DARALO 64 - WUKE SUSI WATTI'U AL᷊AL᷊USASSA

Aal᷊iomanna maddorongnga tatillumma

¹ Su piaṛṛa'u mangangantari. Daralon Daud.

² Oh Ruata, daringiṛṛewe aal᷊iomangku sutempo i ya'u susa, sal᷊amatewe niawa'u wuassu seetta apan maata'utta.

³ Lu'arewe i ya'u wuassu ammul᷊annu taumata lal᷊eo, wuṛṛu hol᷊agu apanden manga taumata lal᷊eo.

⁴ I mangitou ma'ola'a lilan mangitou hal᷊ele maṛṛoro, wuṛṛu mandammen manga wisara maṛṛagissa ere anaanna.

⁵ Wuassu pa'imbunianne i mangitou mannal᷊iawukku watti'a awusu, ringannu tawe mata'utta i mangitou mangngadio'a taumata apan tawe sal᷊ane.

⁶ I mangitou sidutu uaagassa matohassa pandumanne apan lal᷊eo, wuṛṛu ma'ire mantaingngu sasedda; i mangitou massunna naudde taweddu maasilo.

⁷ I mangitou manggol᷊agu al᷊al᷊eo, wuṛṛu mabbisara, “ I yami ma'ola'a hol᷊agu apande apan tawe asingkatanna.” Naungnga wuṛṛu apapian taumata tumanite mal᷊al᷊umma, tawe asingkatanna.

⁸ Arawe Ruata namiti'u anaan-Ne si mangitou, wuṛṛu inaṛombanganne i mangitou nal᷊essa.

⁹ I mangitou nate ana waugu wisaran mangitou sassane; sarangkanambone apan naasilo mappapa'ilinga.

¹⁰ Ana see anambon taumata ringanna nata'utta; i mangitou maṛṛingiddu inolaannu Ruata wuṛṛu mammasingkatu sarangkamabone apan buatte niolang-Nge.

¹¹ Ne anambon taumata mapia sarun lumuassa ana waugu sarangkanambone apan nimmanaran Mawu. I mangitou sarun mattillumma si Tou; anambon taumata matul᷊idda sarun lumala'a.