu-Nu tumelengnga su ahewallu runia, wuṛṛu asasal᷊aman-Nu niapal᷊iatta'a suwallatu anambon walahanna.

⁴ Antimanna manga walahanna maddalo Si'o, oh Ruata, antimanna anambon walahanna maadiangkamanna Si'o.

⁵ Antimanna anambon walahanna lullala'a lulluassa, wuṛṛu mangngantari ringannu lulluassa. Ana waugu I'o mammarenta ringannu atatul᷊idda wuṛṛu mangngehetta suapan walahanna su runia.

⁶ Antimanna manga walahanna maddalo Si'o, oh Mawu, antimanna anambon walahanna maadiangkamanna Si'o.

⁷ Leta'a buatte nangonggolu hessine, Ruata, Ruatan kite buatte nangal᷊amatta si ite.

⁸ Ruata buatte nangal᷊amatta si ite; antimanna i Tou addatanna su ahewallu runia!