DARALO 65 - WUKE SUSI WATTI'U AL᷊AL᷊USASSA

Daralo wuṛṛu adiangkamanna

¹ Su piaṛṛa'u mangangantari. Daralon Daud. Antari.

² Ṛinone i yami maddalo Si'o su Sion, oh Ruata, wuṛṛu manipussa paairen kami Si'o.

³ Ana waugu ete I'o naddaringikka aal᷊iomanna; anambon taumata nirumanta ringan-Nu ana waugu narosate.

⁴ Manga rosa'u tumaniten mawakkata si ya'u, arawe I'o mangke nangampungnga.

⁵ Lal᷊umanna'a su taumata apan nipile-Nu, wuṛṛu I'o nangahe matana'a su Wal᷊en-Nu. I yami sarun lairannu al᷊awo'a apan mapia su Wal᷊en-Nu, tatanaan-Nu apan susi.

⁶ I'o sinumimbakka si yami ringannu nangonggolu auntunganna si yami, I'o na'ola'a inolaanna apan maatiangnga ipanal᷊amatta si yami! Ete I'o antimannu anambon walahanna maddatingngu tahal᷊oangnga apan marau.

⁷ Ringannu atatohan-Nu I'o napararisikku manga wowone, tadea'u mapal᷊iatta'u taṛṛino-Nu apan matohassa.

⁸ I'o napal᷊enakku tandi'u tahal᷊oangnga wuṛṛu daṛṛan lua'a, wuṛṛu I'o napal᷊annabu al᷊iba'ukku manga walahanna.

⁹ Anambon tumana'u runia matta'utta wuṛṛu mangngaddata naasilo manga inolaan-Nu apan wahewalla. Ahewallu runia wuassu pentakke maddatingngu pondolle niolang-Ngu lulluassa lullala'a.

¹⁰ Leta'a udde nipadul᷊ianan-Nu wuṛṛu ninggol᷊an-Nu uranna, niolang-Ngu masuwukka na'oman sara hessine manambo. Manga sal᷊ukka niloṛṛoan-Nu ua'e ringannu napene, I'o nanaddia ganduma si mangitou, ore, etearoddi I'o nanadia.

¹¹ I'o napa'elekku ua'e su sasal᷊uṛṛannu pajekone wuṛṛu I'o namokka letangnge. I'o nanuwukka leta'a ringannu uranna, wuṛṛu rariagan-Nu lal᷊uwone tuttuwo masuwukka.

¹² Ana waugu apapia-Nu, suapan mattonna I'o nangonggolu pangitinganna; suapawe I'o rumanta, wiakka ete pia serege.

¹³ Wadda'a mangke napenen ambinga domba, anambon wuidda lulluassa.

¹⁴ Manga wadda'u nannal᷊o napenen domba, manga wawal᷊anne napenen ganduma. Sarangkanambone lulluassa wuṛṛu mangngantari ringannu lullala'a.